اۆتوبۋس جۇرگىزۋشىلەرىنىڭ شارشاعانىن انىقتايتىن جۇيە جاسالدى
«استانا LRT» ج ش س باسقارما ءتوراعاسىنىڭ ورىنباسارى بەيبىت ەسجانوۆتىڭ ايتۋىنشا، استانالىق اۆتوپاركتەرگە 725 جۇرگىزۋشى قاجەت. بۇل جاعداي قوعامدىق كولىكتەردىڭ جول- كولىك وقيعالارىنا ءجيى ۇشىراۋىنا ءوز اسەرىن تيگىزۋدە. «استانا LRT» كومپانياسى بۇل ماسەلەنى شەشۋدىڭ بالاما جولدارىن دا قاراستىرۋدا. سونىڭ ءبىرى - «جۇرگىزۋشىنىڭ شارشاعانىن باقىلايتىن جۇيە» .
IQ Glodal كومپانياسى باسشىسى ەرلان كاكەنوۆتىڭ ايتۋىنشا، كامەرامەن جابدىقتالعان ارنايى قۇرىلعى جۇرگىزۋشىنىڭ بەت الپەتىندەگى وزگەرىستەر ارقىلى ونىڭ قانشالىقتى شارشاعانىن قاداعالاپ وتىرادى.
«اسا سەزىمتال قۇرىلعى جۇرگىزۋشى كوزىلدىرىك تاعىپ وتىرعان كۇننىڭ وزىندە ونىڭ جاعدايىن باقىلاي الادى. جۇيەدە قانداي دا ءبىر وزگەرىس تىركەسە، بىردەن دىبىستىق ەسكەرتۋ جىبەرەدى. وسى ارقىلى شارشاعان جۇرگىزۋشىنى رەيستەن بوساتۋعا بولادى. بۇل جوباعا الماتى مەن شىمكەنت قالالارى دا قىزىعۋشىلىق تانىتىپ وتىر» - دەيدى كومپانيا وكىلى.
IQ Glodal كومپانياسى بۇدان بولەك «اينالا» شولۋ جۇيەسى» جابدىعىن دا ۇسىنىپ وتىر. ونىڭ كومەگىمەن جۇرگىزۋشى اينامەن تەرەزەدەن بولەك 360 گرادۋس اۋماقتى قامتيتىن كامەرانىڭ كومەگىنە جۇگىنە الادى.
بەيبىت ەسجانوۆ بۇل جوبا ءبىر اي بويى قالا اۆتوبۋستارىندا سىناقتان وتەتىنىن ايتادى.
«بۇل جوبالاردى ءبىر اي بويى بىرنەشە اۆتوبۋستا كەزەك- كەزەگىمەن سىناپ كورەمىز. بۇل جۇيەنىڭ جۇرگىزۋشىلەرگە قانشالىقتى ىڭعايلى، اپاتتاردىڭ الدىن الۋ قانشالىقتى مۇمكىن ەكەنىن انىقتاعاننان كەيىن عانا ناقتى شەشىم قابىلدانادى» - دەيدى «استانا LRT» ج ش س وكىلى.
ايتا كەتەيىك، 26 - ناۋرىزدا ەلوردادا ۇلكەن جول- كولىك اپاتى بولدى. قالا ماڭىنا قاتىنايتىن 301- باعداردىڭ ەكسپرەسس- اۆتوبۋسى قاتتى جىلدامدىقپەن باعدارشامدا تۇرعان 12- ءىنشى اۆتوبۋسقا سوعىلدى. ءوز كەزەگىندە 12-اۆتوبۋس ەكپىنمەن جەدەل مەديتسينالىق جاردەم كولىگى مەن تاعى ءبىر اۆتوبۋسقا سوعىلدى.
سالدارىنان 301- باعداردىڭ جۇرگىزۋشىسى جانە الدىڭعى ورىندا وتىرعان ءبىر جولاۋشى كوز جۇمدى. 36 ادام زارداپ شەكتى.
«Astana LRT» باسشىسى بەكمىرزا يگەنبەردينوۆ بۇعان دەيىن زارداپ شەككەندەرگە وتەماقى تولەنەتىنىن ءمالىم ەتكەن بولاتىن.