مۇعالىمگە جۇمىسىنا نەگىزسىز ارالاسۋدان قورعانۋ قۇقىعى بەرىلەدى - كۇلاش ءشامشيدينوۆا
««پەداگوگتار مارتەبەسى» تۋرالى زاڭ جوباسىندا ەڭ الدىمەن ءبىرىڭعاي پەداگوگ تۇسىنىگى بار. بۇگىن دە پەداگوگ جانە وعان تەڭەستىرىلگەن تۇلعالار دەگەن تۇسىنىك بارىن بىلەسىزدەر. سول سەبەپتى، بەلگىلى ءبىر شىعىندى تالاپ ەتەتىن ءبىرىڭعاي تۇسىنىك ەنگىزىلىپ جاتىر. سەبەبى، بازالىق ەڭبەكاقىنىڭ دەڭگەيى ءارتۇرلى. سونىمەن بىرگە، ەڭبەك دەمالىسى بويىنشا بولىنەتىن اقشانىڭ دا دەڭگەيى ءارقالاي. سول سەبەپتى، ءبىرىڭعاي پەداگوگ تۇسىنىگىن ەنگىزەتىن بولساق، بارلىعىنا بىردەي جاعداي جاسالادى»، - دەيدى كۇلاش ءشامشيدينوۆا ۇكىمەتتىڭ باسپا ءسوز ورتالىعىندا.
ءمينيستردىڭ ايتۋىنا قاراعاندا، زاڭ بويىنشا پەداگوگتىڭ كاسىبي قۇقىعى، ۇيىمنىڭ قوعامدىق ومىرىنە اتسالىسۋ قۇقىعى، كاسىبي مىندەتىن ورىنداۋ جولىنداعى ماتەريالدىق- تەحنيكالىق قامتاماسىز ەتۋ قۇقىعى، پەداگوگتىڭ كاسىبي جۇمىسىنا نەگىزسىز ارالاسۋ جاعدايىنان قورعانۋ قۇقىعى، ار- نامىسىن قورعاۋ قۇقىعى بەرىلگەلى وتىر.
«بۇل ماسەلە بويىنشا، اكىمشىلىك قۇقىقبۇزۋشىلىققا وزگەرىستەر ەنگىزىلۋدە. ەگەر جوعارىدا اتالعان جاعدايلار بويىنشا مۇعالىمنىڭ قۇقىعى بۇزىلاتىن بولسا، وندا ازامات جاۋاپكەرشىلىككە تارتىلادى. ماسەلەن، الگى ازاماتقا بىرىنشىدەن ەسكەرتۋ جاريالانسا، ەكىنشىدەن ايىپپۇ سالىنادى. ايىپپۇلدىڭ مولشەرى باسقا ساناتتاعى تۇلعالارعا قولدانىلىپ جاتقان تاجىريبە بويىنشا ايقىندالادى»، - دەيدى مينيستر.
سونىمەن بىرگە مينيستر مۇعالىمدەردى كوتەرمەلەۋ تەتىكتەرى، ولاردى الەۋمەتتىك كەپىلدىكتەر قاراستىرىلىپ، پەداگوگتاردىڭ مارتەبەسى دە زاڭنان تىس قالمايتىنىن جەتكىزدى.
اۆتور: ايان بەكەن ۇلى