باقىت سۇلتانوۆ ەلوردالىقتارمەن بىرگە اعاش وتىرعىزدى

نۇر-سۇلتان. قازاقپارات - نۇر- سۇلتان قالاسىنىڭ اكىمى باقىت سۇلتانوۆ ەلوردالىقتارمەن بىرگە اعاش وتىرعىزدى، دەپ حابارلايدى قازاقپارات ءتىلشىسى.

بۇل تۋرالى قالا باسشىسى Facebook پاراقشاسىندا جازدى.

«بۇگىن سارىارقا اۋدانىنداعى اعاش وتىرعىزۋ تەلىمىندە تۇراتىن تۇرعىندارمەن كەزدەستىم. بىرگە جەكسەنبىلىك پلوگگينگكە قاتىسىپ، اينالاسىن تازالادىق. قازىر بۇل جەردەگى 350 ادام 60 جەر ۇيدە ءومىر سۇرۋدە. ءبىرى قالماي تازالىق ناۋقانىنا شىعىپ، بىرلەسىپ 2 توننا قوقىس شىعاردىق. كەزدەسۋ بارىسىندا جەرگىلىكتى تۇرعىندار تىنىس-تىرشىلىككە بايلانىستى سۇراقتارىن قويدى. ونىڭ ىشىندە اۋىز سۋ، جول سالۋ، جارىق پەن بالالار وينايتىن الاڭ ورناتۋ ماسەلەلەرىن كوتەردى. ءارقايسىسىنا اكىمدىك شەتكى اۋماقتاردى دامىتۋعا ەرەكشە نازار اۋدارىپ جۇرگەنىن، ەڭ كۇردەلى ماسەلەنى شەشۋ ءۇشىن بيۋجەتتەن قارجى قاراستىرىلعانىن ايتىپ، ءتۇسىندىردىم. وزدەرى دە قول قۋسىرىپ وتىرماعان ەكەن. شامالارى جەتكەنشە كوشەگە جارىق ورناتىپ، اينالاسىن تازالاپ وتىرادى. بەلسەندىلىكتەرى ءۇشىن ۇلكەن العىسىمدى ايتتىم»، - دەيدى شاھار باسشىسى.

باقىت سۇلتانوۆ سونداي-اق، بۇگىن «كوكتال 2» تۇرعىن الابىنىڭ ازاماتتارىمەن كەزدەسكەنىن جازدى.

«ولار دا 68 مەكتەپتىڭ الدىنداعى ساياباقتى كوگالداندىرۋ ءۇشىن اعاش وتىرعىزۋ ناۋقانىنا كىرىسىپتى. بىرگە قايىڭ، قاراعاي اعاشتارىن وتىرعىزدىق. ءدال ءقازىر بۇل اۋداندا 12 مىڭنان اسا تۇرعىن تۇرادى. ال ساياباق ولاردىڭ سۇيىكتى دەمالىس ورنىنا اينالعان»، - دەيدى اكىم.

قالا باسشىسى «كوكتال» اۋدانىن ارالاۋ بارىسىندا 68 مەكتەپتىڭ جانىنان سالىنىپ جاتقان جاپسارلاس نىساننىڭ قۇرىلىسى مەن جولدارىنىڭ احۋالىن تەكسەرىپ، جاۋاپتىلارعا ءتيىستى تاپسىرما بەرگەنىن ايتتى.