التايداعى اۋرۋحانادا دارىگەرلەر ۇزىلگەن اياقتى جالعادى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن بۇقارالىق اقپارات قۇرالدارىنا اپتالىق شولۋىن ۇسىنادى.

تۇركيانىڭ ەڭ ۇلكەن مەشىتى اشىلدى - TRT

ىستانبۇلدا 6 جىل بۇرىن ىرگەتاسى قالانعان 63 مىڭ ادام ءبىر مەزەتتە عيبادات ەتە الاتىن، تۇركيانىڭ ەڭ ۇلكەن مەشىتى اشىلدى، دەپ حابارلايدى تۇركيانىڭ راديو-تەلەۆيزيا مەكەمەسىنىڭ سايتى.

اتالعان باسىلىم «ۇلكەن چاملىدجا مەشىتى» دەپ اتالاتىن ءدىن ورداسى 3- مامىر كۇنى رەسمي تۇردە اشىلاتىنىن مالىمدەگەن.

«پرەزيدەنت رەجەپ تايىپ ەردوعان دا قاتىساتىن ءراسىم جۇما نامازىنان كەيىن بولدى. مەشىتتىڭ اشىلۋىنا شەتەلدىك قوناقتار دا قاتىسادى. جاڭا مەشىتتە كۇنى بويى قۇران وقىلادى»، دەپ حابارلايدى TRT.

وزبەكستاندا قازاق اۋىلدارىنا 10 مىڭ قازاقشا كىتاپ سىيعا تاراتىلدى - «كەنيماح تاڭى» گازەتى

«وزبەكستان رەسپۋبليكاسى پرەزيدەنتىنىڭ حالىق قابىلداۋى مەكەمە-ۇيىمدارمەن ىنتىماقتاستىقتا تۇرعىندار اراسىندا تىكەلەي بايلانىستى جولعا قويىپ وتىر. ەل پرەزيدەنتىنىڭ 2019-جىلعى 8- قاڭتارداعى «ايماقتاردى كومپلەكستى الەۋمەتتىك-ەكونوميكالىق دامىتۋ بويىنشا سەكتورلار قىزمەتىن ودان جەتىلدىرۋگە بايلانىستى قوسىمشا شارالارى تۋرالى» قاۋلىسى مەن ۇستىمىزدەگى جىلعى 17- قاڭتارداعى «تۇرعىندار پروبلەمالارى مەن جۇمىس ىستەۋ جۇيەسىن ودان ءارى جەتىلدىرۋ شارالارى تۋرالى» جارلىعى نەگىزىندە جاڭا جۇيە ەنگىزىلدى. جاڭا جۇيەگە سايكەس حالىق قابىلداۋلارى پروبلەمالاردى ۇيمە-ءۇي ءجۇرۋ ارقىلى انىقتاپ ونى شەشۋدە مەملەكەتتىك ورگاندار مەن ىنتىماقتاستىقتى كۇشەيتىپ تۇرعىندار مەن تىكەلەي جۇمىس ىستەيدى»، دەپ جازادى «كەنيماح تاڭى» گازەتى.

باسىلىمنىڭ جازۋىنشا، پرەزيدەنت جارلىعىن ورىنداۋ ماقساتىندا ايماقتارعا «رۋحانيات كەرۋەنى» ۇيىمداستىرىلعان. بۇل كەرۋەن مەملەكەتتىك قىزمەتتەر، ءبىلىم بەرۋ، دەنساۋلىقتى ساقتاۋ سەكىلدى ماڭىزدى سالالار بويىنشا شالعاي ايماقتاردا تۇرعىندارمەن دوڭگەلەك ۇستەل سۇحباتتارىن وتكىزگەن.

«ءبىلىم بەرۋ وشاقتارىنا ناۋاي وبلىستىق اكىمشىلىگى، وزبەكستان رەسپۋبليكاسى پرەزيدەنتى حالىق قابىلداۋىنىڭ ايماقتىق باسقارماسى مەن «ناۆوي-ازوت» كاسىپورنى دەمەۋشىلىگىندە الماتى قالاسى باسپاسىنان شىققان كوركەم ادەبي كىتاپتاردىڭ 10000 داناسى سىيعا تارتىلدى. ءار اۋىلعا 1000-1200 دانادان تاراتىلعان كىتاپ كىتاپحانالارعا ەمەس وقىرماندارعا تىكەلەي جەتكىزىلدى»، دەپ جازادى «كەنيماح تاڭى» گازەتى.

«مەن ءۇي بيكەسى بولسامدا ادەبي كىتاپتى وقۋعا قىزىعامىن. بۇگىنگى «رۋحانيات كەرۋەنى» فەستيۆالى اياسىندا وبلىس باسشىلارى بىزگە قىزىقتى كىتاپتار سىيلادى. ولاردىڭ اراسىندا م. اۋەزوۆتىڭ «اباي جولى» س. سەيفۋليننىڭ «تار جول تايعاق كەشۋى»، شەرحان مۇرتازانىڭ « قىزىل جەبەسى»، عابيت مۇسىرەپوۆتىڭ «ۇلپانى»، ءابىش كەكىلبايەۆتىڭ «ۇركەرى» جانە تاعى باسقا تاعلىمى مول جيناقتار مەن كوركەم ادەبيەتتەرگە قول جەتكىزدىك. مەن بۇگىن سىيعا العان «اباي جولى» ەپوپەياسىن ءوز پەرزەنتتەرىمە وقىپ بەرەمىن. ويتكەنى ول كىتاپتى ءار قازاق وقۋى ءتيىس كىتاپتىڭ ءبىرى دەپ ويلايمىن»، - دەيدى بايمۇرات ەلدى مەكەنى تۇرعىنى فاتيما مۇسايەۆا.

التايدا ۇزىلگەن اياقتى قايتا جالعاۋ وتاسى ءساتتى جاسالدى - «اعاجاي-التاي» پورتالى

التاي ايماقتىق حالىق اۋرۋحاناسىنىڭ تراۆماتولوگيا ءبولىمى وڭ جاق اياعى (جىلىنشىگىنەن - اۆت.) دەنەسىنەن بۇكىلدەي اجىراعان ناۋقاسقا قايتادان جالعاۋ وتاسىن جاساعان. بۇل ايماقتىق حالىق اۋرۋحاناسىنىڭ ۇزىلگەن اياقتى قايتا جالعاۋ بويىنشا ءساتتى ىسكە اسىرعان تۇڭعىش وتاسى سانالادى. بۇل تۋرالى «اعاجاي-التاي» پورتالى جازادى.

اتالعان اقپارات كوزىنىڭ مالىمەتىنشە، 24- ءساۋىر كۇنى ساعات 13:00 دە التاي ايماقتىق حالىق اۋرۋحاناسى وڭ جاق اياعى دەنەسىنەن جۇلىنىپ قالعان ناۋقاستى قابىلداعان. ناۋقاس ەمحاناعا كەلگەندە جارالانعانىنا ءۇش ساعاتتان اسىپ كەتكەن ەكەن. اۋرۋحانانىڭ تراۆماتولوگيا ءبولىمىنىڭ شيپاگەرى ناۋقاستى قابىلداعاننان كەيىن، دەر كەزىندە لايىقتى شارالار قولدانادى. وتا جاساۋدىڭ الدىنداعى ءتۇرلى دايىندىقتى تەز ارادا ىستەپ، قان قۇيىپ، قانسىراۋدىڭ الدىن العان. سونىمەن بىرگە، شىنجاڭ ولكەلىك ەمحانالارىمەن بايلانىس جاساپ، ۇزدىك ماماننىڭ ءبىرىن كومەككە شاقىرادى. 6 ساعاتقا سوزىلعان وتا ءساتتى اياقتالدى. قازىر ناۋقاستىڭ جاعدايى ءبىر قالىپتى.

التاي ايماقتىق حالىق اۋرۋحاناسى تراۆماتولوگيا ءبولىمىنىڭ باس مامانى شۋ حۋايشيڭ بۇل وتانىڭ الار ورنى ەرەكشە ەكەنىن مالىمدەگەن.

«وسى جولعى وپەراتسيا اۋرۋحاناداعى تراۆماتولوگيا ءبولىمىنىڭ جاڭا تاريحي بەتىن اشتى. بۇل اتالعان ءبولىمنىڭ دامۋىن جوعارى ساتىعا كوتەردى دەپ ەسەپتەيمىز» دەيدى باس مامان شۋ حۋايشيڭ.

يران مەن قازاقستاننىڭ قارىم-قاتىناسى ارتادى - «فارس» اقپارات اگەنتتىگى

يران يسلام كەڭەسى ءماجىلىسى ءتوراعاسىنىڭ حالىقارالىق ىستەر جونىندەگى ارنايى كومەكشىسى تەگەراندا قازاقستان ەلشىسىمەن كەزدەسىپ، ەكى ەلدىڭ دوستىق قارىم-قاتىناسىن كەڭەيتۋدىڭ ماڭىزدىلىعىن قۋاتتادى. بۇل تۋرالى وسى اپتادا Fars اقپارات اگەنتتىگى حابارلادى.

«يران يسلام كەڭەسى ءماجىلىسى ءتوراعاسىنىڭ حالىقارالىق ىستەر جونىندەگى ارنايى كومەكشىسى حوسەين امير ابدوللاحيان تەگەراندا قازاقستان ەلشىسى اسحات ورازبايمەن كەزدەسۋدە ەكى ەلدىڭ ۇلتتىق مۇددەلەرىن قامتاماسىز ەتۋ جولىندا ءارتۇرلى سالالاردا ءوزارا ارىپتەستىك پەن بايلانىستى دامىتىپ، نىعايتۋدىڭ تۇبەگەيلى رولگە يە ەكەنىن مالىمدەدى. ول يران يسلام كەڭەسى ءماجىلىسى قازاقستانمەن ءارتۇرلى سالالاردا، سونىڭ ىشىندە پارلامەنتارالىق بايلانىستىڭ دامىپ، كەڭەيتىلۋىن قولدايتىنىن ايتتى»، دەپ جازدى parstoday.

قازاقستاننىڭ يرانداعى جاڭا ەلشىسى اسحات ورازباي دا وسى كەزدەسۋدە، ەكى ەلدىڭ تىعىز دوستىق قارىم-قاتىناستا ەكەن ايتقان.

«قازاقستان يراننىڭ ءارتۇرلى دەلەگاتسيالارىن قابىلدادى. ەكى ەل اراسىندا ەڭ جوعارى دەڭگەيلەردە كوپتەگەن كەزدەسۋلەر بولدى. مۇنىڭ ءوزى تاراپتار اراسى دوستىق قارىم-قاتىناسقا يە ەكەنىن كورسەتەدى. قازاقستان يرانمەن بايلانىس دەڭگەيىن جوعارىلاتۋدى قولدايدى»، - دەگەن قازاقستاننىڭ يرانداعى ەلشىسى.

تاشكەنتتەن نۇر-سۇلتانعا تۇراقتى تۇردە اۆتوبۋستار قاتىنايدى - «ءوزا» اقپاراتتىق اگەنتتىگى

قازىرگى ۋاقىتتا وزبەكستانداعى «Uzavtotrans Service» كومپانياسى قازاقستاننىڭ ءتورت قالاسىنا تۇراقتى رەيستەردى جولعا قويدى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«اتاپ ايتساق ولار، تاشكەنت - تۇركىستان، تاشكەنت - الماتى، تاشكەنت - ءۇشقوڭىر جانە شىرشىق - ءۇشقوڭىر باعىتتارى. اتالعان باعىتتارعا بارلىق قولايلىقتارعا يە زاماناۋي اۆتوبۋستاردا جەتىپ الۋىڭىزعا بولادى. بيلەت باعاسى دا قولجەتىمدى. مىسالعا، تاشكەنت - تۇركىستان باعىتى بيلەت باعاسى 50 مىڭ سۋم. تاشكەنت - الماتى نەمەسە تاشكەنت - ءۇشقوڭىر باعىتى بيلەت باعاسى 101 مىڭ سۋمدى قۇرايدى. ال شىرشىق - ءۇشقوڭىر باعىتىنان ورىن الساڭىز 90 مىڭ سۋم ەتىپ بەلگىلەنگەن (1 KZT=22,135 UZS - 03.05.2019) » دەپ حابارلايدى وزبەكستاندىق اقپارات كوزى.

وزبەكستان كولىك مينيسترلىگىنىڭ باسپا ءسوز قىزمەتىنىڭ حابارلاۋىنشا، جاقىن ارادا «تاشكەنت - نۇر-سۇلتان»، «تاشكەنت - تاراز»، «سامارقاند - دۋشانبە»، «تاشكەنت - قازان»، «تاشكەنت - ۋفا» سىندى باعىتتارعادا تۇراقتى رەيستى اۆتوبۋستار جولعا قويىلاتىنىن جازادى uza.uz.

بىشكەككە 141 جىل تولدى - TRT

قىرعىزستاننىڭ ءتاڭىرى تاۋلارىنىڭ ەتەگىنە قۇرىلعان باس قالاسىنىڭ 141 جىلدىعى تويلاندى. بۇل تۋرالى تۇركيانىڭ راديو-تەلەۆيزيا مەكەمەسىنىڭ رەسمي سايتى حابارلادى.

«قالانىڭ سوۆەت وداعى كەزىندە فرۋنزە بولعان، ارتىنان قىرعىزستان تاۋەلسىزدىك العاننان كەيىن بىشكەك بولىپ وزگەرتىلگەن اتى تۇركىستاننان قىتايعا سوزىلعان جىبەك جولى بويىندا قىرعىزداردىڭ ءوز جۇرتىنا كەلۋىن قامداعان ءبىر قىرعىز باتىرىنىڭ ەسىمىنەن الىنعان»، - دەپ جازادى باسىلىم.

قالانىڭ مەرەيتويىنا بايلانىستى قالادا ەكى كۇن بويى ءتۇرلى كونسەرتتەر، ءبي قويىلىمدارى، كورمە مەن سپورتتىق جارىستار ۇيىمداستىرىلعان.

«قالانىڭ ورتالىق الاڭى الاتاۋدا ۇلكەن كونتسەرت بەرىلىپ، بىشكەك قالالىق سيمفونيا وركەسترىنىڭ ونەرى ساحنالاندى. كونسەرتكە بىشكەك قالاسىنىڭ اكىمى ءازيز سۋراكماتوۆ، قالالىق ءماجىلىستىڭ مۇشەلەرى، قالا تۇرعىندارى قاتىستى. وزبەكستاننىڭ اتاقتى ءانشىسى فارۋك زاكيروۆ پەن رەسەيدىڭ اتاقتى ءانشىسى سوگديانا دا ساحناعا شىقتى»، دەلىنگەن اقپاراتتا.

اۆتور: بەيسەن سۇلتان