ستۋدەنتتەر جوعارى شاكىرتاقىنى قانداي جاعدايدا الادى؟

نۇر-سۇلتان. قازاقپارات - ق ر ءبىلىم جانە عىلىم ءمينيسترى كۇلاش ءشامشيدينوۆا ستۋدەنتتەردىڭ شاكىرتاقىسىن كوتەرۋ جوسپارى تۋرالى ايتتى، دەپ حابارلايدى قازاقپارات ءتىلشىسى.

«شاكىرتاقىنى 30 پايىزعا دەيىن كوتەرۋ الەۋمەتتىك تاپسىرىستى ورىنداۋ ارقىلى جۇرگىزىلۋدە. بۇل تۇرعىدا ۆولونتەرلىك قوزعالىسقا قاتىستى بولىپ تۇر، ياعني رەپەتيتورلىقتا كومەك كورسەتەتىن، قارتتار ۇيلەرىندە، بالالارمەن جۇمىس ىستەيتىن، سونداي-اق باسقا دا سالالاردا ارەكەت ەتەتىن ستۋدەنتتەر قامتىلماق»، - دەدى مينيستر ەلورداداعى كوپبالالى انالارمەن كەزدەسۋ بارىسىندا.

سونىمەن قاتار، ۆەدومستۆو باسشىسى وقۋ باعدارلامالارىن وزەكتىلەندىرۋ تاقىرىبىنا توقتالدى.

«قازىرگى كەزدە ءبىرىنشى كەزەكتە ІТ- سالاسىنا، روبوتوتەحنيكا، بالالاردىڭ فۋنتسيونالدىق ساۋاتتىلىعىنا ەكپىن قويىلىپ وتىر. اتاپ ايتقاندا، بالانىڭ ءوز ءبىلىمىن جۇمىسىندا پايدالانا ءبىلۋى ماڭىزدى. ال كاسىبي-تەحنيكالىق وقۋ ورىندارى مەن ج و و- لاردا وقۋ باعدارلامالارىن وزەكتىلەندىرۋ - ول ەڭبەك نارىعىنىڭ تالابى»، - دەدى ك. ءشامشيدينوۆا.

بۇل تۇرعىدا بيىلدان باستاپ زاڭناما بويىنشا ج و و- لاردا باكالاۆرياتتىڭ 80 پايىزىنا دەيىن، ماگيستراتۋرانىڭ 90 پايىزعا دەيىن جانە دوكتورانتۋرانىڭ 95 پايىزىنا دەيىن دەربەس وزدەرىنىڭ وقۋ باعدارلامالارىن قايتا قاراي الادى.

«ال كوللەدجدەرگە قاتىستى ءبىز وسى جۇمىستاردى قازىرگى كەزدە اتقارۋدامىز. وسى ورايدا باستى ماقسات - ول دۋالدى وقىتۋ، ياعني كاسىپكەرلەردى ءبىزدىڭ وقۋ باعدارلامالارىنا كوبىرەك تارتۋ»، - دەدى مينيستر.

ەستەرىڭىزگە ساتا كەتەيىك، جىل باسىندا ەلباسى نۇرسۇلتان نازاربايەۆ ۇكىمەتكە ۆولونتەرلىكپەن اينالىساتىن ج و و ستۋدەنتتەرىنىڭ شاكىرتاقىسىن 30 پايىزعا ارتتىرۋدى تاپسىردى.