شەتەلدەردەن كەلىپ، وقىپ جاتقان قازاق ستۋدەنت جاستارىمەن كەزدەسۋ ءوتتى

  استانا. قازاقپارات - وتانداستار قورى مەن دۇنيەجۇزىلىك قازاقتار قاۋىمداستىعىنىڭ ۇيىمداستىرۋمەن ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە شەتەلدەردەن كەلىپ، وقىپ جاتقان قازاق دياسپوراسىنىڭ ستۋدەنت جاستارىمەن كەزدەسۋ ءوتتى.

موڭعوليا، قىتاي، وزبەكستان جانە باسقا دا شەت ەلدەردەن كەلگەن قازاق دياسپوراسىنىڭ ستۋدەنت جاستارى ىقتيار حات، ازاماتتىق الۋ، وقۋعا ءتۇسۋ مۇمكىندىكتەرى، مەملەكەتتىك كۆوتالاردى پايدالانۋى جانە تاعى دا باسقا ماسەلەلەردى ورتاعا سالدى.

قازاقستاندا دايىندىق كۋرستارى، باكالاۆريات جانە ماگيستراتۋرادا وقىپ جۇرگەن شەت ەلدەردەن كەلگەن قازاق دياسپوراسىنىڭ جاستارى قازاقستان رەسپۋبليكاسىنىڭ ازاماتتىعىن الىپ، ەلىمىزدىڭ ءوسىپ وركەندەۋىنە وزىندىك ۇلەسىن قوسۋعا دايىن ەكەندىگىن جەتكىزدى. بۇگىنگى كۇنى قازاقستاندا شەت ەلدەردەن كەلىپ، 18 جوعارى وقۋ ورىندارىندا 992 قازاق دياسپوراسىنىڭ جاستارى دايارلىق كۋرستارىندا وقىپ جاتىر.

 كەزدەسۋ بارىسىندا ورالمان مارتەبەسىن جانە ازاماتتىق الۋعا قاجەت قۇجاتتاردى جيناۋدا تۋىندايتىن ماسەلەلەر كەڭىنەن تالقىلانىپ، ولاردىڭ شەشۋ جولدارى قاراستىرىلدى. سونداي اق، مەملەكەتتىك قىزمەتتەردى الۋ ءۇشىن سۇراتىلاتىن قۇجاتتاردىڭ بەكىتىلگەن تىزىمىنە وزگەرىستەر ەنگىزۋ، ستۋدەنتتەردىڭ تۇراقتى مەكەن جاي بويىنشا تىركەلۋى، ازامماتتىق الۋعا جەڭىلدەتىلگەن تارتىپپەن قۇجات تاپسىرۋ جانە تاعى دا باسقا سۇراقتار كوتەرىلىپ، ءتيىستى سالا ماماندارىنىڭ جاۋاپتارى بەرىلدى.

 كەزدەسۋگە ق ر ىشكى ىستەر مينيسترلىگى كوشى- قون كوميتەتىنىڭ ەرەكشە تاپسىرمالار جونىندەگى اعا ينسپەكتور گۇلميرا ءاليايدار قىزى، ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى- قون پروتسەستەرىن مونيتورينگىلەۋ باسقارماسىنىڭ باسشىسى ايتقۇلوۆ داستان، ق ر ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ وكىلى زايلاشوۆا گۇلدانا، ق ر سىرتقى ىستەر مينيسترلىگى كونسۋلدىق قىزمەت دەپارتامەنتى كورسەتىلگەن مەملەكەتتىك قىزمەتتەردىڭ ساپاسىنا باقىلاۋ مەن مونيتورينگ جۇرگىزۋ جانە ساراپتاۋ باسقارماسىنىڭ باسشىسى كۇزەتبايەۆ مارعۇلان، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك ۇلى، «حالىقارالىق باعدارلامالار ورتالىعى» ا ق، وتانداستار قورى مەن دۇنيەجۇزىلىك قازاقتار قاۋىمداستىعىنىڭ وكىلدەرى قاتىستى.

جاستاردىڭ ورتاعا سالعان بارلىق سۇراقتارىنا قاتىستى مۇددەلى مەملەكەتتىك ورگاندار مەن ۇيىمدار ماماندارى تاراپىنان تۇشىمدى جاۋاپتار بەرىلىپ، وسىنداي باس قوسۋلاردى ءجيى وتكىزۋگە ۋاعدالاستى.

egemen.kz