الاش قايراتكەرلەرىنە قاتىستى قۇپيا ماتەريالدار كورمەگە شىعارىلدى

نۇر- سۇلتان. قازاقپارات - ق ر ىشكى ىستەر مينيسترلىگىنىڭ مۇراجايىندا «تاريحقا تاعىلىم - وتكەنگە تاعزىم» تاقىرىبىندا كورمە اشىلدى. الايدا وعان سىرتتان كەز كەلگەن ادام كىرە المايدى. سەبەبى كورمەگە قۇپيا قۇجاتتار دا شىعارىلىپ وتىر، دەپ حابارلايدى قازاقپارات ءتىلشىسى.

 قۇپيا قۇجاتتاردىڭ بارلىعى - قىلمىستىق ىستەر. سونىڭ ىشىندە رەپرەسسياعا ۇشىراعاندار، اقتالعاندار، اقتاۋعا جاتپايتىندار، اسكەري تۇتقىن بولعاندار مەن قازاقستانعا جەر اۋدارعانداردىڭ ماتەريالدارى بار. ال ساكەن سەيفۋللين، احمەت بايتۇرسىنوۆ، وراز جاندوسوۆ پەن بەيمبەت مايلين سىندى الاش ارىستارىنىڭ قىلمىستىق ىستەرىن بولەك ستەندتەن كورۋگە بولادى. احمەت بايتۇرسىنوۆتىڭ جەكە پاپكىسىمەن بىرگە ءوز قولىمەن جازعان دايەكتەر دە بار. ءاربىر پاپكىگە الاش ارىستارىنىڭ ءومىربايانى جازىلعان قاعازدى قىستىرىپ قويدى. باسقا مالىمەتتەردىڭ ءبارى - قۇپيا. پاپكىلەردى قولمەن ۇستاۋعا رۇقسات جوق. ءىشىن اشىپ قاراۋعا دا بولمايدى.

 «بۇل جولى ءبىز تانىستىرۋعا بولادى دەگەن پاراقتاردى كورسەتىپ وتىرمىز. ال قىلمىستىق ىستەردىڭ ىشىندە كۋاگەرلەر، تەرگەۋ ماتەريالدارى جانە تاعى باسقا مالىمەتتەر بار. ول جەردە ادامداردىڭ فاميليالارى دا كورسەتىلگەن. سول سەبەپتى ونداي مالىمەتتەردى كورسەتۋگە بولمايدى. نەگىزى، بۇگىندە ءبىز رەسپۋبليكا بويىنشا سكانەرلەردى ساتىپ الىپ جاتىرمىز. ويتكەنى ءبىزدىڭ مۇراعاتىمىزدا جاتقان ماتەريالداردىڭ بارلىعى قاعاز نۇسقاسىندا ساقتالعان. سول سەبەپتى ىشكى ىستەر ورگاندارىنىڭ مۇراعاتىندا جاتقان قىلمىستىق ىستەردى ەلەكتروندى نۇسقاعا كوشىرۋىمىز كەرەك. ال بۇگىنگى كورمەگە شىعارىلعان قۇپيا قۇجاتتاردى سكانەردەن وتكىزۋ ءۇشىن الدىمەن رۇقسات الۋىمىز قاجەت. ونداي رۇقسات ءالى جوق»، - دەدى ق ر ءى ءى م ارنايى مەملەكەتتىك مۇراعاتىنىڭ باس مامانى داريا ءالي قىزى قازاقپارات تىلشىسىنە بەرگەن سۇحباتىندا.

ونىڭ ايتۋىنشا، ىشكى ىستەر ورگاندارىنىڭ ارنايى مەملەكەتتىك مۇراعاتتارىندا الاش پارتياسىنا قاتىستى 138 قىلمىستىق ءىس بار.

 جالپى، رەسپۋبليكا بويىنشا ساياسي قۋعىن- سۇرگىنگە ۇشىراعاندارعا قاتىستى قىلمىستىق ىستەردىڭ سانى 140 مىڭنان اسادى. سونىڭ ىشىندە 14 مىڭعا جۋىعى - اقتالماعانداردىڭ ماتەريالدارى. قىلمىستىق ىستەردىڭ باسىم بولىگى الماتى قالاسى، قاراعاندى مەن شىعىس قازاقستان وبلىستارىنىڭ پوليتسيا دەپارتامەنتتەرىندە ساقتالعان.

ورتالىق اپپاراتتا اشىلعان كورمەگە كەز كەلگەن ادام كىرە المايدى. قۇپيا قۇجاتتاردى كورۋ ءۇشىن ءمينيستردىڭ اتىنا، ءيا بولماسا، كادرلىق قىزمەتكە رەسمي حات جازۋ كەرەك. سودان كەيىن ۇجىممەن كەلىپ، كورمەنى ارالاپ كورۋگە بولادى.

«بۇل كورمە ىشكى ىستەر مينيسترلىگىندە العاش رەت ۇيىمداستىرىلىپ وتىر. نەگىزى، رەسپۋبليكا بويىنشا ارنايى مەملەكەتتىك مۇراعاتتاردا جىل سايىن 31 - مامىر - ساياسي قۋعىن- سۇرگىن قۇرباندارىن ەسكە الۋ كۇنىنە وراي كورمەلەر ءوتىپ تۇرادى. بيىل ءبىز وسى كورمەنى ورتالىق اپپاراتتا ۇيىمداستىرۋدى ءجون كوردىك. قالالىق مەكتەپ وقۋشىلارى، كوللەدج بەن جوعارى وقۋ ورىندارى ستۋدەنتتەرى، جالپى، تاريحقا قىزىعۋشىلىعى بار ادامدار كەلىپ، كورمەگە شىعارىلعان قۇجاتتاردى كورە الادى. ءبىراق الدىمەن رەسمي حات جازىپ، رۇقسات الۋ قاجەت»، - دەيدى مينيسترلىك ماماندارى.

كورمە مامىردىڭ 31-ىنە دەيىن جالعاسادى.

اۆتور: ارمان اسقاروۆ