قازاقستاندا ەڭ جوعارى جالاقىنى قاي ءوڭىر الادى؟
وڭىرلەر اراسىندا ەڭ جوعارى جالاقى اتىراۋ وبلىسىندا تىركەلىپ وتىر. وسى جىلدىڭ ءبىرىنشى توقسانىندا قازاقستاندا ءبىر قىزمەتكەردىڭ ورتاشا ايلىق اتاۋلى جالاقىسى 168489 تەڭگەنى قۇراعان.
قازاقستان ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنشە، بيىلعى جىلدىڭ I توقسانىندا ءبىر قىزمەتكەردىڭ ورتاشا ايلىق اتاۋلى جالاقىسى 168489 تەڭگە بولعان.
سالالىق قۇرىلىمدا ەڭ جوعارى اتاۋلى جالاقىنى كەن ءوندىرۋ ونەركاسىبى جانە كارەرلەردى قازۋمەن اينالىساتىن جۇمىسشىلار الادى - 401,1 مىڭ تەڭگە. بۇل ورتاشا رەسپۋبليكالىق دەڭگەيدەن 2,4 ەسەگە جوعارى.
ودان كەيىنگى ورىندا قارجى جانە ساقتاندىرۋ قىزمەتى - 323 مىڭ تەڭگە، كاسىبي، عىلىمي جانە تەحنيكالىق قىزمەتتە - 296,3 مىڭ تەڭگە، اقپارات جانە بايلانىس سالاسىندا - 253,0 مىڭ تەڭگە، كولىك سالاسىندا - 218,2 مىڭ تەڭگە.
ال ەڭ تومەنگى اتاۋلى جالاقى اۋىل، ورمان جانە بالىق شارۋاشىلىعىندا تىركەلىپ وتىر - 93,2 مىڭ تەڭگە. بۇل رەسپۋبليكا بويىنشا ورتاشا كورسەتكىشتەن %44,7 كە تومەن.
وڭىرلەر اراسىندا ەڭ جوعارعى جالاقى اتىراۋ وبلىسىندا بەلگىلەندى - 322,7 مىڭ تەڭگە، ياعني ورتاشا رەسپۋبليكالىق كورسەتكىشتەن شامامەن 1,9 ەسەگە جوعارى. ەڭ تومەنگى جالاقى تۇركىستان وبلىسىندا ەكەن، 109,0 مىڭ تەڭگەنى قۇراعان.