استانالىق ارداگەرلەرگە بەس ءجۇز مىڭ تەڭگەدەن بەرىلەدى
«9- مامىر قارساڭىندا ەلوردالىق 71 ارداگەرگە 519 مىڭ تەڭگە كولەمىندە سىياقى بەرىلەدى. بۇعان قوسا، جەڭىلدىكتەر مەن كەپىلدىكتەر بويىنشا سوعىسقا قاتىسۋشىلارعا تەڭەستىرىلگەن 332 ادامعا 9 ا ە ك، ياعني 22725 تەڭگە، ال 2817 تىل ارداگەرىنە كومەك رەتىندە 4,5 ا ە ك (11363 تەڭگە) تابىستالادى»، - دەدى جۇمىسپەن قامتۋ جانە الەۋمەتتىك قورعاۋ باسقارماسىنىڭ مۇگەدەكتەرمەن جانە ارداگەرلەرمەن جۇمىس ءبولىمىنىڭ باسشىسى گۇلزادا جەكەبايەۆا.
سونىمەن قاتار، ەكىنشى دۇنيەجۇزىلىك سوعىس ارداگەرلەرىنە مەرزىمدى باسىلىمدارعا جازىلۋ، مونشاعا، شاشتارازعا بارۋ جانە ساناتوريالىق-كۋرورتتىق ەمدەلۋ ءۇشىن الەۋمەتتىك كومەك كورسەتىلەدى. ال قالالىق اۆتوبۋستاردا ارنايى جەڭىلدىكتەر قاراستىرىلسا، ءتىس پروتەزدەۋ تەگىن جۇرگىزىلەدى. قازىرگى كۇنى ۇ و س قاتىسۋشىلارىنا تەڭەستىرىلگەندەر سانى 2900 ادام. ياعني، ولاردىڭ باسىم بولىگى - سوعىس كەزىندە جەسىر قالعان نەمەسە تۋعانىنان ايىرىلعان جاندار.
جەڭىستىڭ 74 جىلدىعى قارساڭىندا باس قالامىزدا ۇ و س مۇگەدەكتەرى، قاتىسۋشىلارى جانە ولارعا تەڭەستىرىلگەن تۇلعالار ءۇشىن «بەلسەندى ارداگەر» ايلىعى باستالدى، ول وسى جىلدىڭ 29- ءساۋىرى مەن 29- مامىرى ارالىعىندا جالعاسادى.
قوعامدىق دەنساۋلىق ساقتاۋ باسقارماسىنىڭ باسشىسى مارات شورانوۆ ايلىق اياسىندا دياگنوستيكالىق زەرتتەۋلەر، ەمدەۋ-ساۋىقتىرۋ ءىس-شارالارى، تەراپيەۆت، گاستروەنتەرولوگ، كارديولوگ، ۋرولوگ ماماندارىنىڭ قابىلداۋى، ە ك گ، ۋلترادىبىستىق زەرتتەۋ تەگىن جۇرگىزىلەتىنىن ءتۇسىندىرىپ بەردى.
«قازىرگى ۋاقىتتا بارلىق مەديتسينالىق ۇيىم ارداگەرلەردى نازاردا ۇستاپ، ساۋىقتىرۋ ءىس-شارالارىن ۇيىنە بارىپ وتكىزەدى. بۇل بىزدە تۇراقتى تۇردە قولعا الىنىپ كەلە جاتقان ىستەردىڭ ءبىرى»، - دەدى مارات شورانوۆ.