ەلوردادا بەينەباقىلاۋ كامەراسى ۆەلوسيپەد ۇرىسىن ۇستاۋعا كومەكتەستى

None
None
نۇر-سۇلتان. قازاقپارات - ەلوردادا جىل باسىنان بەرى 40 تان استام ۆەلوسيپەد ۇرلانىپ، ونىڭ 19 ى تابىلدى، دەپ حابارلايدى قازاقپارات قالالىق پوليتسيا دەپارتامەنتىنە سىلتەمە جاساپ.

ۆەلوسيپەدتەر كوبىنەسە ءۇي كىرەبەرىسىندە جانە قوعامدىق ورىنداردا قولدى بولادى.

«26 -ساۋىردە نۇر-سۇلتان قالاسىنىڭ جانار-جاعار ماي ستانسياسى ماڭىنان ۆەلوسيپەد ۇرلانعانى تۋرالى اقپارات ءتۇستى. جەدەل باسقارۋ ورتالىعىنىڭ ينسپەكتورى بەينەباقىلاۋ كامەراسىمەن كۇدىكتىنى انىقتاپ، سول جەرگە «تالاس-51» پوليتسيا پاترۋلىن جىبەردى. كۇدىكتى ازامات ۇستالىپ، «الماتى» اۋدانىنىڭ پوليتسيا باسقارماسىنا جەتكىزىلدى. ۆەلوسيپەد يەسىنە قايتارىلدى. تەرگەۋ جۇمىستارى باستالدى جانە ۇستالعان ادامنىڭ باسقا دا قىلمىستارعا قاتىسى بار-جوعى تەكسەرىلۋدە»، - دەپ حابارلادى دەپارتامەنتتىڭ باسپا ءسوز قىزمەتى.

دەپارتامەنت قالا تۇرعىندارىنا ۆەلوسيپەدتى ارنايى قوندىرعىمەن بەكىتىپ قويۋعا كەڭەس بەرەدى.

«ۆەلوسيپەد مىنەتىن قالا تۇرعىندارى مەن قوناقتارى ارتىپ كەلەدى. سونىمەن بىرگە، وسى كولىك ءتۇرىن ۇرلاۋعا بەيىمدەلگەندەر دە جەتەرلىك. ازاماتتار ءوز مۇلكىنىڭ ساقتالۋىنا ءجىتى نازار اۋدارعانى ءجون، ونى ارنايى قوندىرعىمەن بەكىتىپ قويعان ابزال. جالپى، جىل باسىنان بەرى 40 تان استام ۆەلوسيپەد ۇرلانىپ، ونىڭ 19 ى تابىلدى»، - دەلىنگەن حابارلامادا.

 

سوڭعى جاڭالىقتار