قازاق قىزدارىنا حيدجاب كيۋ پارىز با؟
قالاي دەسەك تە، ءبىرىنشى رەت كورىپ تۇرعان ادامنىڭ سەن جايلى العاشقى پىكىرى سىرتقى كەلبەتىڭە وراي تۋىندايتىنى ءسوزسىز. ويتكەنى، ادامنىڭ كيىم كيىسى - ونىڭ ىشكى الەمىنىڭ ايناسى.
سونىمەن قاتار، ءاربىر كيىمنىڭ كيەتىن ورنى بار. جالپى، كيىم كيۋ ءۇردىسىنىڭ تەك ءسان ەمەس، تاربيە قۇرالى، بەلگىلى ماقساتتى جۇزەگە اسىرۋدىڭ ءتيىمدى تەتىگى ەكەنىن اڭعارۋ قيىن ەمەس. ولاي بولسا، ەلىمىزدە سوڭعى كەزدە قوعامدىق پىكىر كورىگىن قىزدىرىپ تۇرعان «حيدجاب» كيۋ ماسەلەسىنە بەي-جاي قاراماۋ قاجەت. ويتكەنى، باسقاسىن بىلاي قويعاندا، وسى جاي قالىڭ قاۋىمدى ەكىگە جارىپ، ەلدىڭ ىمىرا-بىرلىگىنە قاۋىپ ءتوندىرىپ وتىر. اتام قازاق قاشان دا ۇرپاق تاربيەسىنە بەي- جاي قاراماعان. سونىڭ ىشىندە قىز بالاعا بولاشاق كەلىن، اياۋلى جار، اسىل انا دەپ ءتالىم- تاربيە بەرگەن.
«ۇكىلى كامشات، بۇرمەلى كويلەك»، «يىقتان شاشى قوس ءورىم بوپ جەرگە توگىلگەن»، «اشىق ماڭداي، قيعاش قاس، بوتاداي مولدىرەگەن كوز، ويماق اۋىز، قىپشا بەل»، - دەپ كەزىندە اقىن اعالارىمىز جىرعا قوسقان قازاق ارۋلارى قازىر سول بەينەنى جوعالتىپ الىپ جۇرگەن جوق پا؟
حيدجاب («قالقان»، «شىمىلدىق») - اقپارات كوزدەرىنە سۇيەنسەك، بۇل مۇسىلمان ايەلدەرىنىڭ كوشەگە شىققاندا دەنەسىن جاسىرۋ ءۇشىن كيەتىن كيىمى. «جەلبەگەي، جامىلعى» دەگەندى بىلدىرەدى. ءبىراق كەي دەرەكتەردە ول اراب ەلىنىڭ ۇلتتىق ناقىشتى كيىمى دەلىنگەن. سوندا اراب ەلىنىڭ مادەنيەتىن نەگە قازاق قىزدارى ۇستانۋى ءتيىس؟ نەگە قازاقتىڭ قارا دومالاق قىزدارى بوگدە ەلدىڭ ۇلتتىق كيىمىن كيۋگە مىندەتتى. قازاقتىڭ كەرەمەتتەي ەتەگى جەلبىرەگەن قازاق كويلەكتەرى مەن ساۋكەلەسى يسلام وركەنيەتىنە قايشى كەلگەنى مە؟ «قازاق حالقىنىڭ تاريحىندا، ءبىزدىڭ دىنىمىزدە ەشۋاقىتتا مۇنداي ءداستۇر بولعان ەمەس. شىن ءدىندى، وعان تاڭىلعان باسقا دىننەن اجىراتا ءبىلۋىمىز كەرەك».
woman.bugin.kz