سولتۇستىك قازاقستانعا وڭتۇستىكتەن قونىس اۋدارعاندار كوتتەدجدەرگە ورنالاستىرىلادى

پەتروپاۆل. قازاقپارات - سولتۇستىك قازاقستان وبلىسىنا وڭتۇستىك وڭىردەن قونىس اۋدارعان وتباسىلارعا كوتتەدجدەر بەرىلەدى، دەپ حابارلايدى قازاقپارات ءتىلشىسى.

قىزىلجار وڭىرىندە قازاقستاننىڭ وڭتۇستىگىنەن كوشىپ كەلگەندەرگە بار جاعداي جاسالىپ جاتىر. مەملەكەتتەن دەمەۋقارجى بەرىلسە، جەرگىلىكتى اكىمدىكتەر قونىس اۋدارعاندارعا كومەك بەرمەك.

وبلىس اكىمى باسپا ءسوز قىزمەتىنىڭ حابارلاۋىنشا، قازىر وبلىسقا كوشىپ كەلۋشىلەرگە كوتتەدجدەر سالىنىپ جاتىر. بارلىعى 3 مىڭ باسپانا تۇرعىزىلۋدا. ءال-اۋقاتى جوعارى 150 اۋىل بەكىتىلدى. الايدا بۇل ءۇي بارلىعىنا بىردەي بەرىلمەيدى.

«كوشىپ كەلۋشىلەرگە بىرنەشە تالاپ قويامىز. ءار وتباسىدا ەڭ كەمى 3-4 بالا بولۋ قاجەت. سۇرانىسقا يە ماماندار كەرەك. اگرونوم، مۇعالىم، تراكتورشى، كومباينشى، دارىگەرگە تۇراقتى جۇمىس بەرىلەدى. بالالارعا مەكتەپ پەن بالاباقشادان ورىن ءازىر. وسى تالاپتارعا ساي بولسا، وتباسىعا سۋ جاڭا كوتتەدجدىڭ كىلتىن تابىس ەتەمىز»، - دەدى قۇمار اقساقالوۆ ب ا ق وكىلدەرىنە بەرگەن سۇحباتىندا.

سونداي-اق، باسقا مەملەكەتتىك باعدارلامالارمەن كوشىپ كەلسە، ولارعا قوسىمشا اقى تولەنبەك. ەگەر وتباسى باسقا ءۇيدى ساتىپ السا نەمەسە جالداسا، مەملەكەت 600 مىڭ تەڭگە شىعىندى قايتارادى. وعان قوسا، ءار وتباسىعا دەمەۋقارجى تولەنەدى. مىسالى، 5 ادامنان تۇراتىن وتباسى 450 مىڭ تەڭگە سۋبسيديا الادى.

سولتۇستىككە وڭتۇستىك وبلىستاردان سوڭعى جىلدارى 3 مىڭ ادام كوشىپ كەلگەن. بۇل - 700 وتباسى. بيىلدىڭ وزىندە 1,5 مىڭ ادام قابىلدانباقشى.