فرانسيادا تولقىن جۇزدەگەن دەلفين ولىمتىگىن جاعالاۋعا شىعاردى
«دەلفين تۇمشالارىنىڭ شامامەن 85 پايىزى ابايسىزدا بالىقشىلاردىڭ تورىنا ءتۇسىپ، مەرت بولعان. راسىندا، ولىمتىكتەردىڭ ناقتى سانى تولقىنمەن جاعاعا شىققاندارىنان ءتورت ەسە كوپ بولۋى مۇمكىن دەپ جورامالداپ وتىرمىز» ، - دەيدى PELAGIS تابيعاتتى قورعاۋ ۇيىمىنىڭ ەكولوگى وليۆە ۆان كاننەيت (Olivier van Canneyt) . سوڭعى جىلدارى كيت، دەلفين سەكىلدى سۋ جانۋارلارى بالىقشىلاردىڭ تورىنا ءتۇسىپ، مەرت بولۋ جاعدايى ءجيى كەزدەسىپ جاتىر. ماسەلەن، وسىدان ءتورت جىل بۇرىن كوكتەمدە چيلي جاعالاۋلارىنان سۋ جانۋارلارىنىڭ ولىمتىگى تابىلىپ، قىسقا قاراي ولاردىڭ جالپى سانى 337 گە جەتكەن.
ۆان كاننەيتتىڭ ايتۋىنشا، بۇل جولعى اپات فرانسيا ءۇشىن سوڭعى جىلدارداعى رەكوردتىق كورسەتكىش. ەكولوگتار بالىقشىلاردى دەلفيندەردى ۇركىتەتىن ارناۋلى بۋيلاردى ورناتۋعا شاقىرىپ جاتىر.
عالىمدار، قولدانىلىپ جاتقان شارالارعا قاراماستان دەلفيندەردىڭ قىرىلۋى توقتاماسا، اتلانت مۇحيتىنىڭ سولتۇستىگىندە ولاردىڭ سانى كۇرت قىسقاراتىن كۇندەر جاقىن ەكەنىن ايتىپ، دابىل قاعۋدا.