موڭعوليالىقتار قازاقستاننىڭ الەۋمەتتىك قامتۋ تاجىريبەسىنە قىزىعىپ وتىر

 نۇر- سۇلتان. قازاقپارات - قازاقستانعا جۇمىس ساپارىمەن كەلگەن موڭعوليانىڭ ەڭبەك، الەۋمەتتىك قورعاۋ مينيسترلىگى جانە الەۋمەتتىك ساقتاندىرۋ باس اگەنتتىگى وكىلدەرى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فرونت جانە بەك- وفيستەرىنىڭ جۇمىسىمەن تانىستى.

بۇل تۋرالى كورپوراتسيانىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

شارا بارىسىندا مەملەكەتتىك كورپوراتسيانىڭ الەۋمەتتىك تولەمدەر مونيتورينگى جانە ءادىسناما دەپارتامەنتىنىڭ ديرەكتورى سەرىكقان سابىرجانوۆ موڭعوليالىق ارىپتەستەرىنە زەينەتاقى تاعايىنداۋ ءۇشىن قۇجاتتاردى قابىلداۋ جانە ءارى قاراي شەشىم قابىلداۋ ءۇشىن ۋاكىلەتتى ورگانعا ەلەكتروندى قۇجاتتاردى جىبەرۋ پروتسەسىن كورسەتتى. سونداي- اق، بالا تۋىلۋى جانە كۇتىمى بويىنشا جاردەماقىلاردى پرواكتيۆتى ادىسپەن راسىمدەۋ ۇدەرىسى دە دەلەگاتسيا مۇشەلەرىنىڭ قىزىعۋشىلىعىن تۋعىزدى. ايتا كەتۋ كەرەك، قازاقستان ت م د ەلدەرى اراسىندا ءبىرىنشى بولىپ بالا تۋۋىنا بايلانىستى مەملەكەتتىك قىزمەت كورسەتۋدىڭ پرواكتيۆتى ءتاسىلىن ەنگىزگەن بولاتىن.

سونىمەن قاتار، شەتەلدىك قوناقتار egov.kz ەلەكتروندىق ۇكىمەت پورتالىنىڭ جۇمىسىمەن تانىستى. موڭعوليالىقتارعا تەلەگرام- بوت مەسسەندجەرى جانە mGov ءموبيلدى قوسىمشاسى ارقىلى مەملەكەتتىك قىزمەتتەردى الۋ بويىنشا جاڭا سەرۆيستەر تانىستىرىلىپ، تەلەگرام- بوت (EgovKzBot) ارقىلى ءبىر مينۋت ىشىندە زەينەتاقى جيناقتارى تۋرالى انىقتاما الۋ جولدارى كورسەتىلدى.

شەتەلدىك ارىپتەستەر مەملەكەتتىك كورپوراتسيانىڭ جۇمىسىن جوعارى باعالاپ، الەۋمەتتىك سالا بويىنشا قىزمەتتەردىڭ بارلىق ازاماتتارعا بىردەي قولجەتىمدىلىگىنە ەرەكشە ءمان بەردى. ولاردىڭ ايتۋىنشا، موڭعوليادا زەينەتاقى تولەمدەرىنە ءوتىنىشتى ۇلكەن قالالاردا قازاقستانداعىداي حالىققا قىزمەت كورسەتۋ ورتالىعىنا ۇقساس مەكەمەلەردە، ال اۋدان ورتالىقتارى مەن ەلدى مەكەندەردە جەرگىلىكتى اتقارۋشى ورگانداردا راسىمدەيدى. زەينەتاقى راسىمدەۋگە ءوتىنىش بەرۋ ءۇشىن قۇجات جيناۋ دا بىرنەشە كەزەڭنەن تۇرادى.

موڭعوليانىڭ ەڭبەك جانە الەۋمەتتىك قورعاۋ مينيسترلىگىنىڭ دەپارتامەنت ديرەكتورى باسان باتجارگال مەملەكەتتىك قىزمەتتەردى ءبىر جەردەن، ءبىر ءوتىنىش ارقىلى الۋعا بولاتىن وسىنداي ورتالىقتاردى ءوز ەلدەرىندە اشۋعا مۇددەلى ەكەنىن جەتكىزدى جانە ورتالىقتاردىڭ جۇمىسى ءساتتى ءجۇرىپ كەتكەن جاعدايدا ەلەكتروندىق ۇكىمەت پورتالىن قۇرۋ تۋرالى جوسپارلاۋعا بولاتىنىن ايتتى.

ايتا كەتەيىك، مەملەكەتتىك كورپوراتسيا مۇمكىندىگى شەكتەۋلى ازاماتتاردىڭ ساپالى قىزمەت الۋىنا ەرەكشە نازار اۋدارادى. بۇگىنگى تاڭدا ازاماتتارعا ارنالعان ۇكىمەتتىڭ بارلىق فرونت- وفيستەرى پاندۋستارمەن، شاقىرۋ كنوپكالارىمەن، برايل تاقتايشالارىمەن جانە مۇگەدەكتەرگە قىزمەت كورسەتەتىن جەڭىلدىك تەرەزەلەرىمەن جابدىقتالعان. فرونت- كەڭسەلەردىڭ عيماراتتارى الدىندا مۇمكىندىگى شەكتەۋلى ازاماتتارعا ارنالعان جەكە تۇراق ورىندارى دا ۇيىمداستىرىلعان.

سونىمەن قاتار، I جانە II توپتاعى مۇگەدەكتەر 1414 بايلانىس ورتالىعىنا ءوتىنىش بەرە وتىرىپ، مەملەكەتتىك قىزمەتتەردى ءۇي جاعدايىندا الا الادى (قوڭىراۋ شالۋ تەگىن) . ال اسىراۋىندا مۇگەدەك بالالارى بار اتا- انالاردىڭ 1411 نومىرىنە حپبارلاسىپ، پسيحولوگتىڭ ونلاين- كەڭەسىنە الدىن الا جازىلىپ قويۋعا مۇمكىندىگى بار.

ودان بولەك 1411 بايلانىس ورتالىعى ارقىلى قازاقستاندىقتار زەينەتاقى مەن جاردەماقى تاعايىنداۋعا قاتىستى بارلىق ماسەلەلەر بويىنشا تەگىن كەڭەس الا الادى. جىل باسىنان بەرى ورتالىق قىزمەتكەرلەرى 130 مىڭنان استام كەڭەس بەردى.