پرەزيدەنتتىككە ۇمىتكەر رەتىندە «ۇلت تاعدىرى» قوزعالىسى ءامىرجان قوسانوۆتى ۇسىندى
بۇل تۋرالى بۇگىن «ۇلت تاعدىرى» قوزعالىسىنىڭ الماتىدا وتكەن قۇرىلتايىندا بەلگىلى بولدى، دەپ حابارلايدى قازاقپارات ءتىلشىسى.
وتىرىسقا وبلىستاردان دەلەگاتتار جينالعان. كۇن تارتىبىندە كەزەكتەن تىس پرەزيدەنت سايلاۋىنا كانديدات ۇسىنۋ جايى قارالدى.
ءامىرجان قوسانوۆ - بەلگىلى وپپوزيتسيالىق ساياساتكەر. 9-ساۋىردە ق. توقايەۆ كەزەكتەن تىس پرەزيدەنت سايلاۋىن جاريالاعالى بەرى الەۋمەتتىك جەلى قولدانۋشىلارى قوسانوۆتى سايلاۋعا تۇسۋگە شاقىرىپ كەلەدى. ساياساتكەر بۇگىنگە دەيىن ءوزىنىڭ ناقتى رەسمي شەشىمىن جاريا ەتپەگەن بولاتىن.
«بۇگىن ءبىز سايلاۋعا قاتىساتىنىمىزدى جاريالايمىز. ەكىنشىدەن، ۇمىتكەر رەتىندە بەلگىلى ساياساتكەر، 20 جىل بويى ساياساتپەن اينالىسىپ كەلە جاتقان ءامىرجان قوسانوۆ «ۇلت تاعدىرى» اتىنان سايلاۋعا تۇسەدى»، - دەدى «ۇلت تاعدىرى» قوزعالىسىنىڭ جەتەكشىسى، قوعام قايراتكەرى دوس كوشىم.