14:27, 26 - ءساۋىر 2019 | GMT +6
ازيا چەمپيوناتى: قازاقستاندىق بوكسشى كۇمىس مەدال الدى
نۇر-سۇلتان. قازاقپارات - تايلاند استاناسى بانگكوكتە ءوتىپ جاتقان بوكستان ازيا چەمپيوناتىندا زاكىر سافيۋللين قازاقستانعا العاشقى كۇمىس جۇلدە سىيلادى، دەپ حابارلايدى قازاقپارات ءتىلشىسى.
60 كەلى سالماقتا ەل نامىسىن قورعاپ جاتقان وتانداسىمىز فينالدا مونعوليالىق تسەندبااتار ەردەنەباتپەن قولعاپ ءتۇيىستىردى. اسا تارتىستى وتكەن جەكپە-جەك قورىتىندىسى بويىنشا تورەشىلەر ءبىر اۋىزدان مونعوليالىق بوكسشىنى جەڭىمپاز دەپ تاپتى.
قازاقستاندىق 4 بوكسشىمىز «التىن» ءۇشىن تالاساتىنىن بۇعان دەيىن جازعان بولاتىنبىز.
الدا 75 كەلى سالماقتا ەل نامىسىن قورعاپ جاتقان تۇرسىنباي قۇلاحمەتتىڭ ءۇندىستاندىق اشيش كۋمارمەن، 81 كەلى سالماقتاعى بەك نۇرماعانبەتتىڭ فيليپپين بوكسشىسى دجون نوبەل مارۆينمەن جەكپە-جەگى وتەدى. ال قازاقستان ۇلتتىق قۇراماسىنىڭ كاپيتانى، اسا اۋىر سالماقتاعى بوكسشىمىز قامشىبەك قوڭقابايەۆ وزبەكستاندىق باحودير جالولوۆپەن جۇدىرىقتاسادى.
اۆتور: كۇنسۇلتان وتارباي