ەلوردادا ۇلتتىق سپورت تاريحىنداعى اۋقىمدى جارىستار وتپەك

نۇر-سۇلتان. قازاقپارات - نۇر- سۇلتان قالاسىندا ۇلتتىق سپورت ويىندارىنان «ۇلى دالاعا ۇلكەن ۇلەس» اتتى ءىرى جارىستار وتەدى، دەپ حابارلايدى قازاقپارات ءتىلشىسى.

جاڭادان قۇرىلعان «بولات تۇياق» قوعامدىق بىرلەستىگىنەن ءمالىم ەتكەندەي، اۋقىمدى شارانى ەلوردا كۇنىنە وراي 6-7- شىلدە كۇندەرى «قازانات» يپپودرومىندا وتكىزۋ جوسپارلانعان.

بىرلەستىك وكىلدەرىنىڭ ايتۋىنشا، جارىستار ۇلتتىق سپورتتىڭ 13 تۇرىنەن بۇرىن-سوڭدى بولماعان اۋقىمدا ۇيىمداستىرىلماق.

شارا اۋەلى ءار اۋىلدىڭ اتقا مىنەر ازاماتتارىنىڭ شەرۋىنەن باستالادى. ارى قاراي بەس كەزەڭنەن تۇراتىن ات بايگەسى، نەكەلى ايەلدەردىڭ جاياۋ جارىسى، تۇيەلەر جارىسى، كوكپار تارتۋ، قولاڭ شاشتى قازاق ارۋلار بايقاۋى، الىپ كۇش يەلەرىنىڭ سايىسى، ۇلتتىق قولونەر بايگەسى، ات سىنشىلارىنىڭ جارىسى (ءار وڭىردەن)، قىز قۋۋ، تەڭگە ءىلۋ، ارقان تارتۋ، اسىق اتۋ، توعىز قۇمالاق، وگىز كوتەرۋ، كيىز ءۇي كورمەسى (جارىس تۇرىندە) جانە ۇلتتىق تاعامدار جارمەڭكەسى (جارىس تۇرىندە) وتەدى.

ويىنداردىڭ تالاپتارىن بەكىتۋ، ءار وڭىرلەردەن كەلگەن مامانداردىڭ ۇسىنىس- ەسكەرتپەلەرىن تىڭداۋ، دايىندىق جۇمىستارىن جۇرگىزۋ جانە بايگە تۇرلەرىنىڭ سىيلىقتارىن بەلگىلەۋ ماقساتىندا ەرتەڭ، 27- ءساۋىر كۇنى ەلوردادا ارنايى وتىرىس وتەدى.

وعان «بولات تۇياق» قوعامدىق بىرلەستىگىنىڭ تەڭ ءتوراعالارى جاقىپ بايمولدا ۇلى مەن نۇرداۋلەت نۇباراك ۇلى، ەلىمىزگە بەلگىلى قوعام قايراتكەرلەرى، تانىمال ونەر ادامدارى، ۇلتتىق سپورتتىڭ ماماندارى مەن جاناشىرلارى قاتىسادى.

اۆتور: كۇنسۇلتان وتارباي