سۋپەر اۋىر سالماقتاعى قازاقستاندىق كاسىپقوي بوكسشى كەزەكتى جەكپە-جەگىن نوكاۋتپەن اياقتادى

نۇر-سۇلتان. قازاقپارات - سۋپەر اۋىر سالماقتاعى قازاقستاندىق كاسىپقوي بوكسشى جان كوسوبۋتسكي (10-0 ،9 ك و) ۆەنەسۋەلالىق قارسىلاسى ۋيليامس وكاندونى (20-8، 16ك و) نوكاۋتپەن جەڭدى.

بۇل تۋرالى قازاقپارات ۆكونتاكتە الەۋمەتتىك جەلىسىندەگى «قازاقستان كاسىپقوي بوكسى» پاراقشاسىنا سىلتەمە جاساپ حابارلايدى.

بوكس كەشى بەلارۋس استاناسى مينسكىدە ءوتتى. ج. كوسوبۋتسكي التى راۋندقا ەسەپتەلگەن ايقاستى ەكىنشى راۋندتا نوكاۋتپەن اياقتادى. بۇل، 30 جاستاعى سپورتشىمىزدىڭ مەرزىمىنەن بۇرىن اياقتاعان توعىزىنشى جەكپە-جەگى.

ەسكە سالايىق، قازاقستاندىق كاسىپقوي بوكسشى اتالمىش كەشتە گەرمانيا وكىلى، 38 جاستاعى ەۆگەني بۋحميۋللەرمەن (15-4، 12ك و) جۇدىرىقتاسۋى ءتيىس ەدى. ءبىراق ول جاراقاتىنا بايلانىستى ايقاستان باس تارتتى.

كوسوبۋتسكي پروفي- رينگتە 2017-جىلدىڭ قىركۇيەك ايىنان ونەر كورسەتىپ كەلەدى.