استانادا جاس دارىنداردىڭ شىعارماشىلىق كەشى ءوتتى
شارا ۇلتتىق مۋزەيدىڭ 5 جىلدىعىنا وراي جانە جاستار جىلىنىڭ اياسىندا ۇيىمداستىرىلدى. استانانىڭ جانە قاراعاندى قالاسىنىڭ ءبىرقاتار جوعارعى وقۋ ورىندارى مەن كوللەدجدەرىنەن جينالعان تالانتتى جاستار باس قوسىپ، وزدەرىنىڭ ونەرلەرىن ورتاعا سالدى.
شارانىڭ باستى ماقساتى - ۇلتتىق كودتىڭ نەگىزى رەتىندە تانىلاتىن مادەني مۇرالار مەن قۇندىلىقتاردى كەڭىنەن ناسيحاتتاۋ، قوعامنىڭ ماڭىزدى بولىگىن قۇرايتىن كرەاتيۆتى جاستاردىڭ باسىن بىرىكتىرۋ.
شارانىڭ اشىلۋىندا ءسوز العان ۇلتتىق مۋزەي ديرەكتورىنىڭ ورىنباسارى اباي ساتىبالدين تاۋەلسىزدىك رۋحىمەن ءوسىپ كەلە جاتقان بۇگىنگى ەرتەڭگى ءۇمىتىمىز دەپ اتاپ ءوتتى.
«جاستار - كەز كەلگەن مەملەكەتتىڭ ەڭ بەلسەندى بولىگى، قوعامنىڭ قوزعاۋشى كۇشى. سوندىقتان ەل تىرەگى - جاستار ەكەنىن ەستەن شىعارماعان ابزال.
بۇگىنگى كۇنىڭ جاستارى - بىلىكتى، رۋحاني الەمى باي، وي- سەزىمى سەرگەك، جاڭاشىل جاستار»، - دەدى اباي ساتىبالدين.
ءىس- شارا بارىسىندا قازاق ۇلتتىق حورەوگرافيا اكادەمياسىنىڭ «پەداگوگيكا» كافەدراسىنىڭ 1-كۋرس ستۋدەنتتەرى دايانا راحمەت، رۋستام كاريەۆ، جاننا ناۋرىزبايەۆا، ماديار مۋسايفوۆ اينۇر، ءاشىموۆا، ەدۆارد گارانين «جاستار ۆالسىن» تارتۋ ەتتى. اكادەميا ستۋدەنتتەرى لاتۆيا، رەسەي، قىتايداعى بىرنەشە حالىقارالىق بي ءتۋرنيرىنىڭ لاۋرەاتى.
«جاستار ۆالسىن» بەلگىلى حورەوگراف ە. مويسەيەۆ جاستار جىلىنا ارنايى قويدى. بيدەگى حورەوگرافيا قازاق ۆالسىنىڭ كورولى ءشامشى قالداياقوۆتىڭ بىرنەشە اۋەنىنە نەگىزدەلىپ، ۇلتتىق بي ونەرىنىڭ قيمىل- قوزعالىستارى مەن زاماناۋي بال بيلەرىنىڭ سينتەزى بولىپ تابىلادى.
سونىمەن قاتار، قازاق ۇلتتىق ونەر ۋنيۆەرسيتەتى مەرۋەرت وتەكەشيەۆانىڭ شەبەرحاناسى ستۋدەنتتەرىنىڭ ورىنداۋىندا پوەزيا مەن اننەن قۇرالعان «مەن قازاقپىن» اتتى كومپوزيتسيا قويىلدى.
ەۋرازيا گۋمانيتارلىق ينستيتۋتى ستۋدەنتتەرىنىڭ دومبىراشىلار توبى «كۇمبىرلە» قازاقتىڭ كۇيلەرىنەن پوپۋرري ورىنداپ، ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى «شاڭىراق» ۇيىمىنىڭ مۇشەسى ەرزات جۇمابەكوۆ يسا بايزاقوۆتىڭ «جەلدىرمەسىن» شەرتتى.