تانىمال ءتورت ايتىس اقىنى كوپبالالى وتباسىعا ءۇي سىيلادى

تالدىقورعان. قازاقپارات - تالدىقورعاندا «ۇلى دالا ءان مەن جىرى، اقىنداردىڭ جەتى قىرى» اتتى ايتىس اقىندارىنىڭ جاڭا اۆتورلىق جوباسى ۇسىنىلدى.

اينۇر تۇرسىنبايەۆا، بالعىنبەك يماش، سارا توقتامىسوۆا مەن جانداربەك بۇلعاقوۆتىڭ ءان-جىر كەشىندە كوپبالالى وتباسىعا ءۇيدىڭ كىلتى تابىس ەتىلدى، دەپ حابارلايدى قازاقپارات ءتىلشىسى.

ايتىس ونەرىنىڭ تورىندە جۇرگەن ءتورت اقىن قازاقستان بويىنشا گاسترولدىك ساپارعا شىقتى. العاشقى كونسەرتىن تالدىقورعاننان باستادى. سەبەبى بالعىنبەك پەن جانداربەك - جەتىسۋ وڭىرىندە تۋىپ وسكەن اقىندار. ال كەشتىڭ 25- ساۋىردە ءوتۋىنىڭ وزىندىك سىرى بار. ەكى اقىن دا ءدال وسى كۇنى دۇنيە ەسىگىن اشقان.

جەتىسۋدىڭ قوس قىرانىنا شىعىستىڭ قوس شىنارى اينۇر مەن سارا قوسىلىپ، تالعامپاز كورەرمەنگە كەرەمەت كەش سىيلادى. اقىنداردىڭ سۋىرىپ سالما ونەرىنەن بولەك باسقا دا قىرلارىن تانىتتى. تەبىرەنىپ قارا ولەڭ وقىدى، اۋەلەتىپ ءان شىرقادى. سالت داستۇردەن سارقىت دەپ قىز ۇزاتتى، كەلىننىڭ بەتىن اشتى. قاسيەتتى رامازان ايى قارساڭىندا قايىرىمدى ءىس باستاپ، كونسەرتتەن تۇسكەن قارجىعا كوپبالالى وتباسىعا باسپانا اپەردى.

5 بالاسىمەن 10 جىلدان استام ۋاقىت پاتەر جاعالاپ جۇرگەن ەركىن تاڭىربەرگەنوۆكە ءۇيدىڭ كىلتىن اينۇر تۇرسىنبايەۆا مەن بالعىنبەك يماش تابىستادى. جۇمىس ورنىنان بەرىلگەن بيلەتپەن كونسەرتكە كەلگەن ەركىن ءۇشىن دە، قازاقتىڭ ءتول ونەرىنەن سۋسىنداعان جەتىسۋلىقتار ءۇشىن دە بۇل توسىن سىي بولدى. اقىندار بۇل يگى باستاما وزگەلەرگە ۇلگى بولىپ، وسىنداي حالىق سانىن كوبەيتىپ وتىرعان وتباسىلارعا قولداۋ ءبىلدىرسىن دەگەن نيەتپەن قولعا العاندارىن ايتتى.

ءتورت اقىن الداعى ۋاقىتتا گاسترولمەن بۇكىل قازاق دالاسىن ارالاپ شىعۋدى جوسپارلاپ وتىر. تالدىقورعاننان كەيىن بالعىنبەك يماش ساحناداعى 25 جىلدىعىن 1- مامىردا الماتىدا اتاپ وتەدى. ال ەرتىستىڭ ەركە قىزدارى اينۇر تۇرسىنبايەۆا مەن سارا توقتامىسوۆا 3-4- مامىردا تۋعان جەرلەرى سەمەي مەن وسكەمەندە جەرلەستەرىمەن قاۋىشادى.