+7 (701) 759 90 19 Лента
14 °С : استانا
19 °С : الماتى
USD 379.36 EUR 424.47
RUB 5.88 CNY 54.95
جاڭالىقتار

فۋتبولداعى ءسىز بىلمەيتىن قىزىقتار

26 ءساۋىر 00:04 246
:ءبولىسۋ
فۋتبولداعى ءسىز بىلمەيتىن قىزىقتار

استانا. قازاقپارات - فۋتبول - ادامزات ويلاپ تاپقان ونەرلەردىڭ ەڭ كەمەلى دەيدى اياقدوپ ويىنىنىڭ جانكۇيەرلەرى. ميلليونداردىڭ ەرمەگىنە اينالعان بۇل تىلسىم سپورت تۋرالى قانشالىقتى جاقسى بىلەمىز؟

 انگليا قالاي چەمپيون بولدى؟


فۋتبولداعى ءسىز بىلمەيتىن قىزىقتار

 فۋتبول وتانى سانالاتىن انگليا الەم چەمپيوناتىندا تەك ءبىر مارتە توپ جارعانىن بىلەسىز بە؟ ال سول جەڭىستى مۋنديالدىڭ ءوزى ۇلكەن داۋمەن اياقتالعان. 1966 -جىلى فينالعا انگليا مەن گەرمانيا فەدەراتيۆتىك رەسپۋبليكاسىنىڭ قۇرامالارى شىققان. نەگىزگى ۋاقىت 2:2 ەسەبىمەن تارتىستى اياقتالعان. قوسىمشا ۋاقىتتا اعىلشىن ويىنشىسى دجەففري حەرستتىڭ سوققىسىنان كەيىن دوپ ماڭدايشاعا تيگەن. نەمىس قورعاۋشىلارى دوپتى قاقپا سىزىعىنان الىپ شىعادى. الايدا الاڭ جيەگىندە تۇرعان تورەشى توفيك باحراموۆ دوپ قاقپا سىزىعىنان ءوتىپ، گول بولدى دەپ ەسەپتەيدى. ستاديونعا جينالعان كورەرمەندەر مەن نەمىس فۋتبولشىلارى نارازىلىق كورسەتكەنمەن تورەشى ايتقانىنان قايتپادى. ءازىربايجان تورەشىسى توفيك باحراموۆ قارتايعان شاعىندا بەرگەن سۇقباتىندا "سول ويىندا گول بولدى ما؟ " دەگەن سۇراققا "ستالينگراد" دەپ قىسقا جاۋاپ قايىرعان. وسىلايشا، انگليا تاريحىندا العاش جانە ازىرگە سوڭعى رەت الەم چەمپيونى اتاندى. ءالى كۇنگە دەيىن انگليانىڭ جەڭىسىنە كۇمانمەن قارايتىندار جەتەرلىك.

 اۋعانستان = قازاقستان؟


فۋتبولداعى ءسىز بىلمەيتىن قىزىقتار

سوعىستان كوز اشپاعان اۋعانستان ەلىنىڭ ۇلتتىق قۇراماسى 1984 -جىلدان 2003 -جىلعا دەيىن بىردە ءبىر ويىن وتكىزبەگەن. 19 جىل بويى بۇل ەلدىڭ قۇراماسى جولداستىق كەزدەسۋگە دە قاتىسپاعان. سەبەبى بۇل ۋاقىتتا فۋتبول اۋعانستاندا تىيىم سالىنعان سپورت تۇرىنە جاتاتىن. تەك 2003 -جىلى فۋتبولشىلارعا ەركىندىك بەرىلدى.

 دوپتى گرەك قۇدايى افروديتا جاساعان با؟


فۋتبولداعى ءسىز بىلمەيتىن قىزىقتار

 تەرىدەن جاسالعان كونە فۋتبول دوبى انگليا مەن گرەكيادا ارحەولوگيالىق قازبالار جۇرگىزۋ كەزىندە تابىلعان. كونە گرەك اڭىزىنا سەنسەك، ادامداردىڭ باستى قىزىعۋشىلىعىنا اينالعان ويىننىڭ پايدا بولۋىنا ماحاببات قۇدايى افروديتا نەگىز بولعان ەكەن. ول العاشقى تەرىدەن جاسالعان دوپتى گەفەستكە (تەمىرشى، وت قۇدايى) ارنايى جاساتىپ، ادامدارعا سىيعا تارتادى. ءارتۇرلى سالتقا بايلانىستى دوپ كۇننىڭ، ايدىڭ، ءتىپتى جەردىڭ ءپىشىنى رەتىندە قولدانىلعان. قازىرگى فۋتبولعا ۇقساس كونە ويىندار ەسكيموستار (تۋنگاتگاك) ، ۇندىستەر، ريم، مىسىر، قىتاي جانە ينكتەر وركەنيەتىندە ورىن العان.

نەمىس بۋندەسليگاسىن جەڭگەن اۆستريالىق كوماندا


فۋتبولداعى ءسىز بىلمەيتىن قىزىقتار

 نەمىس بىرىنشىلىگىندە قىزىق جاعداي بولعان. 1938 -جىلى گەرمانياعا اۆستريا قوسىلىپ، سايكەسىنشە فۋتبول كلۋبتارى دا بىرىكتى. ال 1941 -جىلى نەمىس بىرىنشىلىگىن اۋستريالىق "راپيد" جەڭىپ الدى. وسىلايشا، "راپيد" نەمىس چەمپيوناتىندا جەڭىسكە جەتكەن العاشقى شەتەل كومانداسى اتاندى. مۇنداي جاعداي فۋتبولدا كوپ كەزدەسە بەرمەيدى.

فۋتبول دوبىنىڭ "وتانى" - پاكىستان


فۋتبولداعى ءسىز بىلمەيتىن قىزىقتار

 فۋتبولدىڭ نىشانى دوپ ەكەنىن ءبارىمىز بىلەمىز. ءبىراق كاسىپقوي فۋتبول دوپتارىنىڭ %80 پاكىستان ەلىندە جاساپ شىعاراتىنىن كوبىمىز بىلە بەرمەيمىز. وسى ءبىر ەلدىڭ ۇندىستانمەن شەكارالاس جاتقان سيالكوت قالاسىندا الەمدەگى ەڭ ۇزدىك بىلعارى دوپتارىن جاسايدى.

ءوزىن ويىننان شەتتەتكەن تورەشى


فۋتبولداعى ءسىز بىلمەيتىن قىزىقتار

 فۋتبول تاريحىندا ەكى ەرەكشە وقيعا بولعان. ماتچتى جۇرگىزىپ تۇرعان تورەشى ءوزىن ويىننان شەتتەتەدى. اعىلشىن اربيترلەرى ەندي ۋەين مەن مەلۆين سيلۆەستەر اعىلشىن پرەمەر- ليگاسى تومەنگى ديۆيزيونىنىڭ ماتچى كەزىندە وزدەرىنە قىزىل قاعاز كورسەتەدى. ءبىرىنشى تورەشى قاقپاشىمەن تۇسىنىسپەستىك تۋماۋ ءۇشىن وسىلاي جاساسا، ەكىنشىسى فۋتبولشىمەن توبەلەسىپ قالعانى ءۇشىن وزىنە قىزىل قاعاز كورسەتكەن.

 ساقشىلار دا فۋتبول وينايدى


فۋتبولداعى ءسىز بىلمەيتىن قىزىقتار

برازيليالىق "كاكوۆا" فۋتبول كلۋبى جەرگىلىكتى بىرىنشىلىكتە جاقسى ناتيجە كورسەتىپ جۇرگەن. الايدا ىشكى ىستەر ءمينيسترىنىڭ بۇيرىعى بويىنشا بۇل كوماندانى جاۋىپ تاستايدى. ويتكەنى كوماندادا نەگىزىنەن ساقشىلار ونەر كورسەتكەن. "كاكوۆا" ويناعان ساتتە ستاديونعا ولاردى قولداۋعا وزگە ساقشىلار دا كەلەتىن بولعان. ستاديوننىڭ ىشىندە تەمىردەي ءتارتىپ ساقتالعانىمەن، قالادا قىلمىس سانى ارتقان.

قىزىل قاعازدى جۇتىپ قويعان فۋتبولشى


فۋتبولداعى ءسىز بىلمەيتىن قىزىقتار

 ادامنان ايلا اسپايدى دەگەن راس. فۋتبولشىلار الاڭنان كەتپەۋ ءۇشىن قانداي قۋلىققا بارادى دەسەڭىز شە. 1983 -جىلى مايك بەگلي ەسىمدى ويىنشى تورەشىنىڭ قويىن داپتەرىندە ءوزىنىڭ ءتارتىپ بۇزعانى تۋرالى جازىلعان پاراقشاسىن جەپ قويسا، 1989 -جىلى يتاليالىق "پيانتا" كلۋبىنىڭ ويىنشىسى فەرناندو د'ەركولي تورەشى كورسەتكەن قىزىل قاعازدى جۇتىپ قويعان.

 ۆاتسون، مۇنىڭ ەش قيىندىعى جوق



فۋتبولداعى ءسىز بىلمەيتىن قىزىقتار 
ايگىلى اعىلشىن جازۋشىسى ارتۋر كونان دويل قىلمىستىق ىستەردى اشكەرەلەۋمەن اينالىسقان شەرلوك حولمس تۋرالى اڭگىمەلەر جازىپ تانىمال بولعانىن بىلەمىز. دەگەنمەن ونىڭ كاسىبي فۋتبولشى بولعانى كوپكە ءمالىم ەمەس. اعىلشىن جازۋشىسى ⅩⅨعاسىر سوڭىندا انگليانىڭ پورتسمۋت فۋتبول كلۋبىندا قاقپاشى بولعان. ول اتالعان كوماندادا ا. س. سميت ەسىمىمەن ويناعان ەكەن.

فۋتبولدىڭ ءۇشجاقتى ءتۇرى بار


فۋتبولداعى ءسىز بىلمەيتىن قىزىقتار

1990 -جىلدارى دانيالىق سۋرەتشى اسگەر يورن ءۇش جاقتى فۋتبولدى ويلاپ تاپتى. ول جەردە 6 بۇرىشتى الاڭدا ءۇش بىردەي كوماندا وينايدى. ويىننىڭ جەڭىمپازى ادەتتەگىدەي كوپ گول سوققان كوماندا ەمەس، ءوز قاقپالارىنا از گول وتكىزگەن كوماندا اتانادى. بۇل سپورت تۇرىنەن قازىرگى كەزدە كوپ فەستيۆالدەر وتكىزىلىپ تۇرادى.

Massaget.kz


باستى سوزدەر: قوعام,
:ءبولىسۋ

اأتور:

novasa

ونلاين قىزمەتكەرلەر
مۇراعات