سىزدە ەسكى قاعاز اقشا بار ما؟ ولاردىڭ باعاسى قانشا ەكەنىن ءبىلىڭىز
عالامتوردا ابىلاي حان، ءابىلقايىر، ءال- فارابي، قۇرمانعازى، اباي، شوقان بەينەسىندەگى 1993 -جىلى شىعارىلعان 1, 3, 5, 10, 20, 50 تەڭگەلەر ساۋداعا سالىنعان. ەگەر قولىڭىزدا ءالى دە ەسكى بانكنوت بار بولسا، كۋپيۋرالاردى ساتىپ، اقشا جاساساڭىز بولادى.
تەڭگەنىڭ تاريحىنان سىر شەرتەتىن ەسكەرتكىشتەردى ساۋداعا سالاتىنداردىڭ ىشىندە الىپ- ساتارلار دا، كوللەكسيونەرلەر دە بار. سولاردىڭ ءبىرى 10 تەڭگەلىك شوقان بەينەسىندەگى كۋپيۋرانى ساتاتىن جان ەسىمدى جارناما بەرۋشى.
«كوللەكتسيونەرمىن. تەڭگەلەردى جيناپ جۇرگەنىمە 5 جىلعا جۋىقتادى. ءبىراز ۋاقىت بۇرىن بۇل كۋپيۋرانى دا عالامتوردان ساتىپ العانمىن. قازىر 2000 تەڭگەگە ساۋدالاماقپىن. بانكنوت وتە جاقسى ساقتالعان» ، - دەيدى ول.
عالامتوردا مۇنداي جارنامالار جەتىپ ارتىلادى. ىشىندەگى ەڭ قىمبات اقشا 100 تەڭگەلىك ابىلاي حان بەينەسى. ونىڭ قۇنى - 3000 تەڭگە. مامانداردىڭ ايتۋىنشا، بۇنداي كۋپيۋرالار وتانسۇيگىش، مەملەكەتتىك قىزمەت اتقاراتىن ادامدارعا، سونىمەن قاتار، كوللەكتسيونەرلەرگە تاپتىرماس سىيلىق. وعان قوسا، بولاشاققا سالىم جاساۋدىڭ ءبىر ءتۇرى ەكەن.
ەسكى قۇندى قاعازدارمەن بىرگە جۇرت اراسىندا ەرەكشە سۇرانىسقا يە نۇرسۇلتان نازاربايەۆ بەينەلەنگەن مەرەيتويلىق بانكنوت. ونىڭ ەرەكشەلىكتەرى مەن قۇندىلىقتارى جايلى يەسى 16 جاستاعى وقۋشى دانەل ايتىپ بەردى.
«ول 100000 دانامەن شىققان. ونىڭ قازىرگى باعاسى 15000 تەڭگەنى قۇراعانىمەن، الداعى ۋاقىتا قۇنى كوتەرىلە بەرمەك. ويتكەنى مەرەيتويلىق بانكنوت وتە ۇلكەن سۇرانىسقا يە. وسىدان ءبىراز ۋاقىت بۇرىن ول قۇندى بولماعان، مىنە باعاسى ءوز كورسەتكىشىنەن ەلۋ پايىزعا قىمباتتاپ وتىر» ، - دەيدى ول.
تاۋەلسىز قازاستاننىڭ اقشاسىمەن قاتار، كەڭەس ۇكىمەتى كەزىندەگى كۋپيۋرالاردى ساقتاپ، ساتىپ الاتىندار دا بار ەكەن. رۋبلدەردى ساتىلىمعا شىعارعان سۇلەيمەن اتتى 38 جاستاعى كوللەكتسيونەرگە مۇنداي قۇندى قاعازدى اتاسى بەرگەن كورىنەدى.
«مەنىڭ تەڭگەلەردى جيناۋىما اتام سەپتىگىن تيگىزدى. قىزىعۋشىلىعىم سول ۋاقىتتان باستالعان. الايدا قازىر كوللەكتسيامدى ساۋداعا سالدىم. كەڭەس ۇكىمەتى كەزىندەگى بانكنوتتاردىڭ ءارقايسىسىنىڭ باعاسى - 1000 تەڭگە» ، - دەيدى ول.