جاڭىلماي تاڭداپ، كاسىپ قىل

 نۇر-سۇلتان. قازاقپارات - ومىردە ەڭ ءبىرىنشى - ماماندىقتى، سوسىن ومىرلىك جاردى دۇرىس، جاڭىلماي تاڭداۋ كەرەك.

ۇلكەن كىسىلەردىڭ كوبى «دۇنيەدە ەڭ ءبىرىنشى - ماماندىقتى، سوسىن ومىرلىك جاردى دۇرىس، جاڭىلماي تاڭداۋ كەرەك» دەپ ايتىپ جاتادى. بۇل - قاي جاعىنان قاراساڭ دا، وتە دۇرىس ءتۇجىرىم. قازىرگى تاڭدا الەمدە 40 مىڭنان استام ماماندىق بار. كەز كەلگەن كاسىپتىڭ كوزىن تاپقان مامان بولعاندىقتان، ماماندىقتى تىزىمگە كىرگىزەدى. 40 مىڭ ماماندىقتىڭ بارلىعىندادا مامان بار، ءبىراق كوەففيسيەنت بەلگىلى ءبىر سەبەپتەرمەن بىردەي ەمەس.

الىسقا ۇزاماي-اق، ەلىمىزدە كەيبىر مامانداردىڭ كوپ، ال كەي مامانداردىڭ جەتكىلىكسىز ەكەندىگى ءمالىم. مىسالعا مەملەكەتىمىزدە ەكونوميست مەن زاڭگەرلەر وتە كوپ، ال ينجەنەرلەر، دارىگەرلەر، تەحنولوگتار از.

ەلىمىز وسى ءىستى قولىنا الىپ، وسى كەزدە مەملەكەتتىك گرانتتاردى ازدىق كورسەتىپ تۇرعان مامندىقتارعا باسقالارىنان كوپ بولەدى. ياعني، ناقتى عىلىمداعى ءپاندى تاڭداپ وتىرعان 11 سىنىپ تۇلەگىنىڭ باسقالارعا قاراعاندا مەملەكەتتىك گرانتقا يە بولۋ مۇمكىندىگى جوعارى. بۇل ماعۇلماتتى وقۋشىلار 9 -سىنىپتان باستاپ بىلە باستايدى جانە 11 -سىنىپقا بارعاندا قاي سالاعا باراتىن ناقتى ءبىلىپ، تاڭداپ بارادى. جوعارىدا ايتىلعاندار بارىنە ءمالىم ءجايت.

مەنىڭ جەكە پىكىرىم ەمەس، جىل سايىن بولىپ تۇراتىن ءىس. ۇلكەن ومىرگە قادام باسقالى تۇرعان 11 سىنىپ تۇلەگىنىڭ ماماندىق تاڭداۋداعى ەركىندىگى مەن قالاۋى مەنى قاتتى الاڭداتادى. تۇلەكتەردىڭ بارلىعى دا ماماندىقتارىن ءوز قالاۋىمەن عانا تاڭدامايدى. اتا-انانىڭ، قوعامنىڭ، مەملەكەتتىڭ اسەرىمەن كوپ وقۋشىلار سەنىمسىزدىكتەن ءوز ارماندارىن وزگەرتىپ جاتادى. بۇل دەگەنىمىز مەكتەپ بىتىرۋشىلەردىڭ 4/1 بولىگى وقۋىن تەك گرانتتارعا بايلانىستى تاڭدايدى. ياعني، ءوز ىشىندە سۋرەتشى تۇلەك مەملەكەت قارجىسىنان تەگىن وقۋعا تۇسكىسى كەلگەندىكتەن باسقا سالاعا بەت بۇرۋى مۇمكىن.

ءسىز بۇعان قالاي قارايسىز؟ مەن مۇنى قولدامايمىن. ماماندىقتى ادام تەك ءوزى ءۇشىن جانە تەك وزىنە عانا تاڭداۋى قاجەت. ەشقانداي دا مەملەكەتتىك گرانت سەنىڭ قالاۋىڭدى وزگەرتە الماۋى ءتيىس. سەن تاڭداپ وتىرعان ماماندىقتىڭ حاس شەبەرى بولساڭ، سول سالانىڭ ناعىز مامانى بولا بىلسەڭ ەشتەڭە دە ماڭىزدى ەمەس. ءتىپتى ول سالادا وقيتىندار ەلدە كوپ بولسا دا، سەن ءوز-وزىڭە سەنىم ارتىپ سول سالانى وتە جاقسى مەڭگەرسەڭ ارمان-ماقساتتارىڭا جەتەسىڭ. نەلىكتەن تەك ماماندىق پەن جاردى عانا تاڭداۋدا قاتەلەسپەۋ كەرەك؟ سەبەبى ومىردە ءمىنسىز سالا مەن ءمىنسىز ادام بولمايدى. تاڭداپ وتىرعان سالانى دا، ادامدى دا كەمشىلىكتەرىمەن، قيىندىقتارىمەن قابىلداي ءبىلۋ قاجەت. ءوز تاڭداۋىڭدى بارىنەن بيىك قويا ءبىل.