كونستيتۋتسيالىق كەڭەس ق ر پرەزيدەنتىنىڭ ءوتىنىشى بويىنشا شەشىم قابىلدادى
بۇل تۋرالى كونستيتۋتسيالىق كەڭەستىڭ رەسمي سايتىنا سىلتەمە جاساپ قازاقپارات حابارلايدى.
بۇرىن حابارلانعانداي، ءوتىنىش بەرۋشى رەسپۋبليكا پرەزيدەنتتىگىنە كانديداتتارعا قويىلاتىن قازاقستاندا سوڭعى ون بەس جىل بويى تۇرۋى تۋرالى تالابىنىڭ مازمۇنىن اشۋدى، سونداي- اق قازاقستاننىڭ شەتەلدىك مەكەمەلەرىندە جانە رەسپۋبليكا مۇشەسى بولىپ تابىلاتىن حالىقارالىق ۇيىمداردا جۇمىسى كەزەڭىندە ازاماتتىڭ ەلدەن تىس جەردە تۇرعان ۋاقىتىن اتالعان مەرزىمگە ەسەپتەۋ ماسەلەسىن ءتۇسىندىرۋدى سۇراعان ەدى.
وتىرىستا كونستيتۋتسيالىق كەڭەس ءتوراعاسى ق. ءمامي كەڭەس الدىندا وتە ماڭىزدى ماسەلە كوتەرىلگەنىن، ونىڭ نەگىزگى زاڭدى، شەت ەلدەردىڭ كونستيتۋتسيالارىن جانە عىلىمي زەرتتەۋلەردىڭ ناتيجەلەرىن جان- جاقتى تالداۋدى قاجەت ەتەتىنىن اتاپ ءوتتى.
كەڭەس قۇرامى ۇكىمەت، پارلامەنت سەناتى مەن ءماجىلىسى، جوعارعى سوت، باس پروكۋراتۋرا، سىرتقى ىستەر جانە ىشكى ىستەر مينيسترلىكتەرى وكىلدەرىنىڭ پىكىرلەرىن تىڭدادى.
ەلىمىزدىڭ قۇقىقتانۋشى عالىمدارى، زاڭ عىلىمدارىنىڭ دوكتورلارى، پروفەسسورلار ە. ءابدىراسۇلوۆ جانە م. داۋلەنوۆ ءوز قورىتىندىلارىن ۇسىندى.
تالقىلاۋلار مەن وتىرىسقا قاتىسۋشىلاردىڭ جاۋاپتارىنان كەيىن كونستيتۋتسيالىق كەڭەس نورماتيۆتىك قاۋلى قابىلدادى.
كونستيتۋتسيالىق كەڭەس رەسپۋبليكا پرەزيدەنتتىگىنە كانديداتتار ءۇشىن كونستيتۋتسيانىڭ 41-بابىنىڭ 2-تارماعىندا بەلگىلەنگەن قازاقستاندا سوڭعى ون بەس جىل بويى تۇرۋ تالابى مەملەكەت باسشىسىنىڭ نەگىزگى زاڭدا بەكىتىلگەن جاۋاپتى ميسسياسى، فۋنكتسيالارى جانە وكىلەتتىكتەرىمەن شارتتالعان، دەپ ءتۇسىندىردى.
ەلدەگى قوعامدىق- ساياسي جانە الەۋمەتتىك- ەكونوميكالىق جاعداي، مەملەكەتتىڭ ۇلتتىق ەرەكشەلىگى، جۇرگىزىلگەن رەفورمالار مەن قول جەتكىزىلگەن ناتيجەلەر تۋرالى اقپاراتتى ەگجەي- تەگجەيلى ءبىلۋ جوعارى لاۋازىمدى تۇلعا ءۇشىن اسا ماڭىزدى بولىپ تابىلادى. ولاردى ەسكەرە وتىرىپ، بولاشاق مەملەكەت باسشىسى قوعام مەن مەملەكەتتىڭ ودان ءارى دامۋىنىڭ ستراتەگيالىق جانە تاكتيكالىق باعدارلامالارىنىڭ باعىتتارىن ايقىنداۋى ءتيىس.
اتالعان ءمان- جايلارعا بايلانىستى كونستيتۋتسيالىق كەڭەس پرەزيدەنتتىككە كانديداتتىڭ قازاقستان اۋماعىندا سايلاۋ الدىنداعى ۇزاق كەزەڭ ىشىندە تۇراقتى نەگىزدە تۇرۋى تۋرالى تالاپ وبەكتيۆتى قاجەتتىلىك جانە وتە ماڭىزدى دەپ سانايدى. وسىعان ۇقساس تالاپ كوپتەگەن شەت ەلدەردىڭ كونستيتۋتسيالارىندا بەلگىلەنگەن.
كونستيتۋتسيالىق كەڭەستىڭ پىكىرىنشە، ون بەس جىلدىق تۇرۋ مەرزىمىنە ءبىرىنشى كەزەكتە ادامنىڭ ەل اۋماعىندا تۇراقتى تۇرۋ ۋاقىتى كىرەدى. ول ادەتتە ازاماتتىڭ تۇرعىلىقتى جەرى بويىنشا تىركەلۋىمەن راستالادى.
سونىمەن قاتار، بۇل مەرزىمگە قازاقستان رەسپۋبليكاسىنىڭ ديپلوماتيالىق قىزمەتى پەرسونالىنا جاتاتىن جانە ولارعا تەڭەستىرىلگەن قازاقستان مۇشە بولىپ تابىلاتىن حالىقارالىق ۇيىمدار جانىنداعى لاۋازىمدارعا تاعايىندالعان ازاماتتاردىڭ قازاقستان رەسپۋبليكاسىنان تىس جەرلەردە تۇرۋ كەزەڭدەرى دە ەسەپتەلەدى.
كونستيتۋتسيالىق كەڭەس ءتوراعاسى ق. ءمامي تۇسىندىرگەندەي، وسى نەگىزدەر بويىنشا ەلدەن شىعۋ قازاقستاندىق ازاماتتىقتى توقتاتۋعا جانە تۇراقتى تۇراتىن جەرىن وزگەرتۋگە اكەلمەيدى. اتالعان جاعدايلاردا رەسپۋبليكادان تىس جەرلەردە بولعان ازامات (ەگەر ونىڭ وزگە ەلگە تۇراقتى تۇرعىلىقتى تۇردە شىققانى، باسقا مەملەكەتتىڭ ازاماتتىعىن، ساياسي نەمەسە وزگە دە باسپانا العاندىعى نەمەسە سونداي وتىنىشتەر بەرگەندىگى تۋرالى مالىمەتتەر بولماسا) ءتيىستى مەملەكەتتە ۋاقىتشا تۇراتىن بولىپ ەسەپتەلەدى. وسىنداي جاعداي تۇلعانىڭ ازاماتتىق ينستيتۋتىنان تۋىندايتىن قازاقستانمەن تۇراقتى ساياسي- قۇقىقتىق بايلانىسى دەڭگەيىنىڭ قانداي دا ءبىر تومەندەۋىن بىلدىرمەيدى. ونداي تۇلعا قازاقستان ازاماتى قۇقىقتارىنىڭ، بوستاندىقتارى مەن مىندەتتەرىنىڭ تولىق كولەمىنە يە بولىپ سانالادى.
نورماتيۆتىك قاۋلىنىڭ تولىق ءماتىنى باسپا سوزدە جانە كونستيتۋتسيالىق كەڭەستىڭ ينتەرنەت- رەسۋرسىندا جاريالانادى.