تۇركىستاندا تاريحي ورىندار جايلى مالىمەت بەرەتىن موبيلدىك قوسىمشا ىسكە قوسىلدى

تۇركىستان. قازاقپارات - تۇركىستاندا قوجا احمەت ياساۋي كەسەنەسى مەن تاريحي تۇلعالار جانە كيەلى ورىندار جايلى مالىمەت الاتىن موبيلدىك قوسىمشا ىسكە قوسىلدى.

Android پلاتفورمالارىنا ارنالعان قوسىمشا ق ر مادەنيەت جانە سپورت مينيسترلىگىنە قاراستى «ازىرەت سۇلتان» مەملەكەتتىك تاريحي-مادەني قورىق-مۋزەيىنە تيەسىلى، دەپ حابارلايدى قازاقپارات ءتىلشىسى.

قوسىمشانى قولدانۋشىلار عاسىرلار ەلەگىنەن ءوتىپ، بۇگىنگى كۇنگە جەتكەن كونە ءارى تاريحي قۇندى جادىگەرلەرمەن تانىسا الادى. ولاردى ساقتاۋ مەن قورعاۋ، قايتا قالپىنا كەلتىرۋ جۇمىستارىن 3D- تۋر ارقىلى تاماشالاۋ مۇمكىندىگىنە يە. سونداي-اق، قورىق-مۋزەيگە قاراستى تاريحي-مادەني جانە رۋحاني ورىندارمەن، مينيسترلىك جاڭالىقتارى مەن مۋزەيدىڭ اتقارىپ جاتقان جۇمىستارى جونىندەگى اقپاراتتاردى بىلە الادى. مۋزەيدىڭ ديرەكتورىمەن بلوگى ارقىلى بايلانىس ورناتىپ، وندا تۇسەتىن قارجى جانە قوناقتارعا كورسەتىلەتىن قىزمەتتەر جايلى مالىمەت سۇراۋىنا بولادى. سونداي-اق، تاريحي ەسكەرتكىشتەر جايلى عىلىمي ماقالالاردى وقۋعا مۇمكىندىك قاراستىرىلعان.

ايتا كەتسەك، «ازىرەت سۇلتان» مەملەكەتتىك تاريحي- مادەني قورىق-مۇراجايى قورىندا 25000 دانا قۇندى تاريحي جادىگەرلەر بار. ولاردىڭ اراسىنداعى جازبا، ارحەولوگيالىق ەتنوگرافيا جانە نۋميزماتيكالىق توبىنا جاتاتىن جادىگەرلەر كەزدەسەدى. ال، اتالعان قوسىمشانى Google Play Market ارقىلى جۇكتەپ الۋعا بولادى.