تۇركى الەمىنىڭ اڭىزدارى: ەلوردادا نوعاي سۋرەتشىسىنىڭ كورمەسى اشىلدى
«تۇركى الەمىنىڭ اڭىزدارى» دەپ اتالاتىن توپتامادا تۇركى حالىقتارىنا ورتاق فيلوسوفيا كورىنىس تاپقان جانە 80-گە جۋىق جۇمىس قويىلعان.
«بۇل - مەنىڭ ەڭبەك جولىمداعى ەڭ ۇلكەن كورمە جانە ونى جاڭا شىعارماشىلىق جۇمىستارعا باسقان قادامىم دەۋگە بولادى. مۇندا بارلىق دەرلىك جۇمىستارىم قويىلعان. ەكىنشىدەن، بۇگىنگى كورمەنى مارقۇم دوسىم، قازاقستاندىق اقىن ءانۋار وماردىڭ رۋحىنا ارنايمىن. وتكەن جىلدى ءانۋار قايتىس بولدى. ول - مەنىڭ تۋىندىلارىما ولەڭ جازىپ، قولداۋ بىلدىرگەن قازاقتاردىڭ ءبىرى. مەن ءۇشىن قازاقتاردىڭ ءبارى تۋىس. قازاقستاندا مەنىڭ جۇمىستارىم جوعارى باعالانادى، تۇسىنەدى. ءبىزدىڭ تاريحىمىز، ءتۇبىمىز ءبىر. بارشاڭىزدى ءوز حالقىمداي جاقسى كورەمىن»، - دەدى الىبەك قويلاقايەۆ كورمەنىڭ اشىلۋ راسىمىندە.
اۆتور ءوز جۇمىستارىندا قاعاز بەن تۋشتى ءجيى قولدانادى جانە جان مەن ءتاننىڭ وزەكتى ماسەلەلەرىن كوتەرۋگە تىرىسادى.
«تۋىندىلارىم جونىندە كوپ ايتقىم كەلمەيدى. ولاردىڭ ءوزىن سويلەتۋگە بولادى. سەبەبى، مەن تۋىندىلارىما بارىمدى سالدىم. جاھاندانۋ، تابيعات، تۇرمىس، ءومىر مەن ءولىم، ماحاببات تاقىرىپتارىن قوزعادىم. كورمەدەن ءار ادام ءوزىن كورەدى، مازالاپ جۇرگەن سۇراقتارىنا جاۋاپ تابادى. مەنىڭ جاساعان جۇمىستارىم ماعان ەمەس، كورەرمەنگە، حالىققا تيەسىلى»، - دەيدى سۋرەتشى.
سونىمەن بىرگە، كورمەدە «كۇلتەگىن»، «سۇيىمبيكە»، «يۆان گروزنىي» سىندى تاريحي تۇلعالاردىڭ بەينەسىن كورۋگە بولادى.
كورمە 2019 -جىلدىڭ 15 -مامىرىنا دەيىن جالعاسادى.
