مەملەكەتتىك ءتىلدى مەڭگەرسەك، بىرلىگىمىز ارتا تۇسەدى - ەلگۋن
بۇل تۋرالى «بىرلىك» ازەربايجان ەتنومادەني بىرلەستىگى جاستار قاناتىنىڭ ءتوراعاسى، ب ق و ق ح ا «جاڭعىرۋ جولى» جاستار قوزعالىسىنىڭ مۇشەسى ەلگۋن دجاناليەۆ ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، بۇدان شيرەك عاسىرعا جۋىق ۋاقىت بۇرىن ەلباسى قۇرعان قازاقستان حالقى اسسامبلەياسى ەلىمىزدەگى بىرەگەي ينستيتۋتقا اينالدى.
مۇنداي ۇيىم باسقا ەش مەملەكەتتە جوق. ونىڭ قالاي قۇرىلعانىن، نەندەي قىزمەتپەن اينالىسىپ جاتقانىن، قوعامداعى ورنىن زەرتتەۋ ءۇشىن شەت ەلدەردەن دە ادامدار كەلىپ، قىزىعۋشىلىق تانىتىپ جۇرگەنى ءمالىم.
«ەلباسىنىڭ ساليقالى ساياساتى ارقاسىندا بارلىق وڭىردە دوستىق ۇيلەرى سالىندى. وندا ءار ەتنومادەني بىرلەستىگىنىڭ ءوز ءتىلى مەن مادەنيەتىن، سالت-ءداستۇرىن ساقتاپ، دامىتۋىنا تولىق جاعداي جاسالعان. كابينەتتەردە اقساقالدار كەڭەسىپ، جاستار جينالا الادى. ءبىزدىڭ ماقساتىمىز دا - بىرلىگىمىزدى نىعايتا وتىرىپ، ونى كەلەسى ۇرپاققا امانات ەتۋ»، دەيدى ەلگۋن احماد وعلى.
- ەلگۋن، وڭىرىمىزدە ازەربايجان ۇلتىنىڭ قانشا وكىلى تۇرادى، «بىرلىك» ەتنومادەني بىرلەستىگىنىڭ جۇمىسى جونىندە ايتا كەتسەڭ؟
- وبلىستا 1800 ءازىربايجان تۇرادى. «بىرلىك» ءازىربايجان ەتنومادەني بىرلەستىگى (ءتوراعامىز نادجاف مامەدوۆ) باسىمىزدى قوسىپ، بىرلىگىمىزدى نىقتاي ءتۇسۋ ماقساتىندا 1997 -جىلدان بەرى قىزمەت ەتىپ كەلەدى. بۇل ۇيىمعا 800-دەن استام ادام مۇشە، سونىڭ ىشىندە 200 ى شارالارعا بەلسەنە ارالاسادى. بىرلەستىگىمىز قايىرىمدىلىق، ءتۇرلى مادەني- سپورتتىق شارالاردى ۇيىمداستىرۋمەن اينالىسادى. قالاداعى كومەكتى قاجەت ەتەتىن مۇقتاج جاندار تۇراتىن الەۋمەتتىك مەكەمەلەرگە ءجيى بارىپ تۇرامىز.
- قازاق، ازەربايجان تىلدەرى ءبىر-بىرىنە جاقىن، تۇركى تىلدەس توپقا جاتاتىنى ايان. ءتىل مەڭگەرۋ قيىنعا سوقپايتىن شىعار؟
- ءبىزدىڭ ۇيىمداعى اقساقالدار مەن جاستاردىڭ 80 پايىزدان استامى قازاق ءتىلىن بىلەدى. ءوز ءتىلىمىزدى دە ۇمىتقان جوقپىز. تەرەڭىرەك ءبىلۋ ءۇشىن ساباقتار وتكىزەمىز. سونىمەن قاتار ەلباسىمىز ايتقانىنداي، ءۇش ءتىلدى مەڭگەرۋدىڭ ارتىقتىعى جوق. وسى باعىتتا قازىردىڭ وزىندە اعىلشىن ءتىلىن جاقسى بىلەتىن جاستارىمىز بار. جاستار قاناتىنان راشاد مامەدوۆ، فاريدا ميرزويەۆا، ماليكا مامەدوۆا قازاق تىلىنەن وليمپيادالارعا قاتىسىپ، جۇلدە الىپ ءجۇر. راشاد پەن فاريدا وبلىستا وزىپ شىقسا، ماليكا رەسپۋبليكالىق بايقاۋدا ەكىنشى ورىنعا يە بولدى. جالپىۇلتتىق ديكتانت جازۋعا دا قاتىستىق. ارينە، قازاق جانە ازەربايجان تىلدەرىنىڭ وزگەشەلىكتەرى، كۇردەلى تۇستارى دا بار. ونى تەرەڭ مەڭگەرۋ ءۇشىن ۋاقىت كەرەك. ەڭ باستىسى، ءبىزدىڭ نيەتىمىز اق، باعىتىمىز دۇرىس.