ەلوردادا ەۋرازيالىق حالىقارالىق كىتاپ كورمە-جارمەڭكەسى باستالدى
بۇل شارا 27 -ساۋىرگە دەيىن جالعاسادى، دەپ حابارلايدى قازاقپارات ءتىلشىسى.
«ەلوردامىزدا ءتورت كۇن وتەتىن ІV ەۋرازيا حالىقارالىق كىتاپ كورمە-جارمەڭكەسىنە جينالعان جۇرتشىلىقتى كورگەنىمە قۋانىشتىمىن. ءبىز بۇگىن ەۋرازيا اۋماعىنداعى ماڭىزدى مادەني شارانىڭ كۋاگەرى اتانىپ وتىرمىز. كىتاپ فورۋمىن وتكىزۋ - ەلىمىزدەگى ادەبيەت سالاسىنىڭ عانا جەتىستىگى ەمەس، ول بارلىق كىتاپسۇيەر قاۋىمنىڭ مەرەكەسى»، - دەپ اتاپ ءوتتى سالتاناتتى ءىس- شارانى اشقان قر مادەنيەت جانە سپورت ءمينيسترى ارىستانبەك مۇحامەدي ۇلى.
«Eurasian Book Fair-2019» - ەۋرازيالىق حالىقارالىق كىتاپ كورمە-جارمەڭكەسى ەلىمىزدەگى ىسكەرلىك جانە گۋمانيتارلىق ارىپتەستىكتى دامىتۋ جانە نىعايتۋ ماقساتىندا ت م د، ەۋروپا جانە ازيا ەلدەرىنىڭ باسپا، كىتاپ ساۋداسى ۇيىمدارىن، مادەني جانە ءبىلىم بەرۋ ورتالىقتارىن ۇلكەن زياتكەرلىك الاڭعا بىرىكتىرەتىن اسا ءىرى كىتاپ فورۋمى.
بۇل كورمەگە 13 مەملەكەتتەن كەلگەن 90 كومپانيا قاتىسۋدا. ونىڭ ىشىندە رەسەي، ازەربايجان، تاجىكستان، ارمەنيا، قىرعىزستان، تۇركيا، قىتاي، يران، پولشا، بەلگيا، لاتۆيا، ۋكراينا، وزبەكستان بار.
جاستار جىلى اياسىندا جاس اۆتورلاردىڭ قاتىسۋىمەن «اشىق اڭگىمە» اقىندىق مارافون، كىتاپتىق اڭگىمەلەسۋ (book talks)، ادەبيەت كلۋبىنىڭ وتىرىسى، «كىتاپتى قالاي ءتيىمدى وقۋ كەرەك؟» تاقىرىبىنا ارنالعان شەبەرلىك سىنىپتارى، تانىمال اقىن- جازۋشىلارمەن اۆتوگراف- سەسسيالارى ۇيىمداستىرىلادى. ولاردىڭ ىشىندە بالالار كىتابى بۇكىلرەسەيلىك فەستيۆالىنىڭ ديرەكتورى جانە جازۋشى يۋري نەچيپورەنكو، «كيت پلىۆەت نا سيەۆەر»، «سوۆينىي ۆولك» كىتاپتارىنىڭ اۆتورى اناستاسيا ستروكينا بار.
شارا اياسىندا تانىمال مادەنيەت قايراتكەرلەرى، جازۋشىلار جانە اقىندارمەن كەزدەسۋلەر ۇيىمداستىرىلادى. ولاردىڭ اراسىندا جاس اقىن مەرگەن توقسانباي مەن قازاقستان رەسپۋبليكاسىنىڭ جازۋشىلار وداعىنىڭ ءتوراعاسى، اقىن ۇلىقبەك ەسداۋلەت بار.
كورمە- جارمەڭكەنىڭ العاشقى كۇنى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ «شاكارىم» اتتى كىتابىنىڭ تۇساۋەسەر ءراسىمى بولدى. شارانى اكادەميك ديحان قامزابەك ۇلى جۇرگىزىپ وتىردى. جيىندا ءبىرقاتار مەملەكەت جانە قوعام قايراتكەرلەرى اۆتوردىڭ «شاكارىم» ەڭبەگىنە قاتىستى وي-پىكىرلەرىن ءبىلدىردى.
ءوز كەزەگىندە ءسوز العان ە. سىدىقوۆ سان تىلگە اۋدارىلعان ەڭبەكتىڭ ارعى-بەرگى تاريحىنا توقتالا كەلىپ، جاعىمدى جاڭالىق - ءسۇيىنشى حاباردى جاريا ەتتى. اتاپ ايتقاندا، اعىمداعى جىلى «قۇنانباي» اتتى كىتابى رەسەي ەلىنەن «ج ز ل» سەرياسى بويىنشا جارىق كورمەكشى.