قازاق پەن ماجاردى ورتاق تاريحي تامىر بىرىكتىرەدى - ق ر پرەزيدەنتى

نۇر- سۇلتان. قازاقپارات - ماجارستان قازاقستاننىڭ ورتالىق جانە شىعىس ەۋروپا ايماعىنداعى، ەۋروپالىق وداق اياسىنداعى نەگىزگى ارىپتەسى.

بۇل تۋرالى بۇگىن اقوردادا ەلىمىزگە رەسمي ساپارمەن كەلگەن ماجارستان پرەمەر- ءمينيسترى ۆيكتور وربانمەن كەلىسسوزدەردەن كەيىنگى بىرلەسكەن مالىمدەمە بارىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

 «ۆيكتور وربان مىرزانىڭ ەلىمىزگە رەسمي ساپارمەن كەلۋى قازاق- ماجار قارىم- قاتىناستارىنداعى جاڭا قادام بولدى. ءبىزدىڭ كەلىسسوزدەرىمىز ەكى ەل اراسىنداعى ستراتەگيالىق ارىپتەستىكتىڭ 5 جىلدىعىنا وراي وتكىزىلىپ وتىر. ورتالىق ەۋروپا ەلدەرىنىڭ ىشىندە ماجارستان قازاقستانمەن ستراتەگيالىق ارىپتەستىك تۋرالى دەكلاراتسياعا قول قويعان تۇڭعىش ەل ەكەنىن ەرەكشە اتاپ ءوتۋ كەرەك. بۇل ءوزارا تەرەڭ تۇسىنىستىكتىڭ ايقىن دالەلى»، - دەدى ق ر پرەيدەنتى.

سونداي- اق مەملەكەت باسشىسى بۇل، نۇر- سۇلتان مەن بۋداپەش اراسىنداعى ىنتىماقتاستىقتى نىعايتۋعا دەگەن ەكى ەلدىڭ ۇمتىلىسىن كورسەتەتىندىگىن باسا ايتتى.

«ءبىز ماجارستاندى ورتالىق جانە شىعىس ەۋروپا ايماعىنداعى، ەۋروپالىق وداق اياسىنداعى نەگىزگى ارىپتەسىمىز سانايمىز. ەلدەرىمىزدى ساياسي جانە ەكونوميكالىق مۇددەلەرىمىزبەن قاتار حالىقتارىمىزدىڭ ورتاق تاريحي تامىرى بىرىكتىرەتىندىگىن ايرىقشا ريزاشىلىقپەن اتاپ وتەمىن. ۇلى دالا كوشپەلىلەرىنىڭ 100 مىڭنان استام ۇرپاعىنىڭ باسىن قوسىپ وتىرعان ماجار قىپشاقتارىنىڭ وداعىنا قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ قۇرمەتتى ليدەر بولىپ سايلانۋى ءبىزدىڭ دوستىق جانە تىعىز قاتىناستارىمىزدىڭ ايقىن ايعاعى. بۇل ءوزارا بايلانىستاردىڭ دامۋىنا وراسان زور ۇلەس قوسقان ەلباسىنىڭ ەرەن ەڭبەگىنىڭ كەڭىنەن مويىندالعانىن كورسەتەدى»، - دەدى قاسىم- جومار توقايەۆ.

«بۇگىن ءبىز ماجارستاننىڭ پرەمەر- ءمينيسترى ۆيكتور وربانمەن ءوزارا ءىس- قيمىلداردىڭ ساياسي، ساۋدا- ەكونوميكالىق جانە مادەني- گۋمانيتارلىق سالالارىنداعى باسىم باعىتتارىن بەلگىلەدىك. ستراتەگيالىق كەڭەس پەن ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ جۇمىسىنا باسا ءمان بەردىك»، - دەدى مەملەكەت باسشىسى.

 سونىمەن قاتار ول اعىمداعى جىلدىڭ 29-30 - ساۋىرىندە نۇر- سۇلتان قالاسىندا ستراتەگيالىق كەڭەستىڭ 3-وتىرىسىنا قاتىسۋ ءۇشىن ماجارستان پرەمەر- ءمينيسترىنىڭ ورىنباسارى - قارجى ءمينيسترى ميحايل ۆارگا باستاعان بيزنەس دەلەگاتسيا وكىلدەرىنىڭ كەلۋى جوسپارلانعانىن ايتتى.

«بۇل شارا ەكى ەل اراسىنداعى ساۋدا- ەكونوميكالىق جانە ينۆەستيتسيالىق سەرىكتەستىكتى ودان ارى كەڭەيتۋگە سەپتىگىن تيگىزەدى دەپ سانايمىز»، - دەدى قر پرەزيدەنتى.

ايتا كەتەيىك، قازاقستان ماجارستاننىڭ ت م د ەلدەرى ىشىندەگى 4- ءىرى ساۋدا سەرىكتەسى سانالادى. 2018 -جىلدىڭ قورىتىندىسىندا ەكى ەلدىڭ اراسىنداعى تاۋار اينالىمى 139,2 ميلليون دوللاردى قۇرادى.

ماجارستاننىڭ «سەچەني» ۇلتتىق كىتاپحاناسىندا قازاق ادەبيەتى مەن مادەنيەتى ورتالىعى اشىلعان. سونىمەن قاتار قازاق ءتىلى سەگەد عىلىمي ۋنيۆەرسيتەتىندە وقىتىلادى. جالپى جىل سايىن ماجار تاراپى قازاقستاندىق ستۋدەنتتەرگە 25 ءبىلىم گرانتىن بولەدى. بۇگىندە بۇل ەلدە 500 دەن استام قازاق جاسى ءبىلىم الۋدا.

اۆتور: مارلان جيەمباي