كوپبالالى وتباسىلارعا ءبىرىنشى كەزەكتە پاتەر الۋ قۇقىعى بەرىلەدى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

زاڭ جوباسى ءبىر توپ پارلامەنت دەپۋتاتتارىنىڭ باستاماشىلىعىمەن ازىرلەندى. بۇل تۇرعىدا «تۇرعىن ءۇي قاتىناستارى تۋرالى»، «مەملەكەتتىك جاستار ساياساتى تۋرالى»، «ق ر مەملەكەتتىك ناگرادالار تۋرالى» زاڭدارىنا تۇزەتۋلەر ەسكەرىلگەن.

«ۇسىنىلىپ وتىرعان تۇزەتۋلەردىڭ نەگىزگىلەرىنە توقتالساق، كوپبالالى وتباسى ۇعىمىن «نەكە (ەرلى-زايىپتىلىق) جانە وتباسى تۋرالى» كودەكسىنە سايكەس كەلتىرۋ ەسكەرىلگەن. بۇل زاڭنامالىق اكتىلەر اراسىنداعى قايشىلىقتى جويادى. ەكىنشىدەن، ساتىپ الۋ قۇقىعىنسىز جالعا بەرىلەتىن تۇرعىن ءۇي ۇعىمىن ەنگىزۋ ەسكەرىلگەن. بۇل تابىسى تومەن حالىقتىڭ الەۋمەتتىك وسال توپتارىنا ارنالعان. ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ تۇراقتى كوممۋنالدىق قورىن قۇرۋعا مۇمكىندىك بەرەدى»، - دەدى ءماجىلىس دەپۋتاتى شاۆحات وتەمىسوۆ.

بۇدان بولەك، «التىن القا»، «كۇمىس القا» العاندار نەمەسە بۇرىن «باتىر انا»، سونداي-اق ءبىرىنشى جانە ەكىنشى دارەجەلى «انا داڭقى» اتاعىن العان كوپبالالى انالار مەن كوپبالالى وتباسىلار ساناتى ءۇشىن تۇرعىن ءۇي الۋعا جەكە كەزەك ەنگىزۋ قاراستىرىلعان.

«مەملەكەتتىك جوسپارلاۋ جۇيەسىنىڭ شەگىندە ساتىپ الۋ قۇقىعىنسىز جالعا بەرىلەتىن تۇرعىن ءۇيدى جانە ونىڭ كولەمىن ايقىنداۋ قارالعان. بۇل نورما كوپبالالى وتباسىلاردىڭ تۇرعىن ءۇي ماسەلەسىن شەشۋگە، قاراجاتتى تىكەلەي جانە ماقساتتى جولداۋعا نەگىز بەرەدى. وسىنىڭ ارقاسىندا، جالعا بەرىلەتىن تۇرعىن ءۇيدىڭ كولەمى وسەدى دەپ كۇتۋدەمىز»، - دەپ ناقتىلادى ش. وتەمىسوۆ.

«قازىرگى ۋاقىتتا كەزەكتە تۇرعان كوپبالالى وتباسىلاردىڭ سانى 31725 كە جەتتى. كوپبالالى وتباسىلاردى جالعا بەرىلەتىن تۇرعىن ۇيمەن قامتاماسىز ەتۋ ماقساتىندا «نۇرلى جەر» باعدارلاماسى بويىنشا جىل سايىن 50 ميلليارد تەڭگە قاراجات بولىنەتىن بولادى. وسىنىڭ ارقاسىندا جىلىنا كەمىندە 6 مىڭ پاتەر تاپسىرىلادى»، - دەدى دەپۋتات.