ەلوردادا اشىق اسپان استىنداعى اسكەري تەحنيكا مۋزەيى قۇرىلادى
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
«قورعانىس ءمينيسترىنىڭ تاپسىرماسىمەن وتان قورعاۋشى كۇنىن جانە ەكىنشى دۇنيەجۇزىلىك سوعىستاعى جەڭىستىڭ 74 جىلدىعىن اتاپ وتۋگە دايىندىق اياسىندا ۇلتتىق اسكەري-پاتريوتتىق ورتالىق اۋماعىندا اشىق اسپان استىنداعى اسكەري تەحنيكا مۋزەيى اشىلادى. ورتالىقتىڭ الاڭىنا ارتيللەريالىق قوندىرعىلار، اۆياتسيا، برونەتانكىلىك تەحنيكالار سەكىلدى اسكەري تەحنيكالار مەن قارۋ-جاراقتىڭ زاماناۋي ۇلگىلەرى، سونداي-اق ەكىنشى دۇنيەجۇزىلىك سوعىس پەن سوعىستان كەيىنگى جىلدارداعى اسكەري تەحنيكالاردىڭ ۇلگىلەرى قويىلادى. اشىق اسپان استىنداعى اسكەري تەحنيكا مۋزەيى استانالىقتار مەن قالا قوناقتارىنا وتاندىق قارۋ-جاراق تاريحىمەن تانىسۋ، اسكەري تەحنيكالاردى ءوز كوزىمەن كورىپ، قولىمەن ۇستاۋعا دا مۇمكىندىك بەرەدى»، - دەلىنگەن اقپاراتتا.
سونداي-اق مۋزەي قازىرگى جاستاردى قازاقستاندىق پاتريوتيزمگە باۋلىپ، ولاردىڭ وتانعا، تۋعان-تۋىستارىنا، سوعىس ارداگەرلەرىنە، جالپى اسكەري قاقتىعىستاردىڭ قاتىسۋشىلارىنا دەگەن زور قۇرمەت سەزىمىن بەكىتە تۇسپەك.