قازاقستاندا ايىپپۇل مولشەرى تومەندەيدى
بۇل تۋرالى پارلامەنت ءماجىلىسىنىڭ جالپى وتىرىسىندا ق ر ادىلەت ءمينيسترى مارات بەكەتايەۆ ءمالىم ەتتى، دەپ حابارلايدى قازاقپارات ءتىلشىسى.
«ادىلەت مينيسترلىگى مۇددەلى مەملەكەتتىك ورگاندارمەن بىرلەسىپ، قۇقىق قولدانۋ تاجىريبەسى نەگىزىندە اكىمشىلىك قۇقىق بۇزۋشىلىق تۋرالى زاڭنامانى ودان ءارى جەتىلدىرۋ، سونىڭ ىشىندە ونى ىزگىلەندىرۋ جانە اسىرە قاتاڭدىعىن تومەندەتۋ بويىنشا ماسەلەلەردى پىسىقتادى»، - دەپ توقتالدى م. بەكەتايەۆ.
وسى ورايدا، اكىمشىلىك قۇقىق بۇزۋشىلىقتاردىڭ كەيبىر قۇرامدارىن الىپ تاستاۋ ەسكەرىلىپ وتىر.
«رەتتەۋشى ورگانداردىڭ ۇستانىمىنا سايكەس، اكىمشىلىك قۇقىق بۇزۋشىلىقتاردىڭ كەيبىر قۇرامدارىن ازاماتتىق نەمەسە تارتىپتىك ءىس جۇرگىزۋ ارقىلى قاراۋعا بولادى. سونداي-اق، قازىرگى ۋاقىتتا، مەملەكەتتىك ورگانداردىڭ باقىلاۋ-قاداعالاۋ فۋنكتسيالارىن وڭتايلاندىرۋ جانە ولاردى اۆتوماتتاندىرۋ سياقتى ءىس-شارالار ورىندالۋدا. بۇل رەتتە زاڭ جوباسىمەن اكىمشىلىك قۇقىق بۇزۋشىلىقتاردىڭ وتىز ەكى قۇرامدارىن الىپ تاستاۋ ۇسىنىلادى»، - دەدى مينيستر.
بۇدان بولەك، اكىمشىلىك قۇقىق بۇزۋشىلىقتاردىڭ جەكەلەگەن سانكتسيالارىن جەڭىلدەتۋ جانە تومەندەتۋ قاراستىرىلىپ وتىر.
«اكىمشىلىك قۇقىق بۇزۋشىلىق سانكسيالارىنا جۇرگىزگەن تالداۋ ولاردى اكىمشىلىك جاۋاپكەرشىلىكتى ودان ءارى ىزگىلەندىرۋ اياسىندا جەڭىلدەتۋگە جانە تومەندەتۋگە مۇمكىندىك بار ەكەنىن كورسەتتى. مەملەكەتتىك ورگانداردىڭ جانە ۇكىمەتتىك ەمەس ۇيىمداردىڭ ۇسىنىستارى نەگىزىندە، سونداي-اق تالداۋ مەن ستاتيستيكالىق دەرەكتەردى ەسكەرە وتىرىپ، زاڭ جوباسىمەن قىرىق ءتورت قۇرام بويىنشا ايىپپۇل مولشەرىن ازايتۋ، ون قۇرام بويىنشا اسىرە قاتاڭدىقتى تومەندەتۋ، التى قۇرام بويىنشا ەسكەرتۋ ەنگىزۋ ۇسىنىلادى»، - دەدى مارات بەكەتايەۆ.