ءار ءبىر كوپبالالى وتباسىلاردىڭ جەكە الەۋمەتتىك كارتاسى جاسالىپ جاتىر - بەردىبەك ساپاربايەۆ

نۇر-سۇلتان. قازاقپارات - نۇر-سۇلتان قالاسىنىڭ اكىمى باقىت سۇلتانوۆ جانە ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ەلوردانىڭ از قامتىلعان جانە كوپبالالى وتباسىلارىمەن كەزدەستى، دەپ حابارلايدى قازاقپارات ءتىلشىسى.

«بۇرىن وتباسىنىڭ تابىسىن ەسەپتەگەن كەزدە ولاردىڭ بالالارى ءۇشىن الاتىن جاردەماقىسى، سونداي-اق «التىن القا»، «كۇمىس القا» ءۇشىن جانە مۇگەدەك بالا ءۇشىن الاتىن جاردەماقى، سول سياقتى ستيپەنديا، ودان كەيىن جەرگىلىكتى اكىمدىكتەن بەرىلەتىن اقشالاي جاردەماقىلاردىڭ بارلىعى ەسەپتەلەتىن ەدى. وسى جىلدىڭ 1- ساۋىرىنەن باستاپ ول ەسەپتەۋلەردى الىپ تاستادىق. ياعني اتاۋلى الەۋمەتتىك كومەك جانە باسقا دا مەملەكەتتىك قولداۋ كورسەتىلەتىن كەزدە جوعارىدا اتالعان جاردەماقى تۇرلەرى ەسەپكە كىرمەيدى. ەلباسى بىزگە الدىمەن كومەككە مۇقتاج وتباسىلارعا قولداۋ كورسەتۋ كەرەكتىگىن باسا ايتتى. وسى ماقساتتا قازىرگى كۇنى جەرگىلىكتى اتقارۋشى بيلىك وكىلدەرىمەن بىرىگىپ، ءاربىر وتباسىنىڭ جەكە الەۋمەتتىك كارتاسىن جاساۋدامىز. بۇل تاپسىرمانى وسى جىلدىڭ 1- شىلدەسىنە دەيىن ءبىتىرۋىمىز كەرەك، ءدال قازىر ونىڭ %30 دايىن. تولىق جاساپ بولعاندا وتباسىلارعا الەۋمەتتىك قولداۋ كورسەتۋ بويىنشا ودان ارعى باعىتىمىزدى ايقىندايتىن بولامىز»، - دەدى ب. ساپاربايەۆ.

سونداي-اق، مينيستر جاڭا بيزنەس يدەيالاردى ىسكە اسىرۋ ءۇشىن اۋىلدا تۇراتىن كوپبالالى وتباسىلارعا جانە جاستارعا مەملەكەتتىك گرانتتار بەرىلەتىنىن ءسوز ەتتى.

«وسى جىلى قولعا الىنىپ جاتقان اتالعان ساناتقا جاتاتىن وتباسىلاردى قولداۋدىڭ تاعى ءبىر ءتۇرى ول ءوز كاسىبىمدى اشامىن دەگەن ازاماتتارعا گرانتتار مەن ميكروكرەديتتەر بەرۋ. مىسالى، بيىل ءوز كاسىبىمدى دوڭگەلەتەمىن دەگەن 10 مىڭ ادامعا 500 مىڭ تەڭگە كولەمىندە قايتارىمسىز گرانت بەرىلەدى، بۇدان بولەك شاعىن جانە ورتا كاسىپكەرلىكپەن اينالىسامىن دەگەن جاندار ءۇشىن 500 مىڭ تەڭگەدەن 6,5 ميلليون تەڭگەگە دەيىن شاعىن نەسيە بەرۋ قاراستىرىلۋدا. تاعى ءبىر ايتىپ كەتەتىن جايت، كوپبالالى انالار مەن مۇگەدەك بالا تاربيەلەپ وتىرعان انالار ءۇشىن ۇيىندە الەۋمەتتىك جۇمىس ورىندارىن اشۋ جانە سۇرانىسقا يە كاسىپتەرگە قىسقا مەرزىمدى وقىتۋ ۇيىمداستىرىلادى. بۇنىڭ سەبەبى بۇل انالار بالا كۇتىمىنە بايلانىستى ۇيدەن شىعا المايدى سوندىقتان جاعدايدى ۇيلەرىنە اپارىپ جاساۋدامىز»، - دەدى ول.

ودان بولەك، ب. ساپاربايەۆ قازىرگى تاڭدا مينيسترلىك وتباسىلارعا الەۋمەتتىك قىزمەتتەر مەن قولداۋ شارالارىنىڭ 11 بولىكتەن تۇراتىن ءبىرىڭعاي پاكەتى قۇراستىرعانىن ايتىپ بەردى.

1. 1-4-سىنىپ وقۋشىلارىن تەگىن ىستىق تاماقپەن قامتاماسىز ەتۋ؛

2. بالالار مەن انالاردىڭ قوعامدىق كولىكتە جەڭىلدىكپەن ءجۇرۋىن قامتاماسىز ەتۋ؛

3. مەكتەپ فورماسىمەن، وقۋلىقتارمەن جانە وقۋ كەرەك-جاراقتارىمەن قامتاماسىز ەتۋ؛

4. بالاباقشاداعى ورىنعا باسىمدى قۇقىق بەرۋ؛

5. بالالار لاگەرلەرىندە تەگىن دەمالۋ؛

6. كوممۋنالدىق قىزمەتتەر بويىنشا وتەماقى تولەمدەرى، كومىرمەن جانە وتىنمەن قامتاماسىز ەتۋ؛

7. گاز اناليزاتورلارىن، جارىق پەن سۋ ەسەپتەۋىشتەرىن تەگىن ورناتۋ؛

8. كوپبالالى وتباسىلار ءۇشىن ۇيدە ارنايى جۇمىس ورىندارىن قۇرۋ، گرانتتار مەن شاعىن نەسيەلەر بەرۋ؛

9. بارلىق ەڭبەك ەتۋگە قابىلەتتى ا ا ك الۋشىلاردى جۇمىسپەن قامتۋ شارالارى (وقىتۋ، جۇمىسقا ورنالاستىرۋ، جاستار پراكتيكاسى، گرانتتار مەن)؛

10. تۇرعىن ءۇي قۇرىلىس جيناقتارى جۇيەسى ارقىلى تۇرعىن ءۇي جاعدايىن جاقسارتۋ؛

11. ءبىرجولعى الەۋمەتتىك كومەك كورسەتۋ.