ەتنوس وكىلدەرىنىڭ قازاق ەلىنە ايتار العىسى ايرىقشا - روزا پاك
ول وسى باعىتتا جىلدار بويى قاجىرلى جۇمىس اتقارىلعانىن جەتكىزدى، دەپ حابارلايدى قازاقپارات ءتىلشىسى.
روزا پاكتىڭ سوزىنشە، قازاقستان حالقى اسسامبلەياسىنىڭ سەسسيالارى جىل سايىن وزىندىك ەرەكشەلىكتەرىمەن وتەدى.
«بەيبىتشىلىك پەن كەلىسىم فورمۋلاسى: الەۋمەتتىك بىرلىك جانە جاڭعىرتۋ» اتاۋىمەن وتەتىن بيىلعى سەسسيادا تاقىرىبى ايتىپ تۇرعانداي، الەۋمەتتىك- رۋحاني ماسەلەلەرگە ەرەكشە نازار اۋدارىلادى دەگەن ويدامىن. ەل تۇرعىندارىنىڭ باسىم بولىگى تىنىشتىق پەن قوعامدىق كەلىسىمنىڭ ءمانىن ۇقتى. ءوزارا سىيلاستىق پەن بىرلىكسىز قوعامدا بەرەكە بولمايتىنىن ءاربىر قازاقستاندىققا ءتۇسىندىرۋ جولىندا اۋقىمدى جوبالار ىسكە استى» ، - دەيدى كورەي ەتنومادەني بىرلەستىگىنىڭ ءتورايىمى.
بىرلەستىك ءتورايىمىنىڭ ايتۋىنشا، ەلىمىزدە قازاقستان حالقى اسسامبلەياسىنىڭ ورنى ەرەكشە. تۇڭعىش پرەزيدەنتىمىزدىڭ باستاماسىمەن قۇرىلعان بۇل ينستيتۋت قازاق جەرىندە تاتۋلىق پەن كەلىسىم يدەياسىنىڭ قالىپتاسىپ، ىسكە اسۋىنا سۇبەلى ۇلەس قوستى.
«جۇزدەن استام ەتنوس وكىلدەرىن بەرەكەلى شاڭىراق ماڭايىنا توپتاستىرىپ، ەلدىڭ قارىشتاپ ءوسىپ- وركەندەۋىنە سەپتىگىن تيگىزدى. ەتنوستاردىڭ مادەنيەتى مەن سالت- ءداستۇرىن ۇستانۋعا، دارىپتەۋگە جاعداي جاسادى. وسىنداي بايسالدى باستامالار ءۇشىن قازاقستاندىق ەتنوس وكىلدەرىنىڭ بارشا قازاق ەلىنە ايتار العىسى ايرىقشا. ءار جىلعى ق ح ا سەسسيالارىندا ءسوز سويلەگەن ازاماتتاردىڭ وي- پىكىرلەرىنەن وسىنى ۇعۋعا بولادى. بىرلىك بار جەردە ناتيجەلى تىرلىك بولاتىنىن بۇگىندە بارشا ەل تۇرعىندارى ۇعىندى. ءبىز وسى باعىتتا جۇمىستاردى جالعاستىرىپ، بەرەكەلى بىرلىك پەن تۇعىرلى تاتۋلىق جولىن ناسيحاتتاپ، اسسامبلەيا ءتوراعاسى جۇكتەگەن ابرويلى مىندەتتەردى ىسكە اسىراتىن بولامىز» ، - دەيدى روزا پاك.