ەلباسى: توقايەۆ - ءار ىسكە جاۋاپكەرشىلىكپەن قارايتىن مەملەكەت قايراتكەرى
«ەلىمىزدەگى بيلىك ساباقتاستىعىن جالعاستىرۋ - اتا زاڭىمىزعا تولىق سايكەس كەلەدى. ەكى اپتا بۇرىن مەملەكەت باسشىسى قاسىم-جومارت كەمەل ۇلى توقايەۆ كەزەكتەن تىس سايلاۋ وتكىزۋ تۋرالى جارلىققا قول قويدى. بۇل جان-جاقتى ويلاستىرىلىپ جاسالعان قادام. قاسىم-جومارت كەمەل ۇلى ءاربىر ىسكە زور جاۋاپكەرشىلىكپەن قارايتىن مەملەكەت قايراتكەرى. ول ايقىن ساياسات جۇرگىزۋدىڭ قانشالىقتى ماڭىزدى ەكەنىن جاقسى بىلەدى»، - دەدى ەلباسى.
وسى ورايدا ن. نازاربايەۆ قازاقستان بۇكىل الەمگە دەموكراتيالىق دامۋ جولىن تاڭداعانىمىزدى تاعى دا ءبىر كورسەتكەنىن اتاپ ءوتتى.
«پرەزيدەنتتىك وكىلەتتىگىمدى توقتاتقاننان سوڭ، ءبىرقاتار ەلدەردىڭ باسشىلارىمەن سويلەستىم. كوپشىلىگىنەن ءالى كۇنگە دەيىن حاتتار كەلىپ ءتۇسىپ جاتىر. سولاردىڭ بارلىعى بيلىكتى بەرۋدىڭ وزىندىك ۇلگىسىن جۇزەگە اسىرىپ جاتقانىمىزعا قۇرمەتپەن قارايتىنىن جەتكىزدى. ەڭ الدىمەن، الداعى پرەزيدەنت سايلاۋى حالقىمىزدى بيىك ماقساتتارعا جۇمىلدىرۋعا ءتيىس دەپ سانايمىن. ەلىمىز ءۇشىن تۇراقتىلىق پەن تاتۋلىقتان ارتىق ەش نارسە جوق. تىنىشتىقتا ءومىر ءسۇرىپ، الاڭسىز ەڭبەك ەتكەنگە، باقىتتى ۇرپاق تاربيەلەگەنگە نە جەتسىن. مىنە، ەڭ باستىسى وسى»، - دەدى تۇڭعىش پرەزيدەنت.
ەستەرىڭىزدە بولسا، 9- ساۋىردە رەسپۋبليكالىق تەلەارنالاردان قازاقستان حالقىنا ۇندەۋ جاريالاعان مەملەكەت باسشىسى قاسىم-جومارت توقايەۆ ەلىمىزدىڭ كونستيتۋتسياسىنا سايكەس ق ر پرەزيدەنتىنىڭ كەزەكتەن تىس سايلاۋىن 2019-جىلدىڭ 9- ماۋسىمدا وتكىزۋ تۋرالى شەشىم قابىلداعانىن جاريا ەتكەن بولاتىن.