ەلوردادا «نۇر وتان» پارتياسىنان پرەزيدەنتتىككە كانديدات انىقتالادى
سەزد بارىسىندا 2019-جىلدىڭ 9- ماۋسىمىنا تاعايىندالعان كەزەكتەن تىس پرەزيدەنتتىك سايلاۋعا پارتيا اتىنان تۇسەتىن كانديداتتىڭ ەسىمى جاريا ەتىلەدى. قازىرگى ۋاقىتتا پارتيا سەزىنە وڭىرلەردەن كەلەتىن دەلەگاتتاردىڭ سانى بەلگىلى. ماسەلەن، الماتى وبلىسىنان 45، قىزىلوردا وبلىسىنان 30 دەلەگات كەلگەن. سەزد جۇمىسىنا ق ر پرەزيدەنتى قاسىم-جومارت توقايەۆ، پارلامەنت پالاتالارىنىڭ ءتوراعالارى داريعا نازاربايەۆا مەن نۇرلان نىعماتۋلين، پرەمەر-مينيستر اسقار مامين، ۇكىمەت مۇشەلەرى، دەپۋتاتتار، جالپى 1500 دەن استام ادام قاتىسىپ وتىر.
ايتا كەتەرلىگى، 10- ساۋىردە ەلباسى «Nur Otan» پارتياسىنىڭ كەزەكتەن تىس ⅩⅨ سەزىن شاقىرۋ تۋرالى قاۋلىعا قول قويدى. سول كۇنى نۇرسۇلتان نازاربايەۆ پارتيانىڭ ورتالىق اپپاراتى قۇرىلىمدىق بولىمشەلەرىنىڭ جەتەكشىلەرىمەن كەڭەس وتكىزدى.
وندا ق ر تۇڭعىش پرەزيدەنتى كەزەكتەن تىس پرەزيدەنتتىك سايلاۋدىڭ وتۋىنە بايلانىستى «Nur Otan» پارتياسى الداعى سايلاۋ ناۋقانىنا بەلسەندى قاتىسۋعا ءتيىس ەكەنىن ايتتى.
«بۇل سايلاۋ بيلىكتىڭ زاڭدىلىعىن ودان ءارى نىعايتىپ، ەلىمىزدە تۇراقتىلىقتى قامتاماسىز ەتۋ ءۇشىن قاجەت. ەندى بىزگە پارتيانىڭ سەزىن وتكىزىپ، ەل پرەزيدەنتتىگىنە كانديداتۋرا ۇسىنۋىمىز كەرەك. پارتيانىڭ اپپاراتى سەزدى وتكىزۋ ءۇشىن قاجەتتى جۇمىستاردىڭ ءبارىن جىلدام ىسكە اسىرۋعا ءتيىس. پارتيامىزدىڭ اتىنان كانديداتۋرا ۇسىنعاننان كەيىن قوعامدىق سايلاۋ شتابىنىڭ جۇمىسىن ۇيىمداستىرۋ قاجەت. بۇل جۇمىسپەن مەنىڭ ءبىرىنشى ورىنباسارىم ماۋلەن اشىمبايەۆ اينالىسادى»، - دەگەن ەدى ەلباسى.
ال كەشە «Nur Otan» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ پارتيا ساياسي كەڭەسىنىڭ وتىرىسىن وتكىزدى. وعان ساياسي كەڭەس مۇشەلەرى، سونىڭ ىشىندە قازاقستان رەسپۋبليكاسى پارلامەنتىنىڭ دەپۋتاتتارى، اتقارۋشى مەملەكەتتىك ورگانداردىڭ جانە ۇكىمەتتىك ەمەس ۇيىمداردىڭ باسشىلارى، كاسىپكەرلەر، دارىگەرلەر، ءبىلىم، مادەنيەت، سپورت سالاسىنىڭ وكىلدەرى، قازاقستان حالقى اسسامبلەياسىنىڭ مۇشەلەرى جانە تاعى باسقالار قاتىستى. سونداي-اق وتىرىسقا پارتيانىڭ كەزەكتەن تىس XIX سەزىنىڭ دەلەگاتتارى دا شاقىرىلدى. ءىس-شارا بارىسىندا بۇگىنگى سەزدىڭ قاراۋىنا شىعارىلاتىن قازاقستان رەسپۋبليكاسىنىڭ پرەزيدەنتتىگىنە «Nur Otan» پارتياسىنان كانديدات ۇسىنۋ تۋرالى ماسەلە تالقىلانىپ، سەزدىڭ جۇمىس ورگاندارىنىڭ قۇرامى پىسىقتالدى.
ەستەرىڭىزدە بولسا، 9- ساۋىردە رەسپۋبليكالىق تەلەارنالاردان قازاقستان حالقىنا ۇندەۋ جاريالاعان مەملەكەت باسشىسى قاسىم-جومارت توقايەۆ ەلىمىزدىڭ كونستيتۋتسياسىنا سايكەس ق ر پرەزيدەنتىنىڭ كەزەكتەن تىس سايلاۋىن 2019-جىلدىڭ 9- ماۋسىمدا وتكىزۋ تۋرالى شەشىم قابىلداعانىن جاريا ەتكەن بولاتىن.