ءاليحان سمايىلوۆ: ەلوردادا جەڭىل رەلستى كولىك قۇرىلىسى بويىنشا جوبا جالعاسادى
«نۇر- سۇلتاندا جەڭىل رەلستى كولىك قۇرىلىسىنا كەلەر بولساق، بۇل باعىتتاعى جۇمىس جالعاستىرۋدى قاجەت ەتەدى. بۇل ينۆەستيتسيالىق جوبا جۇزەگە اسىرىلادى. قازىرگى تاڭدا قىتايدىڭ مەملەكەتتىك دامۋ بانكىمەن كەلىسسوزدەر جۇرگىزىلىپ جاتىر. بۇل زايمدى قايتا قارجىلاندىرۋ تۋرالى كەلىسەتىن سەكىلدىمىز، ياعني وسى جوبانى قارجىلاندىرۋعا قاتىستى ەل ىشىندە قارجى كوزى ىزدەلەتىن بولادى»، - دەيدى ءاليحان سمايىلوۆ ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرىپ.
مينيستر قازىرگى ۋاقىتتا جوبانى قايتا قارجىلاندىرۋ كوزدەرى ىزدەستىرىلىپ جاتقانىن ايتىپ ءوتتى.
«مەملەكەتتىك دامۋ بانكى جەلىسى بويىنشا ماسەلەلەر تۋىنداعاندىقتان، بۇل سۇراقتاردى نۇر- سۇلتان اكىمدىگىنە جولداۋعا بولادى. ال ءبىز، قايتا قارجىلاندىرۋ بويىنشا باسقا كوزدەردى ىزدەستىرۋدەمىز»، - دەيدى مينيستر.
ەسكە سالا كەتسەك، وتكەن اپتادا LRT قۇرىلىسى ۋاقىتشا توقتاتىلعانىن ءمالىم ەتكەن ەدى. ونىڭ ايتۋىنشا، سوڭعى ەكى جىلدا ەلوردادا 12 ءىرى نىسان پايدالانۋعا بەرىلسە، بيىل تەك 4 ءىرى جوبا عانا قولعا الىنىپ وتىر.
«ءبىراق ونىڭ ىشىندە لرت جەلىسىنىڭ قۇرىلىسىن توقتاتا تۇرۋعا بايلانىستى ول دا ءوزىنىڭ اسەرىن بەرىپ وتىر. قازىرگى كەزدە ءبىز ۇكىمەت پەن ۇلتتىق بانكپەن بىرگە بۇل ماسەلەنى ىشكى كوزدەردەن قارجىلاندىرۋدى پىسىقتاۋدامىز. سونىمەن قاتار، قالانىڭ ينۆەستيتسيالىق جوبالارىن رەسپۋبليكالىق بيۋدجەتتەن قارجىلاندىرۋ كولەمى 198 ميلليارد تەڭگەدەن 115 ميلليارد تەڭگەگە دەيىن تومەندەۋى دە ءوز اسەرىن بەرىپ وتىر»، - دەپ اتاپ كورسەتتى ب. سۇلتانوۆ.
اۆتور: ايان بەكەن ۇلى