كاسىپقوي بوكستا كوپ ۋاقىت قالمادى: گولوۆكين ايقاسى الدىندا سۇحبات بەردى
بۇل تۋرالى ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىندا جازىلدى، دەپ حابارلايدى قازاقپارات.
گولوۆكين بوكسقا قايتا ورالعانىنا قۋانىشتى ەكەنىن جاسىرمادى. ول Madison Square Garden ارەناسىن ءوزىنىڭ ەكىنشى ءۇيى دەپ اتادى. گولوۆكين بۇل جەردە 5 جەكپە- جەگىن وتكىزگەن. روللسپەن 8- ماۋسىمدا بولاتىن ايقاس تا تاپ وسى جەردە ۇيىمداستىرىلادى.
«بۇل كەزدەسۋدى قابىلداۋعا كەلىسكەنى ءۇشىن MSG وتباسىنا العىس ايتامىن. مەن مۇندا كوپتەگەن جەكپە- جەگىمدى وتكىزدىم: مۇندا جانكۇيەرلەر، اتموسفەرا كەرەمەت!»، - دەدى ول.
بۇدان كەيىن GGG جانكۇيەرلەردىڭ كوڭىلىنەن قالماس ءۇشىن تاماشا شوۋ كورسەتۋگە ۋادە ەتتى. سەبەبى ونىڭ جانە رولسستىڭ كاسىپقوي بوكستاعى كۇندەرى ساناۋلى. وسى رەتتە ول وزىنە جانە قارسىلاسىنا دەنساۋلىق تىلەدى. «سپورتشىعا سپورتشى رەتىندە ايتارىم، وسى جەردە نە ايتىلسا دا، ول رينگتە تەك ەكەۋىمىز عانا بولاتىنىمىزدى بىلەدى. ەڭ مىقتىسى جەڭەدى. وعان ساتتىلىك تىلەگىم كەلەدى. ەكەۋىمىز دە ۇيىمىزگە اما- ەسەن ورالۋىمىزدى تىلەيمىن. كوپ ۋاقىت قالمادى، ءبىراق ءبىز فاناتتارعا تاماشا شوۋ سىيلاعىمىز كەلەدى»، - دەدى ول.
ءوز كەزەگىندە روللس گولوۆكينگە قۇرمەت بىلدىرە وتىرىپ، الداعى ايقاسىنا ءوز جوسپارى بارىن جەتكىزدى. «جاڭالىقتاردى وقىدىم. وندا ءبىزدىڭ ايقاستى بوي قىزدىرۋ جەكپە- جەگى دەپ اتاعان ەكەن. «ستيۆ روللس كىم؟» دەپ سۇراپ جاتىر. سىنشىلار مەن فاناتتارعا ايتارىم، مەن 8 - ماۋسىم كۇنى جۇدىرىقتاسۋعا شىعامىن، ولارعا كىم ەكەنىمدى كورسەتەمىن. وسى كەشتەن كەيىن مەن تۋرالى ۇمىتپايتىن بولاسىزدار! گەنناديدى قاتتى قۇرمەتتەيمىن. ءبىراق 8 - ماۋسىم كۇنى الەمدى ەسەڭگىرەتۋگە بەل بايلاپ وتىرمىن!»، - دەدى كانادالىق بوكسشى.
روللستىڭ پروموۋتەرى لۋ ديبەللا قولاستىنداعى شاكىرتىنە سەنىمدى بولسا دا، گەننادييگە قۇرمەتىن جاسىرمادى. «گولوۆكين - الەمنىڭ ەڭ ۇزدىك بوكسشىلارىنىڭ ءبىرى، تاريحتا بولعان ورتا سالماقتاعى ەڭ ۇزدىك سپورتشى، ءوز بۋىنىنىڭ ەڭ ۇزدىك بوكسشىسى جانە داڭق زالىنىڭ كەلەشەك مۇشەسى. بۇل جىگىتتى ۇلى ەتكەنى، ونىڭ ءاردايىم بار كۇش- جىگەرىن سالاتىنى جانە كەز كەلگەن ايقاسقا كاسىبي تۇرعىدا دايىن بولادى»، - دەدى ول.
ەسكە سالايىق، باسپا ءسوز ءماسليحاتىنان كەيىن قوس بوكسشىنىڭ كوز ارباسۋ ءراسىمى ءوتتى.
بۇعان دەيىن گەننادي گولوۆكين 8 - ماۋسىم كۇنى Madison Square Garden ارەناسىندا وتەتىن جەكپە- جەگىنە بيلەتتەر ساتىلا باستاعانىن حابارلاعان بولاتىن.
اۆتور: ميرا تولەندى قىزى