ەلباسى كورەيانىڭ پرەزيدەنتىمەن كەزدەستى
اڭگىمەلەسۋ بارىسىندا ەلباسى نۇرسۇلتان نازاربايەۆ مارتەبەلى قوناققا ءىلتيپات ءبىلدىرىپ، ەكى مەملەكەت اراسىنداعى ەكونوميكالىق جانە ساياسي ىنتىماقتاستىقتىڭ تيىمدىلىگىن ايتتى.
- سىزبەن قازاقستاندا جۇزدەسكەنىمە قۋانىشتىمىن. تاۋەلسىزدىگىمىزدىڭ العاشقى كۇنىنەن باستاپ وڭتۇستىك كورەيامەن جاقسى قارىم- قاتىناس ورناتتىق. ءبىز ەكونوميكالىق جانە ساياسي ىنتىماقتاستىعىمىزدى جاڭادان قالىپتاستىردىق. سىزدەردىڭ جالپى قازاقستانعا جانە ورتالىق ازياعا دەگەن ىقىلاستارىڭىزدى جوعارى باعالايمىز، - دەدى قازاقستاننىڭ تۇڭعىش پرەزيدەنتى.
نۇرسۇلتان نازاربايەۆ وڭتۇستىك كورەيا مەن كورەي حالىق دەموكراتيالىق رەسپۋبليكاسى اراسىندا قول جەتكىزىلگەن كورەيارالىق ۋاعدالاستىقتاردى جۇزەگە اسىرۋدىڭ ماڭىزدىلىعىن اتاپ ءوتتى.
- سىزدەر كۇردەلى ماسەلەمەن - كورەي تۇبەگىندە بەيبىتشىلىك پەن ءوزارا سەنىم ورناتۋ ىسىمەن اينالىسىپ جاتىرسىزدار. بۇل وڭاي ەمەس، ءبىراق بۇل - يگىلىكتى ءىس. سىزدەردىڭ كۇش- جىگەرلەرىڭىزگە جان- جاقتى قولداۋ كورسەتۋگە دايىنبىز، - دەدى ەلباسى نۇرسۇلتان نازاربايەۆ.
وڭتۇستىك كورەيا پرەزيدەنتى قازاقستاننىڭ تۇڭعىش پرەزيدەنتىنە جۇزدەسكەنى ءۇشىن ريزاشىلىق ءبىلدىرىپ، بۇل ساپاردىڭ ەكىجاقتى بايلانىستاردى دامىتۋ ءۇشىن ماڭىزدى ەكەنىن ايتتى.
- بريۋسسەلدە وتكەن اسەم ءسامميتى اياسىندا كەزدەسكەنىمىز ەسىمدە. سول كەزدە مەنى قازاقستانعا ساپارمەن كەلۋگە شاقىردىڭىز. مەن بۇل ساپارعا باسا ءمان بەرەمىن. ويتكەنى بيىل ەكى ەل اراسىنداعى ستراتەگيالىق سەرىكتەستىگىمىزدىڭ 10 جىلدىعىن اتاپ وتەمىز، - دەدى مۋن چجە ين.
وڭتۇستىك كورەيا پرەزيدەنتى قازاقستاننىڭ ەكونوميكالىق دامۋ تۇرعىسىنان قول جەتكىزگەن جەتىستىكتەرىنىڭ ءبارى نۇرسۇلتان نازاربايەۆتىڭ كورەگەن ساياساتىنىڭ ارقاسى ەكەنىن ەرەكشە اتاپ ءوتتى.
سونداي- اق، مۋن چجە ين قازاقستاننىڭ بەيبىتشىلىك پەن كەلىسىم باعىتىندا، سونىڭ ىشىندە يادرولىق قارۋسىزدانۋ مەن ونى تاراتپاۋ سالاسىندا جۇرگىزىپ جاتقان ساياساتىنا توقتالدى.
كەزدەسۋ سوڭىندا ەلباسى نۇرسۇلتان نازاربايەۆ پەن وڭتۇستىك كورەيا پرەزيدەنتى مۋن چجە ين قازاقستاننىڭ تۇڭعىش پرەزيدەنتى كىتاپحاناسىنىڭ كورمەسىندەگى ەكسپوزيتسيالارمەن تانىستى.