19:06, 22 - ءساۋىر 2019 | GMT +6
كيىك ءمۇيىزىنىڭ «ساۋداگەرلەرى» ۇستالدى
اقتوبە. قازاقپارات - اقتوبەدە كيىك ءمۇيىزىن ساتىپ الىپ، ساتىپ جۇرگەندەر ۇستالدى، دەپ حابارلايدى قازاقپارات ءتىلشىسى.
اقتوبە وبلىستىق پوليتسيا دەپارتامەنتى كيىك مۇيىزدەرىن ساتۋ، ساتىپ الۋمەن اينالىسقان ادامداردى اشكەرەلەدى. سونىمەن قاتار اقتوبە وبلىسىنىڭ ايتەكە بي اۋدانىندا كيىك ءمۇيىزىن زاڭسىز ساقتاعاندار انىقتالدى.
«ايتەكە بي اۋدانىنداعى اۋىلدىق وكرۋگتەردىڭ ءبىرىنىڭ تۇرعىنى جازعى قونىسىندا 20 كيىك ءمۇيىزىن، 2 اڭشى مىلتىعى مەن وق-ءدارى ساقتاعانى انىقتالىپ، تاركىلەندى»، - دەپ حابارلادى وبلىستىق پوليتسيا دەپارتامەنتىنىڭ باسپا ءسوز قىزمەتى.
وسى دەرەك بويىنشا قىلمىستىق كودەكستىڭ «وسىمدىكتەردىڭ نەمەسە جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ» بابى بويىنشا سوت الدى تەرگەۋ- تەكسەرۋ امالدارى جۇرگىزىلۋدە. كۇدىكتىلەر ءوز كىنالارىن مويىندادى.