قازاقستان مەن كورەيا پرەزيدەنتتەرى شاعىن قۇرامدا كەلىسسوزدەر وتكىزدى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ كورەيا رەسپۋبليكاسىنىڭ پرەزيدەنتى مۋن چجە ينمەن شاعىن قۇرامدا كەلىسسوزدەر وتكىزدى، دەپ حابارلايدى اقوردا.

اقوردا رەزيدەنتسياسىندا رەسمي قارسى الۋ راسىمىنەن كەيىن مەملەكەتتەر باسشىلارىنىڭ شاعىن قۇرامداعى كەلىسسوزدەرى ءوتتى.

قاسىم-جومارت توقايەۆ پرەزيدەنت مۋن چجە ءيننىڭ العاشقى مەملەكەتتىك ساپارى قازاقستان-وڭتۇستىك كورەيا اراسىنداعى ساياسي ديالوگ پەن ەكونوميكالىق ءىس-قيمىلداردىڭ دامۋىنا سەرپىن بەرەتىنىن اتاپ ءوتتى. قازاقستان پرەزيدەنتى كۇن تارتىبىندەگى بارلىق ماسەلەلەرگە قاتىستى تابىستى كەلىسسوزدەر ءوتىپ، ەكىجاقتى ءتيىمدى شەشىمدەر قابىلداناتىنىنا سەنىم ءبىلدىردى.

«پرەزيدەنت مىرزا، نۇر- سۇلتان قالاسىنا قوش كەلدىڭىز! ءبىز كەشە ەكى جاقتى ىنتىماقتاستىقتىڭ ماڭىزدى ماسەلەلەرىن تالقىلادىق. بۇل ءسىزدىڭ قازاقستان رەسپۋبليكاسىنا العاشقى مەملەكەتتىك ساپارىڭىز. كەشە ءسىز ۇلتتىق باتىرلارىڭىزدىڭ مايىتتەرىن وتانعا قايتارعان ماڭىزدى راسىمگە قاتىستىڭىز. وسى وقيعاعا وراي قۇتتىقتاۋىمدى قابىل الىڭىز»، - دەدى مەملەكەت باسشىسى.

پرەزيدەنت مۋن چجە ين قازاقستانعا مەملەكەتتىك ساپارمەن شاقىرىپ، جىلى قابىلداعانى ءۇشىن ريزاشىلىعىن ءبىلدىردى. ونىڭ ايتۋىنشا، بۇل ساپار بيىل اتاپ وتىلەتىن قازاقستان رەسپۋبليكاسى مەن كورەيا رەسپۋبليكاسى اراسىنداعى ستراتەگيالىق ارىپتەستىكتىڭ 10 جىلدىعى قارساڭىندا ەرەكشە ماڭىزعا يە.

«قازاقستان - ەۋرازيا قۇرلىعىندا بەيبىتشىلىك ورناتۋعا جانە ەكونوميكالىق ىنتىماقتاستىقتى كەڭەيتۋگە باعىتتالعان كورەيا رەسپۋبليكاسىنىڭ «جاڭا سولتۇستىك ساياساتىن» جۇرگىزۋدەگى نەگىزگى ارىپتەسى. مەنىڭ بۇل ساپارىم ەكىجاقتى قارىم-قاتىناستاردى عانا ەمەس، سونىمەن قاتار، كورەيا رەسپۋبليكاسى مەن ورتالىق ازيا ەلدەرى اراسىنداعى كوپجاقتى ءوزارا ءىس-قيمىلداردى نىعايتۋعا سەرپىن بەرەدى دەپ ۇمىتتەنەمىن»، - دەدى وڭتۇستىك كورەيا پرەزيدەنتى.

كەزدەسۋدە تاراپتار ساياسات، ساۋدا-ەكونوميكالىق، مادەني-گۋمانيتارلىق سالالارىنداعى ەكىجاقتى ىنتىماقتاستىقتى، سونداي-اق، ەكى ەلدىڭ حالىقارالىق ۇيىمدار اياسىنداعى ءوزارا ءىس-قيمىلدارىن تالقىلادى.