قاسىم-جومارت توقايەۆ: كورەيا - قازاقستان ءۇشىن باسىمدىققا يە ەل
بۇل تۋرالى بۇگىن ەلىمىزگە مەملەكەتتىك ساپارمەن كەلگەن كورەيا رەسپۋبليكاسىنىڭ پرەزيدەنتى مۋن چجە ينمەن كەڭەيتىلگەن قۇرامداعى كەلىسسوز بارىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارت ءتىلشىسى.
«قازاقستاننىڭ تاۋەلسىزدىگى جىلدارى ىشىندە ءبىزدىڭ قارىم-قاتىناسىمىز بارلىق دەرلىك باعىتتاردا ءوزارا ءىس-قيمىلدىڭ ساپالى جاڭا دەڭگەيىنە كوتەرىلدى. ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا، ىسكەرلىك كەڭەسى جۇمىس ىستەپ تۇر. ءبىزدىڭ ەلدەرىمىزدىڭ ازاماتتارى ءۇشىن ۆيزاسىز رەجيم ىسكە قوسىلعان، مەملەكەتتەرىمىزدىڭ اراسىندا تۇراقتى تىكەلەي اۋە قاتىناستارى اشىلعان. ەكىجاقتى تاۋار اينالىمى كولەمىنىڭ تۇراقتى ءوسىپ كەلە جاتقاندىعى دا قۋانتادى. وتكەن جىلدىڭ قورىتىندىسىندا ونىڭ كورسەتكىشى رەكوردتىق 4 ميلليارد دوللارعا جەتىپ، 2017-جىلعى كولەمنەن 2 ەسەگە جۋىق اسىپ ءتۇستى»، - دەدى ق ر پرزيدەنتى اقوردادا.
مەملەكەت باسشىسى كورەيا رەسپۋبليكاسى قازاقستان ءۇشىن ساۋدا-ينۆەستيتسيالىق جانە تەحنولوگيالىق ىنتىماقتاستىق تۇرعىسىندا باسىمدىققا يە 10 ەلدىڭ قاتارىنا كىرەتىندىگىن اتاپ ءوتتى.
«ءبىز بۇل باعىتتا جاڭا مۇمكىنشىلىكتەردى ىزدەۋگە جانە ءوزارا ءىس-قيمىلدى ودان ارى تەرەڭدەتۋگە مۇددەلىمىز. قازاقستانعا سالىنعان تىكەلەي ينۆەستيتسيا اعىنىنىڭ ءوزى شامامەن 7 ميلليارد دوللاردى قۇرادى. بۇل سالادا تابىسقا جەتۋ دەرەكتەرىنىڭ سانى جەتكىلىكتى. بۇل كەزەڭدەگى ءىرى جوبالاردىڭ ءبىرى كورەيلىك كومپانيالاردىڭ قاتىسۋىمەن جۇزەگە اسىرىلىپ جاتقان ۇلكەن الماتى اينالما اۆتوموبيل جولىنىڭ قۇرىلىسى سانالادى. كورەي بيزنەسى قازاقستاننىڭ تاماق، تاۋ-كەن بايىتۋ، اۆتوموبيل جانە باسقا دا سالالاردا جەمىستى جۇمىس ىستەۋدە. وسى مىسالداردىڭ بارلىعى قازاقستانعا ينۆەستيتسيا سالۋعا قىزىعۋشىلىق تانىتاتىن وزگە دە وڭتۇستىك كورەيلىك كومپانيالار ءۇشىن جاعىمدى كورسەتكىش»، - دەدى ق. توقايەۆ.