قازاقستاندا ينۆەستيتسيالار تارتۋ جونىندەگى ۇيلەستىرۋ كەڭەسى قۇرىلدى

نۇر-سۇلتان. قازاقپارات - پرەمەر-مينيستر اسقار ءماميننىڭ توراعالىعىمەن ەلىمىزدە ينۆەستيتسيالار تارتۋ جونىندەگى ۇيلەستىرۋ كەڭەسى قۇرىلدى، دەپ حابارلايدى قازاقپارات ءتىلشىسى.

«وسى جۇيەلى پروبلەمالاردى شەشۋ ءۇشىن 19- ساۋىردە جۇمىس توبىنىڭ ۇسىنىستارى نەگىزىندە ۇكىمەت «قازاقستان رەسپۋبليكاسىنا شەتەلدىك ينۆەستيتسيالار تارتۋ جونىندەگى شارالاردى كۇشەيتۋ تۋرالى» قاۋلى قابىلدادى. وسى قاۋلىمەن شىن مانىندە ينۆەستيتسيالار تارتۋ بويىنشا جۇمىستىڭ جاڭا جوباسى جاسالدى. بۇل ەلىمىزدەگى ينۆەستيتسيالىق قىزمەتكە سەرپىن بەرەدى»، - دەيدى پرەمەر-ءمينيستردىڭ ءبىرىنشى ورىنباسارى- قارجى ءمينيسترى ءاليحان سمايىلوۆ ۇكىمەت وتىرىسىندا.

ءمينيستردىڭ ايتۋىنا قاراعاندا، جاڭا جوبادا ق ر پرەمەر-ءمينيسترىنىڭ توراعالىعىمەن ينۆەستيتسيالار تارتۋ ماسەلەلەرى جونىندەگى ۇيلەستىرۋ كەڭەسى اۋقىمدى جۇمىستار اتقاراتىن بولادى. وعان ستراتەگيالىق ينۆەستيتسيالىق جوبالاردى ىسكە اسىرۋدىڭ ەرەكشە شارتتارىن ۇسىنۋ جونىندەگى وكىلەتتىكتەر زاڭنامالىق دەڭگەيدە بەكىتىلەتىن بولادى.

«بۇل ينۆەستيتسيالىق جوبالاردى ءتيىمدى ىسكە اسىرۋ ءۇشىن قاجەتتى شەشىمدەردى جەدەل قابىلداۋعا مۇمكىندىك بەرەدى. كەڭەس قۇرامىنا پرەمەر- ءمينيستردىڭ ءبىرىنشى ورىنباسارى، پرەمەر-ءمينيستردىڭ ورىنباسارى، نەگىزگى مينيسترلىكتەردىڭ (ادىلەت، سىرتقى ىستەر، ۇلتتىق ەكونوميكا، يندۋستريا جانە ينفراقۇرىلىمدىق دامۋ، ەنەرگەتيكا، اۋىل شارۋاشىلىعى، ىشكى ىستەر)، استانا حالىقارالىق قارجى ورتالىعىنىڭ، ۇلتتىق باسقارۋشى حولدينگتەردىڭ، ۇلتتىق كومپانيالاردىڭ، «اتامەكەن» ۇلتتىق كاسىپكەرلەر پالاتاسىنىڭ ءبىرىنشى باسشىلارى، سونداي-اق جوعارعى سوتتىڭ، باس پروكۋراتۋرانىڭ جانە ۇلتتىق قاۋىپسىزدىك كوميتەتىنىڭ باسشىلارى كىردى»، - دەيدى مينيستر.

ەسكە سالا كەتسەك، بۇعان دەيىن ءاليحان سمايىلوۆ ۇكىمەت وتىرىسىندا ەلگە ينۆەستيتسيا تارتۋ جولىنداعى كەدەرگىلەردى اتاعان بولاتىن.

«سوندىقتان، بىزگە ساپالى ينۆەستيتسيا تارتۋ ءۇشىن جاڭا تەتىكتەر كەرەك. قولدانىستاعى مەحانيزمدەرگە تالداۋ جۇرگىزىلىپ، تيىمسىزدەرى بەلگىلەندى. نەگىزگى تۇجىرىم مىناداي: قازىرگى ۋاقىتتا مەملەكەتتىك ورگاندار مەن ۇيىمدار اراسىندا ينۆەستيتسيا سالاسىندا ينۆەستيتسيالاردى جالپى ۇيلەستىرۋ جوق. ينۆەستيتسيالىق كليماتتى قالىپتاستىرۋدا مينيسترلىكتەر، ۇلتتىق كومپانيالار، اكىمدىكتەر مەن باسقالار اينالىسادى. ءبىراق ولار ءارقايسىسى ءوز بەتىمەن جۇمىس جاسايدى. ا ح ق و- دا جاسالعان قۇرالدار پايدالانبايدى. الەمدىك ينۆەستيتسيالىق قوعام ءۇشىن تۇسىنىكتى فورماتتا رەسىمدەلگەن جانە ۇسىنىلعان تارتىمدى جوبالاردىڭ سانى جەتكىلىكسىز»، - دەيدى ءاليحان سمايىلوۆ.