كۇي اناسى دينا نۇرپەيىسوۆاعا ەلوردادا ەسكەرتكىش ورناتىلماق

None
None
نۇر- سۇلتان. قازاقپارات - ۇلى كۇيشى، كومپوزيتور، قازاقستاننىڭ حالىق ءارتىسى دينا نۇرپەيىسوۆاعا ەلوردادا ەسكەرتكىش ورناتىلماق، دەپ حابارلايدى قازاقپارات ءتىلشىسى.

ق ر پارلامەنتى ءماجىلىسىنىڭ ءبىرىنشى شاقىرىلىمىنىڭ دەپۋتاتى، قوعام قايراتكەرى، پەداگوگيكا عىلىمدارىنىڭ كانديداتى، پروفەسسور تولەگەن قۋانىشيەۆتىڭ ءمالىم ەتكەنىندەي، كۇي اناسىنا ەسكەرتكىش قويۋ ماسەلەسى ءبىرازدان بەرى اڭگىمە بولىپ كەلەدى.

- پارلامەنت قابىرعاسىندا جۇرگەن كەزدەن بەرى بۇل ماسەلەنى قوزعاپ كەلە جاتىر ەدىك. دينا انامىزداي ۇلى كۇيشىگە ەلوردامىزدا ەڭسەلى ەسكەرتكىش ورناتىلسا، ونىڭ قالا ءۇشىن كورىكتى جەر بولاتىنى، ال جاس ۇرپاق ءۇشىن تاربيەلىك ءمانى زور ەكەنى اقيقات. جۋىردا مادەنيەت جانە سپورت مينيسترلىگىنەن حات الدىم. وندا قازاقستاندا ورناتىلاتىن مونۋمەنتتى ونەردىڭ جاڭا قۇرىلىستارىن ورناتۋ جونىندەگى كوميسسيا وتىرىسىنىڭ حاتتاماسى قوسا جىبەرىلگەن. سونىڭ ىشىندە نۇر-سۇلتان قالاسىندا ءبىرقاتار ەسكەرتكىشتەر ورناتىلاتىنى باياندالعان. اتالعان حاتتامادا دينا نۇرپەيىسوۆانىڭ ەسكەرتكىشى بوي كوتەرەتىنى اتاپ كورسەتىلگەن، - دەدى تولەگەن شاڭعىتباي ۇلى.

سونىمەن قاتار كۇي اناسىنا شوبەرە بولىپ كەلەتىن ت. قۋانىشيەۆ ءوز سوزىندە دينا نۇرپەيىسوۆا ەنتسيكلوپەدياسىن شىعارۋدى قولعا العانىن جەتكىزدى. سوعان وراي ءبىراز جىلدان بەرى كۇيشىنىڭ ءومىرى مەن شىعارماشىلىعىن تۇگەل قامتيتىن ماتەريالداردى جيناپ كەلە جاتقانىن ايتتى. قازىر ەنتسيكلوپەديا جوباسى 500 بەتتەن اسقان.

ايتا كەتۋ كەرەك، دينا نۇرپەيىسوۆا 1861-جىلى قازىرگى باتىس قازاقستان وبلىسى، جاڭاقالا اۋدانىنىڭ بەكەتاي قۇمىندا دۇنيەگە كەلگەن. 1955-جىلى الماتى قالاسىندا ومىردەن وزدى. ول 9 جاسىنان باستاپ دومبىرا تارتقان، سول كەزدە كۇي اتاسى قۇرمانعازى جاس دارىن يەسىنىڭ بولاشاقتا ۇلكەن كۇيشى بولاتىنىن اڭعارىپ، ديناعا باتاسىن بەرگەن. دينانىڭ جان تەبىرەنتەرلىك عاجاپ كۇيلەرى حالقىمىزدىڭ رۋحاني قازىناسىن تولىقتىردى. ونىڭ كۇيلەرى ەلىمىزدىڭ التىن قورىندا ساقتاۋلى تۇر.

ەلىمىزدىڭ ءبىرقاتار وڭىرلەرىندەگى ونەر ۇجىمدارىنا كۇيشىنىڭ اتى بەرىلگەن. ەلوردادا كۇيشى دينا كوشەسى بار.

بۇدان بۇرىن ورالدا قۇرمانعازى مەن ديناعا ەسكەرتكىش اشىلعانىن جازعان بولاتىنبىز.

سوڭعى جاڭالىقتار