فرانسيادا پرەزيدەنتكە نان ونىمدەرىن پىسىرەتىن ۇزدىك ناۋبايشى انىقتالدى
پاريجدە ءداستۇرلى باگەتتەر سايىسى ءوتتى. جۇزدەن جۇيرىك شىققان جەڭىمپاز ەليسەي سارايىمەن ءبىر جىلدىق كەلىسىمشارتقا وتىردى. «جىلدىڭ ەڭ ۇزدىك باگەتى» اتتى ەرەكشە سايىس ناۋبايشىلار وداعىنىڭ رەزيدەنسياسىندا ۇيىمداستىرىلدى. اقتىق سىنعا ىرىكتەۋدەن وتكەن 148 ءونىم تۇسكەن. قازىلار القاسى ءارقايسىنىڭ ءدامىن، ءيىسىن، سىرتقى ءپىشىنى مەن ساپاسىن مۇقيات تەكسەرۋى ءتيىس. كوميسسيا مۇشەلەرىنىڭ جارتىسى - قالانىڭ قاراپايىم تۇرعىنى. قالعانى - كاسىبي ناۋبايشىلار مەن اتاقتى اسپازشىلار.
فابريس پروشاسسون، فرانسيا اسپازدىق اكادەمياسىنىڭ پرەزيدەنتى:
- پاريج مەرياسى بايقاۋدىڭ باس اسپازشىسى ەتىپ تاعايىنداۋى - مەن ءۇشىن ۇلكەن ابىروي. مەنىڭ مىندەتىم - دەگۋستاتسياعا كەلگەن پاريجدىكتەرگە كومەكتەسۋ. بۇل وتە قىزىق. ءتۇرلى ادىستەرمەن دايىندالعان باگەتتەردى كوردىك. ناۋبايشىلاردىڭ ءوز شەبەرلىگىن كورسەتۋگە مول مۇمكىندىكتەرى بار.
ءتورت ساعاتقا سوزىلعان دەگۋستاتسيادان كەيىن پاريجدىڭ ەڭ ۇزدىك ناۋبايشىسى انىقتالدى. جەڭىسى تۋرالى وعان تەلەفون ارقىلى حابارلاعان. ءبىراق ول سەنبەگەندىكتەن، سايىس ۇيىمداستىرۋشىلارى جەڭىمپازدى وزدەرى بارىپ قۇتتىقتادى. بۇرىن تەمىرجول جوبالارىنىڭ مەڭگەرۋشىسى بولعان فابريس لەرۋا وسىدان 4 جىل بۇرىن ماماندىعىن اۋىستىرىپتى. ال ءوزىنىڭ جەكە ناۋبايحاناسىن تەك 2017 -جىلى اشقان، سول سەبەپتەن جەڭىسكە جەتكەنىنە ەش سەنبەدى.
فابريس لەرۋا، سايىس جەڭىمپازى:
- راسىندا دا جەڭىسكە جەتۋگە ءۇمىتىم بولعان جوق. كۇن سايىن ءبىز جان سالىپ جۇمىس ىستەيمىز. بايقاۋعا دا وسىلاي باگەت ازىرلەدىك. ۇتقانىمىز كەرەمەت بولدى.
سايىس ەرەجەلەرى بويىنشا، جەڭىمپاز اقشالاي سىيلىق الىپ، ەليسەي سارايىمەن كەلىسىمشارتقا وتىرادى. فابريستىڭ ناۋبايحاناسىنا ەندى جۇرت كوپتەپ كەلەدى. ويتكەنى جەرگىلىكتى تۇرعىندار مەن تۋريستەر پرەزيدەنتكە دايىندالاتىن ناننىڭ ءدامىن تاتۋعا اسىق.
www.24.kz