مەملەكەت باسشىسى جۇمىس ساپارىمەن قوسشى اۋىلىنا باردى

نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ كەشە  قوسشى اۋىلىنا جۇمىس ساپارىمەن باردى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

مەملەكەت باسشىسى جۇمىس ساپارى بارىسىندا ينجەنەرلىك- كولىكتىك ينفراقۇرىلىم احۋالىمەن تانىسىپ، جەرگىلىكتى سۋ تاراتۋ ستانسياسىن ارالاپ كوردى. قازاقستان پرەزيدەنتىنە سۋمەن جانە ەلەكتر قۋاتىمەن قامتاماسىز ەتۋ ماسەلەسىن شەشۋ جونىندەگى تاپسىرمانىڭ ورىندالۋى تۋرالى باياندالدى.

سونىمەن قاتار، قاسىم- جومارت توقايەۆ ر. قوشقاربايەۆ اتىنداعى №1 ورتا مەكتەپكە باردى. مەملەكەت باسشىسى مۇعالىمدەرمەن جانە وقۋشىلارمەن اڭگىمەلەسۋ بارىسىندا ساپالى ءبىلىم الۋ ءۇشىن ەلدە بارلىق قاجەتتى جاعداي جاسالعانىن ايتتى.

قازاقستان پرەزيدەنتى اۋىل تۇرعىندارىنىڭ سانى جىلدام ءوسىپ كەلە جاتقانىن، اتالعان جاعداي ازاماتتاردىڭ تۇرمىس ساپاسىنا كەرى اسەر ەتپەۋى كەرەك ەكەنىن ايتتى. ءۇش اۋىسىمدى مەكتەپتەردىڭ ماسەلەسىن شەشۋگە باعىتتالعان شارالارعا ەرەكشە نازار اۋداردى.

- ءبىز بۇل ماسەلەنى جاقسى بىلەمىز جانە قوسشى اۋىلىندا 1200 ورىندىق مەكتەپ سالۋدى جوسپارلاپ وتىرمىز. ءتيىستى قاراجات ءبولىندى. اتالعان ماسەلە مەنىڭ باقىلاۋىمدا بولادى، - دەدى قاسىم- جومارت توقايەۆ.

مەملەكەت باسشىسى بۇل ەلدى مەكەننىڭ حالقى رەسمي ەسەپتەلگەن مەجەدەن كوپ ارتىپ كەتكەنىن ايتتى.

- ستاتيستيكالىق مالىمەت بويىنشا كەنت 16 مىڭ ادامعا ەسەپتەلگەن. ءبىراق ءىس جۇزىندە 50 مىڭنان استام حالىق تۇرادى. بۇل اۋداننىڭ الەۋمەتتىك سالاسىنا ۇلكەن سالماق تۇسىرەدى. اتالعان ماسەلەنى وبلىس باسشىلىعىمەن تالقىلاپ، جۇيەلى تۇردە شەشەتىن بولامىز، - دەدى قازاقستان پرەزيدەنتى.

ساپار قورىتىندىسى بويىنشا مەملەكەت باسشىسى ۇكىمەت پەن اقمولا وبلىسىنىڭ اكىمدىگىنە كەمشىلىكتەردى قالپىنا كەلتىرۋگە جانە اۋىلدى ودان ءارى دامىتۋعا قاتىستى ناقتى تاپسىرمالار بەردى.