قازاق جىگىتى قىتاي پوليتسياسى اراسىندا «بوكس پاتشاسى» اتاندى - شەتەلدەگى قازاق ءتىلدى ب ا ق- قا شولۋ

استانا. قازاقپارات - «قازاقپارات» ح ا ا شەت ەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاقستاننان تازا ەت يمپورتتالاتىن بولدى - «جەنمين جيباو» (People Daily)

قىتاي حالىق رەسپۋبليكاسى شىڭجاڭ ولكەسىنىڭ «دوستىق - الاشاڭقاي» شەكارا وتكەلىندە مالدى سويۋ جانە كارانتيندىك الاڭدار مەن ەت وڭدەۋ وندىرىسىنە قاجەتتى نىسانداردىڭ ىرگەتاسىن قالاۋ ءراسىمى ءوتتى، دەپ حابارلايدى kazakh.people.com.cn سايتى.

 اتالعان اقپارات كوزىنىڭ دەرەگىنشە، نىسان قۇرىلىسى اياقتالعان سوڭ، بۇل جەر قازاقستاننان ءتىرى مالدى (سيىر) تىكەلەي وتكىزىپ الاتىن شىڭجاڭداعى تۇڭعىش ورىنعا اينالماق.

 «جاڭا نىساندى «جۇڭشين قۇرىلىس» ج ش س 660 ميلليون يۋان قارجى شىعارىپ، سالىپ جاتىر. مۇندا مال سوياتىن 5 الاڭ بولادى. ءبىرىنشى مەرزىمدەگى قۇرىلىستىڭ اياقتالۋىمەن جىلىنا 100 مىڭ سيىر، 30 مىڭ قوي جانە 12 مىڭ جىلقىنى سويۋعا مۇمكىندىك تۋماق. نىسان بيىلعى قازان ايىنا دەيىن سالىنىپ بولادى. ال ەكىنشى مەرزىمدەگى قۇرىلىس جۇمىستارى پايدالانۋعا بەرىلگەن سوڭ، جىلدىق مال سويۋ كولەمى، سيىر 140 مىڭعا، قوي 70 مىڭعا، جىلقى سانى 18 مىڭ باسقا جەتەدى. بۇل كەزەكتەگى نىسان قۇرىلىسىن كەلەر جىلى قازان ايىندا اياقتاۋ جوسپارلانعان. وسى ارقىلى قىتايلىق تۇتىنۋشىلار قازاقستاننىڭ ەكولوگيالىق تازا ەت ءونىمىن مولىنا پايدالانۋ مۇمكىندىگى ارتادى»، - دەپ جازادى اتالعان ب ا ق.

قىتايلىق سايتتىڭ جازۋىنشا، قازاقستانداعى ءتۇرلى كاسىپورىندار اتالعان نىساندى جەم- شوپپەن قامداۋ قاجەتى كەلىسىلگەن. وسى ۋاقىتقا دەيىن ەكى ەلدىڭ شەكاراسىنان تەك ءتىرى جىلقى وتكىزىلگەن ەكەن.

قۋاندىق ارىستان ۇلى موڭعوليا ەلىندە وتكەن جەكپە- جەكتە كۇمىس جۇلدەگەر اتاندى - KAZNEWS

موڭعوليانىڭ قۇقىق قورعاۋ ۋنيۆەرسيتەتىنىڭ 85 جىلدىعىنا وراي وتكەن جەكپە- جەكتە 805- ىشكى اسكەري ءبولىمنىڭ قىزمەتكەرى قۋاندىق ارىستان ۇلى كۇمىس جۇلدەگە يە بولدى، دەپ حابارلايدى KAZNEWS اقپاراتتىق پورتالى.

«اتالعان جارىسقا 22 كلۋبتان 300-گە جۋىق سپورتشى قاتىستى. جارىستىڭ 55 كەلى سالماق دارەجەسىندە 805- ىشكى اسكەري ءبولىمنىڭ قىزمەتكەرى قۋاندىق ارىستان ۇلى كۇمىس جۇلدەگە يە بولدى. ال، ۋنيۆەرسيتەتتىڭ شەكارالىق قىزمەت فاكۋلتەتىنىڭ ارنايى دايىندىق كۋرسىنىڭ جەكپە- جەك ۇيىرمەسىنىڭ ۇستازى وڭالبەك قاۋشان ۇلى جارىستىڭ «ۇزدىك» تورەشىسى اتاندى»، - دەپ جازادى KAZNEWS اقپاراتتىق پورتالى.

وزبەكستان مەن قازاقستان جوعارى وقۋ ورىندارى بىرلەسكەن كافەدرالار اشۋعا كەلىستى - «ءو ز ا» اقپاراتتىق اگەنتتىگى

وزبەكستاندا وتكەن قازاقستان كۇندەرى اياسىندا تەمىربەك جۇرگەنوۆ اتىنداعى قازاق ۇلتتىق ونەر اكادەمياسى مەن وزبەكستان مەملەكەتتىك مادەنيەت جانە ونەر ينستيتۋتى بىرلەسكەن كافەدرالار اشۋعا كەلىستى، دەپ حابارلايدى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«وزبەكستاندا ءوتىپ جاتقان قازاقستان كۇندەرى اياسىندا تەمىربەك جۇرگەنوۆ اتىنداعى قازاق ۇلتتىق ونەر اكادەمياسى رەكتورى، فيلوسوفيا دوكتورى (PhD) اسحات ماەميروۆ وزبەكستان مەملەكەتتىك مادەنيەت جانە ونەر ينستيتۋتىنا كەلدى. جوعارى جانە ارنايى ورتا ءبىلىم بەرۋ مينيسترلىگىنىڭ اقپاراتىنا سايكەس، اسحات ماەميروۆ الدىمەن وقۋ ورداسى اۋماعىمەن، سپورت جانە وقۋ عيماراتتارىمەن تانىسقان. سونداي- اق، ساباق بارىسىمەن تانىسىپ، مۇنداعى ستۋدەنتتەرگە جاسالعان مۇمكىندىكتەرگە بايلانىستى جىلى لەبىزىن بىلدىرگەن. ساپار بارىسىندا وزبەكستان مەملەكەتتىك مادەنيەت جانە ونەر ينستيتۋتى رەكتورى يبراحىم يۋلداشيەۆ پەن اسحات ماەميروۆ تاراپىنان ءوزارا كەلىسىمشارتقا قول قويىلدى. وعان بايلانىستى ەكى جاقتىڭ ءبىلىم ورداسىندا بولاشاقتا بىرلەسكەن كافەدرالار اشۋ، كادرلار الماسۋ جانە ستۋدەنتتەردىڭ ەكى جاقتىق ءبىلىم بەرۋ جۇيەسىن ۇيىمداستىرۋ كوزدەلگەن»، - دەپ جازادى «ءو ز ا» اقپاراتتىق اگەنتتىگى.

ايدىنبەك قادىلبەك ۇلى قىتاي پوليتسياسىنىڭ «بوكس پاتشاسى» اتاعىن جەڭىپ الدى - قىتايدىڭ «ورتالىق حالىق راديوسى»  (CNR)

 ايدىنبەك قادىلبەك ۇلى قىتاي مەملەكەتىنىڭ ىشكى ىستەر سالاسىنىڭ قىزمەتكەرلى اراسىندا وتكەن بوكس چەمپيوناتىندا باس جۇلدەنى قانجىعالادى، دەپ جازادى kazakcnr.com سايتى.

 «ايدىنبەك قادىلبەك ۇلى ءۇرىمجى قالاسىنىڭ ىشكى ىستەر ورگانىندا جۇمىس ىستەيدى. ول قىتاي مەملەكەتىنىڭ ىشكى ىستەر سالاسىنىڭ قىزمەتكەرلەرى اراسىندا وتكەن بوكس چەمپيوناتىندا 81 ك گ سالماق دارەجەسى بويىنشا باس جۇلدەنى جەڭىپ الدى. بۇل تەك ايدىنبەكتىڭ جەكە جەڭىسى ەمەس، جالپى شىڭجاڭ ولكەسىنىڭ ىشكى ىستەر سالاسى ءۇشىن ۇلكەن مارتەبە بولدى» دەپ جازادى قىتايلىق ب ا ق.

 اتالعان باسىلىمنىڭ جازۋىنشا، ايدىنبەك قادىلبەك ۇلى التاي ايماعى قابا اۋدانىنىڭ تۋماسى. ايدىنبەك قىتايداعى تانىمال جاتتىقتىرۋشى، قانات يسلامنىڭ العاشقى باپكەرى مۇرات بوشاي ۇلىنىڭ شاكىرتتەرىنىڭ ءبىرى. ول 12 جاسىنان باستاپ بوكسقا قاتىسقان. 1997 -جىلى 17 جاسىندا قىتاي چەمپيوناتىندا 57 ك گ سالماق دارەجەسى بويىنشا باس جۇلدە ەنشىلەگەن. 2000 -جىلدان باستاپ ءۇرىمجى قالاسى ىشكى ىستەر ورگانىندا پوليتسيا قىزمەتىن اتقارىپ كەلەدى.

 الماتىدا «ءجۇز ولەڭ» كىتابىنىڭ تۇساۋكەسەر ءراسىمى ءوتتى - «ءو ز ا» اقپاراتتىق اگەنتتىگى

الماتىداعى ق ر ۇلتتىق كىتاپحاناسىندا «ءجۇز ولەڭ» اتتى كىتاپتىڭ تۇساۋكەسەر ءراسىمى ءوتتى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

 «اتالعان كىتاپ وتكەن 2018 -جىل «قازاقستانداعى وزبەكستان جىلى» دەپ جاريالانۋىنا وراي ەكى ەل اراسىنداعى ادەبي بايلانىستاردى نىعايتۋعا باعىتتالعان جوبا رەتىندە جارىق كورىپ وتىر. «تۇلعا - دوستىق» قوعامدىق قورى، «ادەبيەت الەمى» ورتالىعى، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاحير وسپان ۇلى بالىقپايەۆتىڭ قولداۋىمەن، وزبەكستان جازۋشىلار وداعى، «جاستىق» جۋرنالى رەداكسياسىمەن بىرلەسكەن «ءجۇز ولەڭ» اتتى جوبا اياسىندا وزبەكستاننىڭ جاس بۋىن اقىندارىن نەگىز ەتكەن 20 اقىننىڭ ولەڭى قازاق تىلىنە اۋدارىلىپ، «ءجۇز ولەڭ» دەگەن اتپەن كىتاپ بولىپ جارىق كوردى»، - دەپ جازادى «ءو ز ا» اقپاراتتىق اگەنتتىگى.

اتالعان سايتتىڭ حابارلاۋىنشا، وسى جوبا بويىنشا بيىل «وزبەكستانداعى قازاقستان جىلىنىڭ» اشىلۋىنا بايلانىستى قازاقستاننىڭ جاس تالانتتارىن نەگىز ەتكەن 20 اقىننىڭ ولەڭى وزبەكستان رەسپۋبليكاسىندا «ءجۇز ولەڭ» دەگەن اتپەن وزبەك تىلىنە اۋدارىلىپ وزبەكستان جازۋشىلار وداعى، «جاستىق» جۋرنالى رەداكسياسىنىڭ قولعا الۋىمەن باسپاعا دايىندالىپ جاتىر.

الەمدەگى تۇڭعىش جابىق ساۋدا ورتالىعىن بىلەسىز بە؟ - ت ر ت

الەمدەگى تۇڭعىش جانە ەڭ ءىرى جابىق ساۋدا ورتالىعى - ىستانبۇلداعى كاپالى چارشى، دەپ جازادى تۇركيا راديو تەلەۆيزيا پورتالى.

 

«فاتيح سۇلتان مەحمەت پاديشا سالدىرعان ۇلكەن بازار - توبەسى تام مەن كۇمبەزدەرمەن جابىلعان دۇكەندەردەن تۇراتىن تاريحي ساۋدا ورتالىعى. 1461 -جىلى ىرگەتاسى قالانعان. كاپالى چارشى ەستەتيكالىق ساۋلەتىمەن ۇلكەن لابيرينتكە ۇقسايدى. عيماراتتىڭ 60-قا جۋىق كوشەسى، 3600-دان استام دۇكەنى بار. بارلىق اۋماعى -  30700 شارشى مەتر. 1460 -جىلدارى سالىنعان بازار دجيەۆاحير دەپ اتالعان. ونىڭ تابىسى اياسوفياعا جۇمسالۋ ءۇشىن فاتيح سۇلتان مەحمەتكە بەرىلگەن. ارتىنان ءتۇرلى دۇكەندەر اشىلىپ، ىستانبۇلداعى ساۋدا ورتالىعىنا اينالعان. ۇلكەن بازار بۇگىنگى تاڭدا دا جاندىلىعىن، تانىمالدىعىن، قىزمەتىن جالعاستىرۋدا. ساۋدا ورتالىعىن كۇن سايىن 250-400 مىڭ ادام ارالايدى»، - دەپ جازادى اتالعان ب ا ق.

تەگەرانداعى ق ر ەلشىسى ەكى ەل اراسىنداعى ساۋدا اينالىمىن ارتتىرۋعا مۇددەلىلىك تانىتتى - «فارس» اقپارات اگەنتتىگى

تەگەرانداعى قازاقستان ەلشىسى اسحات ورازباي ەلىنىڭ باندار- ابباس تەڭىز دالىزىندەگى ساۋدا اينالىمىن ارتتىرۋعا مۇددەلىلىك تانىتتى، دەپ حابارلايدى parstoday اقپارات اگەنتتىگى.

 « IRNA اقپارات اگەنتتىگىنىڭ مالىمەتى بويىنشا، اسحات ورازباي بەيسەنبى كۇنى ديپلوماتتار توبىمەن يراننىڭ وڭتۇستىگىندەگى ءشاھيد رادجاي اتىنداعى پورتقا كەلدى. وندا ەلشى قازاقستان ديپلوماتتارى توبىنىڭ ماقساتىن يرانمەن كەلىسسوز جۇرگىزىپ، ەكى ەلدىڭ ساۋدا اينالىمىن ارتتىرۋعا قاجەت مەحانيزمدى تابۋ دەپ اتادى. ءشاھيد رادجاي اتىنداعى پورت حالىقارالىق سولتۇستىك- وڭتۇستىك دالىزدە ورنالاسقاندىقتان جۇكتى تيەۋ جانە ءتۇسىرۋ تۇرعىسىنان زاماناۋي مۇمكىندىكتەرگە يە.

يراننىڭ وڭتۇستىگىندەگى حورموزگون وبلىسىنىڭ پورتتار جانە كەمە قاتىناسى ۇيىمىنىڭ ديرەكتورى مۋرودوللا افيفيپۋر قازاقستاندىق ديپلوماتتار ءۇشىن يراننىڭ ەڭ ۇلكەن پورتىنىڭ جابدىقتالۋ جاعدايىن باياندادى. قازاقستان مەن يراننىڭ ساۋدا اينالىمى وتكەن التى جىلدا بەس ەسە ارتىپ، 400 ميلليون دوللاردان 2 ميلليارد دوللارعا جەتتى»، - دەپ جازادى parstoday.

اۆتور: باقىتجول كاكەش