قازاقستان پرەزيدەنتى قاسىم- جومارت توقايەۆتىڭ ۆيرتۋالدى قابىلداۋى اشىلادى

نۇر- سۇلتان. قازاقپارات - مەملەكەت باسشىسى كۇن سايىن ءارتۇرلى اقپارات كوزدەرىنەن وتە اۋقىمدى حابارلامالار الادى. ودان باسقا، پرەزيدەنت زاماناۋي كوممۋنيكاتسيا قۇرالدارىنا - ينتەرنەت رەسۋرستارى مەن الەۋمەتتىك جەلىلەرگە دە ەرەكشە كوڭىل بولەدى،

 دەپ حابارلايدى ق ر پرەزيدەنتىنىڭ باسپا ءسوز حاتشىسى بەرىك ءۋالي فەيسبۋكتەگى پاراقشاسىندا.

اقپاراتتار تاسقىنى كۇن سايىن ارتىپ كەلەدى. پرەزيدەنت ماڭىزدى وقيعالاردىڭ تامىرىن دەر كەزىندە ءدوپ باسىپ وتىرۋى كەرەك. ال مەملەكەتتىك ساياساتتىڭ باستى باسىمدىقتارىنىڭ ءبىرى - حالىقپەن ءتيىمدى كەرى بايلانىس ورناتۋ، قوعاممەن پىكىر الماسۋدى جولعا قويۋ.

جۋىردا قازاقستان پرەزيدەنتى ءوڭىر باسشىلارىمەن بولعان جيىندا مينيسترلەر مەن اكىمدەردى الەۋمەتتىك جەلىلەرگە تىركەلىپ، حالىقپەن تىكەلەي بايلانىستا بەلسەندى جۇمىس ىستەۋدى تاپسىرعان بولاتىن.

مەملەكەت باسشىسى رەتىندە قاسىم- جومارت توقايەۆ ءوزى ۇلگى كورسەتىپ، تۆيتتەردە (@TokayevKZ) اككاۋنتىن جۇرگىزىپ كەلەدى، جاقىندا عانا ينستاگراممدا (tokayev_online) پاراقشاسىن اشتى. اتالعان الەۋمەتتىك جەلى الاڭدارىندا حالىق (ياعني، الەۋمەتتىك جەلى قولدانۋشىلارى) وزدەرىنىڭ سۇراقتارىن قويىپ، پىكىرلەرىن، ۇسىنىستارىن جازىپ جاتىر.

جازىلعان پىكىرلەردىڭ اراسىندا جۇيەلى تۇردە جۇمىس ىستەۋدى قاجەت ەتەتىن وتە قۇندى جانە ماڭىزدى اقپاراتتار دا بار. سوندىقتان دا، مەملەكەت باسشىسى ازاماتتار رەسمي تۇردە سۇراۋ سالا الاتىنداي زاڭدىق كۇشى بار ۆيرتۋالدى قابىلداۋ اشۋدى تاپسىردى. ازاماتتاردىڭ وسى ۆيرتۋالدى قابىلداۋعا جازعان ءار حاتى تىركەلەدى، كەلىپ تۇسكەن حاتتاردى پرەزيدەنتتىڭ ءوزى جانە اكىمشىلىك قىزمەتكەرلەرى قاراستىرادى.

ۆيرتۋالدى قابىلداۋ مەملەكەت باسشىسىنا قوعامداعى وزەكتى الەۋمەتتىك ماڭىزدى ماسەلەلەردى انىقتاپ، ولاردى شۇعىل شەشۋگە كومەكتەسەتىنى ءسوزسىز.

ۆيرتۋالدى قابىلداۋ Akorda.kz سايتىندا 2019 -جىلدىڭ 22 - ساۋىرىنەن باستاپ ىسكە قوسىلادى.

اۆتور: ەربول جانات