شىمكەنتتە بەس ەلدىڭ دارىگەرلەرى بەدەۋلىك ماسەلەسىن تالقىلادى
قازاقستان رەپرودۋكتيۆتى مەديتسينا قاۋىمداستىعى مەن شىمكەنت قالالىق دەنساۋلىق ساقتاۋ باسقارماسىنىڭ ۇيىمداستىرۋىمەن وتكەن شاراعا قازاقستان، رەسەي، ۋكراينا مەن وزبەكستاننان كەلگەن 500-دەن اسا دارىگەر قاتىستى. كونفەرەنسيادا ماماندار جاساندى جولمەن تەگىن ۇرىقتاندىرۋ جانە بەدەۋلىكتى ەمدەۋدىڭ ءتيىمدى جولدارىن تالقىلادى. سونداي- اق، بالا سۇيگىسى كەلىپ جۇرگەن وتباسىلارعا كۆوتانى كوبەيتۋ ماسەلەسىن ورتاعا سالدى.
«ەلىمىزدەگى وتباسىلاردىڭ 15 پايىزىندا بەدەۋلىك ماسەلەسى كەزدەسەدى. ونى ەمدەۋدىڭ جاڭا ءادىسىن ەنگىزۋ ارقىلى پروبەمالاردى شەشۋگە مۇمكىندىك بار. قازاقستاندا 16 مىڭنان استام بالا جاساندى ۇرىقتاندىرۋ جولىمەن دۇنيەگە كەلسە، شىمكەنتتە جىلىنا 500 بالا تۋادى. كونفەرەنسيادا ەمدەۋدىڭ جاڭا ادىستەرىمەن قاتار دارىگەرلەردىڭ جاڭا بۋىنىن وقىتۋ ماسەلەسى قوزعالدى» ، - دەدى قازاقستان رەپرودۋكتيۆتى مەديتسينا قاۋىمداستىعىنىڭ پرەزيدەنتى ۆياچەسلاۆ لوكشين.
جاساندى جولمەن ۇرىقتاندىرۋ بويىنشا 25 جىلدىق تاجىريبەسى بار سالتانات بايقوشقاروۆا بولسا ەلىمىزدە رەپرودۋكتولوگ مامانداردىڭ از ەكەنىن اتاپ ءوتتى.
«بەدەۋلىكتى زەرتتەپ، ەمدەيتىن ماماندار، اسىرەسە، وڭىرىلەردە تاپشى. بۇگىندە گينەكولوگ مامانداردى قايتا وقىتۋعا ءماجبۇرمىز. سوندىقتان مامانداردى وقىتۋ مەن كاسىبي جەتىلدىرۋگە نازار اۋدارىلۋ قاجەت»، - دەدى سالتانات بايقوشقاروۆا.
اۆتور: اينۇر اقبايەۆا