قازاقپارات قىزمەتكەرى «ۇزدىك مەنشىكتى ءتىلشى» اتاندى
«اقمولا وبلىسىنىڭ سپورت تارلاندارى» وبلىستىق سپورت فورۋمى ءوتىپ، وندا ەڭ ۇزدىك سپورتشىلار مەن جاتتىقتىرۋشىلار، وبلىستىق سپورت مەكەمەلەرىنىڭ باسشىلارى جانە سپورت جۋرناليستەرى جىل قورىتىندىسى بويىنشا ديپلوم جانە ارنايى اقشالاي سىيلىقتارمەن ماراپاتتالدى.
شارا باستالماس بۇرىن جينالعاندار سپورتتىق جەتىستىكتەر پاش ەتىلگەن كورمەنى تاماشالادى. سونىمەن قاتار، الەمدىك، حالىقارالىق جانە رەسپۋبليالىق جارىستاردا جەڭىس تۇعىرىنا كوتەرىلىپ، ەلىمىزدىڭ كوك تۋىن جەلبىرەتكەن اقمولالىق سپورتشىلار تۋرالى بەينەفيلم ۇسىنىلدى.
جىل قورىتىندىسى بويىنشا 2018 -جىلدىڭ ەڭ ۇزدىك سپورتشىسى رەتىندە سەمسەرلەسۋدەن حالىقارالىق دارەجەدەگى سپورت شەبەرى، جازعى ازيا ويىندارىنىڭ چەمپيونى دميتري الەكسانين، «2018 -جىلدىڭ ۇزدىك جاتتىقتىرۋشىسى» اتالىمى بويىنشا بوكستان قازاقستان رەسپۋبليكاسىنىڭ جاتتىقتىرۋشىسى الەكساندر ۆىسوسكي لايىق دەپ تانىلدى.
جەڭىمپازداردى اقمولا وبلىسىنىڭ اكىمى ەرمەك مارجىقپايەۆ ماراپاتتادى.
«جىل سايىن جوعارى كورسەتكىشتەرگە قول جەتكىزگەن سپورت سالاسىنىڭ وكىلدەرىن قاجىمۇقان مۇڭايتپاسوۆ اتىنداعى سىيلىقپەن ماراپاتتاۋ داستۇرگە اينالىپ وتىر. بارلىق سپورتتىق جەتىستىكتەر قوعامدىق ۇيىمداردىڭ، جاتتىقتىرۋشىلار مەن سپورتشىلاردىڭ ەرەن ەڭبەگى»، - دەدى ايماق باسشىسى.
قاجىمۇقان مۇڭايتپاسوۆ اتىنداعى جۇلدە مەن اقشالاي سىيلىقتار حالىقارالىق جانە رەسپۋبليكالىق جارىستاردا جەڭىمپاز اتانعان 30 دان استام سپورتشى مەن سپورت تاقىرىبىن جازاتىن ب ا ق وكىلدەرىنە تاپسىرىلدى. ونىڭ ىشىندە «قازاقپارات» ح ا ا اگەنتتىگىنىڭ قىزمەتكەرى اسلان وسپانوۆ «ۇزدىك مەنشىكتى ءتىلشى» اتالىمى بويىنشا جەڭىمپاز اتاندى.